Ajornartorsiut ingasatsippoq: RAL-ip illuutini tuniniarniarpai
Inuiaqatigiinni aningaasaqarnikkut ingerlanerliorneq pissutigalugu Royal Arctic Linep isertitai annikilleriarput. Suliffeqarfiup siunertaanut kalaallinik innuttaasunik pilersuinermut iluaqusiinngitsunik illuutinik pigisanillu allanik nalilinnik, RAL taamaattumik tuniniaaniarpoq. Ingerlatseqatigiiffiup akiliisinnaassusaata pitsanngorsarnissaa siunertaavoq.
Assiliisoq: Jesper Hansen
Royal Arctic Line arlalitsigut unammilligassaqarpoq, nunami maani aningaasaqarnikkut ingerlanerliorneq assartukkat ikiliartornerannik kinguneqarumaarmat, umiarsuaatileqatigiiffiup 2023-mut ukiumoortumik nalunaarusiaani allassimavoq, tassanilu 2024-mut naatsorsuutit eqqartorneqarput.
Aningaasat naleerukkiartornerisa kingunerisaanik aningaasartuutit qaffakkiartornerat akiorniarlugu assartuinermi akit 2024-p aallartinnerani 6,4 procentimik qaffanneqarput. Tamatuma aningaasartuutit qaffakkiartuinnartut matussusernissaat qulakkiissavaa.
Appariaateqarneq annertuumik eqquisussaavoq
- Inuiaqatigiinni aningaasatigut ingerlatat assartukkat annertussusiinut taamatuttaarlu suliffeqarfiup iluanaarutaanut aalajangiisuupput. Aningaasatigut ingerlatani appariaateqarneq pissappat tamanna annertuumik eqquisussaavoq, missingersuutillu oqimaaqatigiissumik inissinnissaannut naatsorsuinerup eqqorneqarataarsinnaanissaa pisinnaassalluni. Taamaattumik aningaasatigut ineriartorneq malinnaavigineqaqqissaassaaq, nassiussallu annertussusiini annikilliartortoqassagaluarpat aaqqiissutissanik iliuuseqartoqartassalluni, ingerlatsivimmit nalunaarusiami oqaatigineqarpoq, 2024-milu sinneqartooruteqannginnermit 15 mio. kr.-illu akornanni sinneqartooruteqarnissaminnik naatsorsuuteqarlutik, suliffeqarfissuaq ersersitsivoq.
Sinneqartooruteqarnissamik piumasaqaat
Ukiuni kingullerni RAL umiarsuaatiminik nutarsaanermut aningaasaleerujussuarsimavoq.
- Umiarsuaatinik nutarsaanerup malitsigisaanik taarsigassarsianut erniat taarsersuutillu kiisalu siunissami aningaasaliinissamut ileqqaakkat pissutigalugit ingerlatseqatigiiffiup angusaanut piumasaqaatit suli qaffasipput. Taamaammat ingerlatseqatigiiffiup aningaasartuutikillisaaqqinnissaq siunertaralugu suleriaatsinik pisariillisaanissaq digitalinngorsaanermillu annertusaaqqinnissaq 2024-p ingerlanerani siunnerfilimmik sulissutiginiarpaa, ilisimatitsissutaavoq.
2023-mi umiarsuaatileqatigiiffik akuersissuteqanngitsunik suliassatigut aningaasarsiorluarpoq, ukioq mannali 20 millionit koruunit missaannik annikillissasoq naatsorsuutigineqarpoq, ilaatigut suliniutit angisuut naammassineqarnerat pissutigalugu.
"Pituffik Space Basemi pilersuineq ingerlateqqilerumallugu 2023-p ingerlanerani Royal Arctic Linep Amerikami sakkutooqarfimmik oqaloqateqarnini annertusisimagaa" ilisimatitsissutaavoq.
Namminersorlutik Oqartussat suliffeqarfiutaat maajip 13-ianni ataatsimeersuassaaq, tassani ukiumoortumik nalunaarusiaq akuerineqassalluni.
