RAL-imi naatsorsuutit: Annertuumik amigartooruteqarnermit annikitsumik sinneqartooruteqarnermut

Namminersorlutik Oqartussat umiarsuaatileqatigiiffiutaata 2023-mi kaaviiaartitai 44 mio. kr-init 1.225 mio. kr.-inut qaffassimapput, naak assartukkat akuersissutillit ingerlanerliuleraluartut. 2023-mi februaarimi Kalaallit Nunaannit avammut assartuinermi akigititanik umiarsuaatileqatigiiffiup qaffaasimanera nassuiaataavoq, taamaalilluni umiarsuaatileqatigiiffik 44 mio. kr.-inik nassiussaminut immikkut ittumik kaaviiaartitaqarsimalluni.

- 2023-mi orsussamut akip apparnerata malitsigisaanik uuliamut aningaasallu nalinginut tapiliuttakkamut 32 mio. kr.-nik annikinnerusumik akileeqqusisoqarpoq. Taamaalilluni tamakkiisumik isigigaanni suliffeqarfiup uuliamut aningaasallu nalinginut tapiliuttakkat ilanngullugit assartuinermi useqarnermut 12 mio. kr.-nik akiligassaqarneruvoq. Tamanna 2022-mut sanilliullugu 2023-mi Royal Arctic Line aqqutigalugu nassiussanik assartuisitsinermut sullitat 1,3 %-imik akiliuteqarnerusariaqarnerannik naleqarpoq, ukioq manna angusanik ukiumoortumik nalunaarusiami, maajip 13-ianni ingerlatseqatigiiffiup ataatsimeersuarnerani saqqummiunneqartussami, ukiumoortumik naatsorsuutit akuerineqarnissaannut tunngaviusussami, allassimavoq.

Aqutsisut, pisortaaneq Niels Clemensen siuttoralugu, ukiumut angusat naammagisimaarnartutut isigaat.

Nunatta avataani aningaasat amerlanerusut

Kalaallit Nunaata avataani suliassanik suliaqarnermi umiarsuaatileqatigiiffik aningaasarsiornerulerpoq.

-  2023-mi kisermaassiviunngitsuni isertitat 2022-mi 241 mio. kr.-nit 2023-mi 257 mio. kr.-nut qaffariaateqaqqipput. 16 mio. kr.-nik qaffariarneq annermik nunatta avataani tunisinermi isertitaneersuupput, ilaatigut Islandip Skandinaviallu akunneranni usitussutsimik atorneqanngitsumik tunisinermi aammalu Malik Arcticap akunnermut akiligassiilluni attartorteqattaarneratigut, ilisimatitsissutaavoq.

2023-p ingerlanerani umiarsuaq Mary Arctica namminerlu ingerlatsinerit tunineqarput, tamannalu immikkut ittumik 20 mio. kr.-nik isertitaqarnermik kinguneqarpoq.

- Aalborgimi nammineq ingerlatsinermit Aarhusip umiarsualiviani sullinneqarnermut akiliuteqartalernermut ikaarsaarnermi, aammalu KNI/ Pilersuisup nassiussalerinermut tunngatillugu 10 mio. kr.-nik isumaqatigiissuteqarfiginera peqqutaaqataalluni, nassiussinermut tunngatillugu tamakkiisumik aningaasartuutit 2022-mut sanilliukkaanni 2023-mi 52 mio. kr.-nik qaffariaateqarput. Allannguinerup malitsigisaanik piffissami tassani terminalinut aammalu tiimimusialinnut aningaasartuutit 45 mio. kr.-nik apparput, nalunaarummi allassimavoq.

Sulisut ikinnerusut

Ukiup ingerlanerani suliffeqarfissuarmi sulisut 787-iniit 742-nut ikilisinneqarput, taamaalillunilu sulisunut aningaasartuutit 26 mio. kr.-it sipaarneqarput.

- Ingerlatseqatigiiffiup ingerlatsinerani arlalitsigut naleqqussaanerit ikiliartornermut pissutaapput, ilaatigut Kalaallit Nunaata avataani terminalimik ingerlatsiunnaarneq, niuernermik ingerlatsiviit tunineqarnerat allanillu piginnaaneqarnerulersitsiniarluni iliuuseqarneq, nassuiarneqarpoq.

"Naak nutaanik umiarsualiortitsinermut akiitsoqaraluartoq, erniat inissisimanerisa qaffakkiartornerat suliffeqarfimmut pitsaanngitsumik sunniuteqanngitsoq", umiarsuaatileqatigiiffik allappoq. Suliffeqarfiup nutaanik umiarsuarsinermi aningaasaliissutit 2022-p qeqqata tungaanut appasissorujussuarnik erniaqartinneqarnerat pissutaavoq, suliffeqarfiup taarsigassarsiaanut tunngatillugu agguaqatigiisitsinermi erniaq 2,6 %-imi inissisimalluni, "massakkut erniat inissisimaffigisaannut sanilliutissagaanni appasingaatsiartumiilluni".

Akiitsut appariartut

Suliffeqarfiup akiitsui sivisuumik taarsersugassat 2023-p naalernerani 576 mio. kr.-upput. 2022-mut sanilliukkaani 65 mio. kr.-nik appariarsimallutik.

Ukioq manna naatsorsuutit akileraarutit suli ilanngaatiginagit 0 aamma 10 mio. kr.-it akornanni inerneqarnissaat naatsorsuutigineqartoq, umiarsuaatileqatigiiffiup ilisimatitsissutigaa.