Aalisarnermut inatsisissatut siunnersuutip aappassaaneerneqannginnerani borgmesterip isornartorsiorpaa

Aalisarnermut inatsisissatut siunnersuut akerleriissutaasoq tallimanngorpat nalunaaqutaq 13.00 aappassaaneerneqassaaq.

Siunnersuut ataatsimiititaliami suliarineqarsimavoq, amerlanerussuteqartullu siunnersuut ataatsimut isigalugu akuerisimavaat - allannguutissanilli arlalinnik siunnersuuteqarluni.

Kommune Qeqertalimmi borgmesterip Ane Hansenip (IA) inatsisissatut siunnersuut piffissaq kingulleq atorlugu sakkortuumik isornartorsiorpaa.

Inatsit kommuniminut qanoq sunniuteqassanersoq borgmesterip ernumassutigingaarpaa:

Ataatsimiititaliami amerlanerussuteqartut aalisarnermut inatsisissaq tunuliaqutserpaat

- Kommune Qeqertaliinnarluunnit isigalugu taamatut isikkoqarluni akuerineqarpat, Aasianni fabrikki ukioq kaajallallugu 96-inik suliffiusoq ilaqutariippassuarnullu pilersuisuusoq matussasoq, Polar Seafoodip piginnittuinit ersarissumik nalunaarutigineqareerpoq. 

- Tamanna kommune Qeqertalimmut ajorluinnartumik kinguneqassaaq, tusagassiuutinut nalunaarummi borgmesteri allappoq.

Aalisarnermut inatsisissatut siunnersuutip kingunerisaanik Polar Seafood piginnittutillu raajartassiissutinik aalisakkanullu pisassiissutinik annertuunik pinngitsaalisaallutik tunisissapput, tassungalu atatillugu Aasianni tunisassiorfiup matuneqarnissaa ingerlatseqatigiiffimmit nalunaarutigineqarpoq.

Suliffiit annaaneqarnissaat ernumassutigigaa

Royal Greenlandip immikkut inissisimanini attatiinnarsinnaanngikkuniuk suliffissuaatiminik matusisariaqarsinnaasoq Ane Hansenip aamma maluginiarpaa. Inatsisartuni aalisarnermut ataatsimiititaliami amerlanerussuteqartut naapertorlugit Royal Greenlandip atugai piffissaq ungasinnerusoq eqqarsaatigalugu namminersortut atugaannut naligiilersinneqassapput, Royal Greenlandillu oqaasii naapertorlugit tamanna suliffissuaatinik 30-t tikillugit matusinermik kinguneqarsinnaavoq.

- Kommune Qeqertalimmi Royal Greenlandip fabrikkeqarfiani 100-t sinnerlugit ukiup ilaani sulisoqartarpoq, taakkunannga 130-t Qasigiannguani suliffiullutik. Taakkunannga sorliit amigartoorutaallutik ingerlanersut naluarput, RG-mit Naalakkersuisunilluunnit ersarissuliuutaangimmata, Ane Hansen allappoq.

Inatsisissatut siunnersuutip kingunerisinnaasai pillugit naatsorsueqqissaarnerusoqarnissaa borgmesterip piffissaq kingulleq atorlugu ujartorpaa, Inatsisartunilu politikerinut ima kajumissaaraluni:

- Inuiaqatigiinnut pingaassusia, naleqassusia minnerunngitsumillu ilaqutariippassuarnik inuuniarnermi tunngaviunera sulinissinni pingaarnerpaatut eqqaamassallugu pisussaaffigarsi, angisuumillu akisussaaffeqartutut paaseqatigiinniutiginiarsiuk anneruniutiginagu.

Aalisarnermut ataatsimiititaliami amerlanerussuteqartut Siumut aamma Inuit Ataqatigiit aalisarnermut inatsisissatut siunnersuut taperserpaat, taamaattumillu inatsisissatut siunnersuut akuerineqangajalerpoq. Pingajussaanik naggataasumillu maajip 16-ianni suliarineqassaaq.

Inatsisissatut siunnersuutip allanngortinnissaanik aalisarnermut ataatsimiititaliap siunnersuuteqarnera Aasianni tunisassiorfiup annaanneqarnissaanut iluaqutaanngitsoq, tallimanngormat ullaakkut Polar Seafoodimit nalunaarutigineqarpoq.

Polar Seafoodip raajanik 8.000 tonsinik annaasaqarumaarnera pissutigalugu, suliffissuaq 96-inik sulisoqartoq ukiut pingasut ingerlaneranni matussallugu ingerlatseqatigiiffiup naatsorsuutigaa.