37-nik ukiulik amerlasuunik kannguttaatsuliornermi kingorna paarineqartussanngorlugu eqqartuunneqarpoq

Qeqqata Eqqartuussiviata angut 37-nik ukiulik Sisimiuneersoq paaqqutarineqartussanngorlugu eqqartuummagu, inatsisit sakkortunerpaamik pineqaatisiissutigisinnaasat atorneqarpoq. Tamatuma saniatigut eqqartuunneqartoq nukappiaqqanut arfineq marlunniit 7.0000 kr-it 75.000 kr-inullu akornanni annertussuseqartunik taasiisussanngorlugu eqqartuunneqarpoq.

Eqqartuussiviup angut pisuni ataasiakkaani pinngitsaaliisimasutut, arlaleriarlunilu nukappiaqqanik 13-nit 17-nut ukiulinnut kannguttaatsuliorsimasutut pisuutippaa. 37-nik ukiulik nammineq angerlarsimaffimmini nukappiaqqanik isiginnaagassiorpoq, tassani anartarfimmi assiliissut nalunaaquttamut toqqugaq atorlugu.

Taamattaaq angut isiginnaagassianik amerlasuunik kannguttaatsuliornernik imaqartunik pigisaqarpoq. Unnerluussissut malillugu isiginnaagassiat ullut 41-t sinnerlugit sivisussuseqarput. Taakku ilaat annikitsut katergori 3-tut, isiginnaagassianik sakkortunerpaanik taaneqartuneersuupput.

Eqqartuussineq Sisimiuni unnerluutigineqartup kannguttaatsuliorfigineqartullu aggerfianni aallartippoq. Qeqqata Eqqartuussiviatali ullut eqqartuussiviit tallimaanni kingullersaannilu tallimanngornermi init Nuummiittut atorpai. 37-nik ukiulik siusinnerusuut assingusunik pinerliinernik eqqartuunneqartareersimavoq, unnerluussutigineqartullu ilaannut pisuulluni nassuerluni.

Unnerluussisussaatitaasoq: Alloriarneq pisariaqartoq

Unnerluussisussaatitaasup Alexander Stüruppip paarineqartussanngortitaanermik piumasaqarnissaa ilimagineqareerpoq. Taanna siusinnerusukkut unnerluunneqartumut suliamik ingerlatereernikuuvoq, tallimanngormallu ”meeqqanik ussiiniartutut” taavaa.

– Sisamassaa nukappiaqqanik inuusuttunik kannguttaatsuliortutut meeqqanilluunniit atoqateqarnermik isiginnaagassianik peqartutut eqqartuussivimmut sassartinneqarpoq, unnerluussisussaatitaasoq tikkuaavoq.

– Pineqaatissinneqarsimasunut inissiisarfimmiitsitsineq unnerluunneqartumut sunniuteqanngilaq. Taamaammallu maanna paarineqartussanngortitsinermik piumasaqarpugut. Matumanimi aaqqissuussamik atornerluineq uteqqiattuartoq pineqarpoq.

Alexander Stürupip unnerluunneqartup inuusuttunik angerlarsimaffinnit atugarliortuneersunik atornerluisarnera erseqqissaatigaa. 37-nik ukiullip sikut, pizzat playstationilu qanillisaatigisarpai, killigisaat suujunnaarsittarlugit, angerlarsimaffimminilu kinguaassiutinut tunngasunik samminnitsitsilersarluni, unnerluussisussaatitaasoq oqarpoq.

Illersuisoq: Suliaq annertoorsuanngortinneqarpoq

2024-mi tarnit pissusaannik nakorsap 37-nik ukiullip paarineqartussanngortinneqarnissaa akerleralugu oqaaseqarpoq. Tamannali 2025-mi nutaamik tarnikkut pissusaata oqaaseqarfiginerani allanngorluinnarpoq. Taanna suliaq nutaaq pissutsinik arlalinnik imaqartoq tunuliaqutaralugu allanneqarpoq.

– Suliaq manna annertoorsuanngortinneqartoq eqqarsaqqajaanarpoq, illersuisoq Finn Meinel oqarpoq.

Retslægerådip oqaaseqaataa alla paarineqartussanngortinneqarnerup periarfissaaneranik oqariartorpoq, pisariaqartutulli isiginagu.

AAMMA ATUARUK

Kannguttaatsuliorsimasutut unnerluutigineqartoq: Isertortumik assiliivilersukkanik videoliarineqartunillu apersorneqartoq

Nukappiaqqat Sisimiuneersut nammineerlutik 37-nik ukiulimmik unnerluutiginnissimannginnerat, illersuisup tikkuarpaa. Taakku unnerluussisussaatitaasup saqqummiineratulli kannguttaatsuliorfigineqartutut misiginngitsut, taanna isumaqarpoq. Ataatsimut isigalugu Alexander Stürupip suliami atortunik paasinninnera isumaqatiginngilaa.

Tamannali matumani iserfigisinnaanngilarput, suliammi ingerlanneqarnera tamakkiisoq pappiaqqallu takusinnaasimanngilagut. Suliap ingerlanerani nukappiaqqat eqqarsaatigalugit atortussiallu ilusaat eqqarsaatigalugu arlaleriarluni suliaq matoqqasumik ingerlanneqarpoq.

Inatsisinik unioqqutitsinerit uteqqiattut

37-nik ukiulik suliap ingerlanerani eqqissisimavoq. Inaarutaasumik oqaaseqarnermini inuttut ajornartorsiutiminik katsorsarneqarluni, katsorsarneqarnermilu nanginneqarnissaanut piareersimanini erseqqissaatigaa.

Tamannali paarineqartussanngortinneqarnermi pissasoq, eqqartuussisoq Stine Dana Lynge eqqartuuseqataasullu aalajangerput.

– Unnerluunneqartup ukiuni arlalinni nukappiaqqat piumasaannut kuninneqarnini akiliutigitittarai, eqqartuussiviup tunngavissaatippaa. Soorluttaaq kiinnakkut timikkullu attuualaarneqarneq iliuuserisami nalinginnaasuuneranik isumaqalersikkai.

– Unnerluutigineqartup siusinnerusukkut assingusumik pinerluuteqartarsimanera katsorsarneqarsimaneralu tunngavilersuutit ilagaat. Taamaakkaluartoq assingusumik pinerloqqittarpoq, eqqartuussisoq oqarpoq.

Unnerluutigineqartup illersuisullu sivikitsumik oqaloqatigeereerlutik suliap ingerlateqqinneqarnissaa aalajangerpaat. Illersuisup Finn Meinelip eqqartuussinerup atorunnaarsinneqarnissaa kissaatigaa, taamaalilluni suliaq aallaqqaataanit aallarteqqinneqartussanngorlugu. Suliap ingerlanerani kukkusoqarsimasoq isumaqarpoq. Tamannali tallimanngornermi eqqartuussivimmi erseqqinnerusumik itisilerumanngilaa.