Kannguttaatsuliorsimasutut unnerluutigineqartoq: Isertortumik assiliivilersukkanik videoliarineqartunillu apersorneqartoq

Sisimiuni sila seqinnarippoq, qilak tungutsorilluni. Naak seqinnarikkaluartoq sila nillataarpoq.

Qeqqata Eqqartuussisuuneqarfiani inimi eqqartuussiviusumi siullermi 37-inik ukiulik issiavoq. Taanna pisimasunut katillugit 66-nut unnerluutigineqarpoq, ilaatigut unnerluutigineqarluni kannguttaatsuliorsimasutut, eqqissisimanermik akornusiisimasutut, inuusuttup assinganik kinguaassiuutitigut tunngasunik siammarterisimasutut, atoqatiginninnissamut saasaarisimasutut, pinngitsaaliilluni atoqatiginnissimasutut, kiisalu inuusuttumik akiliilluni atoqateqarsimasutut.

Ini eqqartuussiviusoq inoqarpianngilaq. Taamaallaat politeeq nakkutilliisoq kiisalu Sermitsiami tusagassiortoq malinnaaniarluni takkuttoq. Ini eqqartuussiviusoq ima nipaatsigaaq, allaat nalunaaquttap issariarneri tusaalluarneqarsinnaallutik.

Unnerluutigineqartoq nasartalimmik tujuuloqarpoq, nasartaata ilua sungaartuulluni. Illersuisumi saniani eqqissilluni issiavoq. Akiani unnerluussusisoq oqalutsilu issiapput.

Eqqartuussineq ulloq sioqqullugu aallartittoq

Eqqartuussinissamut allattuiffik naapertorlugu eqqartuussineq marlunngornermi maajip ulluisa 13-anni aallartittussaagaluarpoq, paasinarsivorli eqqartuussineq ataasinngornermi aallartissimasoq, tassani unnerluussutit katillugit 66-usut saqqummiunneqarlutik.

LÆS OGSÅ

Angut 37-nik ukiulik Sisimiuni nukappiaqqanik kinguaassiuutitigut atornerluisimasutut unnerluutigineqartoq

Nalunaaqutaq qulingiluanngortoq eqqartuussisoq eqqartuusseqataasartullu iserput, eqqartuussivilersuussinerullu ullup aappaa aallartissinnaanngorpoq.

Eqqartuussinermi unnerluutigineqartoq siorna 2024-imi politiinit tigusarineqarami arsaarinnissutigineqartut videot pillugit apersorneqasaaq.

Unnerluutigineqartup video pigisimallugit nassuerutigigaa.

Unnerluutigineqartoq apersorneqarami tigusarineqarami videot paarisarisimanerlugit aperineqarpoq, tamannalu nammineq uppernarsarpaa. Videot marluusut eqqartuussivimmi takutinneqarput, tassani videomi siullermi unnerluutigineqartup kiinaa takuneqarsinnaalluni, videollu aappaani nammineq perusuersartarfimmiittoq takuneqarsinnaalluni.

Unnerluussisup unnerluutigineqartoq aperaa sooq perusuersartarfimmi toqqorluni filmiliuuteqarnersoq. Unnerluutigineqartup tamanna oqaaseqarfigerusunnginnerarpaa. Nassuiaatigaalu pulaartut ilaasa toqqorluni filmiliuuteqartoq ilisimagaat, ilaasali ilisimanngikkaat.

Nassuiaatigaattaaq pigisaminik tillittoqannginnissaa anguniarlugu toqqorluni filmiliuutit ikkussimallugit. Pigisani tammartarmata.

Aaqqissuussaasumik toqqortat

Videot immiunneqarsimasut maajip qaammataani 2021-imit aallartipput, taakkulu immiussat kortimut 64 GB-itut annertutigisumut immiunneqartarput, kingornalu harddiskimut toqqorneqartarlutik.

Unnerluutigineqartup nassuiaatigaa immiussat misissortarsimallugit, susoqanngitsullu piiartarsimallugit. Ilaatigut nassiuiaatigaa nukappiaqqat marluk unnerluutigineqartup inaani unnuisimasut. Nassuiaatigaa nammineq illuaqqamukartussaalluni nukappiaqqat marluk inissiamiiginnarusullutik uteriisaarsimasut imigassartorfiusumiikkusunnatik, nammineq nangartarsimanerarpai, naggataanilu iniminiissinnaasut akueriinnarsimallugit. 

Illuaqqamiillu angerlarami angerlarsimaffini tukaqimmat paasivaa allanik isaasoqartarsimasoq, taamaattumillu filmiliakkut misissorniarsimallugit.

Filmiliat toqqorsimavai hardiskimullu ilillugit, puigorsimallugillu. Taamatut ilaatigut nassuiaavoq.

Video atoqatigiinnermik imaqartoq

Unnerluussisup videofilmi qanikkut atoqatigiinnermik imalik pillugu unnerluutigineqartoq aperaa. Taassumallu nassuerutigaa toqqorsimallugu nalunagu.

Unnerluussisup kingorna piumasaraa eqqartuussivilersuussineq matoqqasuussasoq, videot eqqartuussivimmi saqqummiunneqartussat inunnik 18-inik inorlugit ukiulinnik imaqarmata.

Eqqartuussisut unnerluussisussaatitaasup piumasaqaataa akueraat, taamaattumillu tusagassiortoq inimi eqqartuussiviusumit anilluni.

Eqqartuussineq taamaalilluni matoqqasunngorpoq.