Innuttaasunik ataatsimiisitsinissaq Naalakkersuisut facebookimi qupperneranni aamma KNR-ikkut nalunaarutigineqarpoq, taannalu inatsimmut tunngaviusussamut missingiut pillugu ataatsimiititseqattaarnissami siullerpaalluni.
Inatsimmut tunngaviusussamut missingiut Ilisimatusarfimmi nalliuttorsiorpalaartumik inatsit tunngaviusoq pillugu ataatsimiititaliarsuarmit 2023-mi apriilip 28-anni tunniunneqarpoq Naalakkersuisut siulittaasuannut Múte B. Egedemut tunniunneqarpoq. Tassani qullermik ikitsisoqarpoq, qilaatersortoqarluni politikerillu assuarlutik.
ALLASERISAQ PINGAARNERUTITAQ
Una Sermitsiami nr. 32-mi allaaserisatut pingaarnerutitatut allaaserisaavoq.
Innuttaasunik ataatsimiisitsinissaq Naalakkersuisut facebookimi qupperneranni aamma KNR-ikkut nalunaarutigineqarpoq, taannalu inatsimmut tunngaviusussamut missingiut pillugu ataatsimiititseqattaarnissami siullerpaalluni.
Inatsimmut tunngaviusussamut missingiut Ilisimatusarfimmi nalliuttorsiorpalaartumik inatsit tunngaviusoq pillugu ataatsimiititaliarsuarmit 2023-mi apriilip 28-anni tunniunneqarpoq Naalakkersuisut siulittaasuannut Múte B. Egedemut tunniunneqarpoq. Tassani qullermik ikitsisoqarpoq, qilaatersortoqarluni politikerillu assuarlutik.
”Uagut, inuiaat kalaallit, nunagisatsinni Kalaallit Nunaanni, tamakkiisumik pisinnaatitaaffivut ingerlappavut, naalagaaffiullu aqunneqarneranut aaqqiissuussaaneranullu malittarisassat uku inuiaat kalaallit naalagaaffiannut namminersortumut Kalaallit Nunaannut inatsisitut tunngaviusutut matumuuna aalajangersarlugit.”
Kalaallit Nunaata inatsisissaanut tunngaviusumik siulequtaani taama allassimavoq. 49-nik paragrafilik 15-inik quppernilik, inatsimmut tunngaviusussamut nassuiaat ilanngullugu, aamma ilanngussaqarluni, taakkununngalu suliassiissutigineqartut sisamat ukiut tallimat ingerlaneranni isumalioqatigiissitap sulineranut tunngaviusut ilaalluni. Inatsimmut tunngaviusussamut missingiut katillugit kalaallisut 299-inik qallunaatullu 278-inik quppernilik – katillugit 577-inik quppernilik inuiaqatigiinnullu 30 millionit koruuninik akeqarsimavoq.
Pilersaarutaajuaannarsimavoq innuttaasut inatsimmut tunngaviusussamik suliaqarnermut peqataatinneqarnissaat, nunarsuarmili nappaatip tunillaassuuttup nalaani angalanissamut killilersuinerit pissutigalugit tamanna piviusunngunngilaq. Innuttaasut inatsimmut tunngaviusussamut siunnersuut saqqummiunneqassaaq, innuttaasullu ataatsimiinneranni isummersortoqassalluni.
Atuarsimanngisamulli isummernissaq ajornakusoortorujussuuvoq. Ilisimatuut allallu inatsit tunngaviusumik siunnersuut pillugu soqutiginnittut qularnanngitsumik atuarsimassavaat, innuttaasup nalinginnaasup atuarsimassagaa ilimanarani. Inatsimmut tunngaviusussamut siunnersuut atuaruminartoq neriorsuutaanikoq innuttaasunik ataatsimiititsinermi takussaanngilaq, nittartagarlu tassannga aallerfiusinnaasoq suli naammassineqarani. Taarsiullugu innuttaasut ataatsimiinnermut takkuttut 50-it missaanniittut nittartakkamut atulertussamut nutaamut saqqummiiffigineqarput, apeqqutinullu marlunnut akeqquneqarlutik. Apeqqutit nunatsinni qanoq ataatsimoorfeqarnermut taavalu suut naligiiffigineqarnerannut, kulturikkut pingaartitanik inatsimmut tunngaviusumut ilanngunneqarsinnaasunut tunngapput. Taavalu inatsisissaq qanoq illersorneqarsinnaanersoq.
Arlaatigut ajortoqarpoq. Vivian Motzfeldt piareersimanngikkaluarluni tatineqarnini pissutigalugu innuttaasunik ataatsimiititsilersimavoq, imaluunniit pilersaarusiornerlunneruvoq. Innuttaasunik ataatsimiititsinerit qanoq ingerlassanersut innuttaasullu nalinginnaasut inatsimmut tunngaviusussamut qanoq peqataatinneqarnissaannik pilersaarusiortoqarani. Aallaqqaataaniit aallartittoqassappat innuttaasunut naapertuilluartuliornerunanilu ataqqinninnginneruvoq. Innuttaasunik ataatsimiititsinerit taama ingerlaniarpata taamaattoqassagami. Inatsit tunngaviusussaq sunik imaqarnersoq innuttaasuniillu suna ujartorneqarnersoq nassuiarneqanngilaq oqaluttuarineqaranilu, inatsimmilu tunngaviusussamut suut ilanngunneqassanersut taamaallaat apeqqummut akissuteqartoqarluni.
Innuttaasut ataatsimiinnerisa siunertaviannik naliliinissaq ajornakusoortorujussuuvoq. Innuttaasunik ataatsimiititsineq iluatsinngilaq pitsanngorsaannarneqarsinnaallunilu.
A usi, takkuttunut qungasequtit polyesteriusut kuglepennillu tunissutigineqarput.
