Ammaanersiorneq nalliussineqartoq: Iqalunnut aqqut ullumi ammaqqinneqarpoq
Nuummit Canadami Iqalunnut timmisartuussisoqaqqilernera Nuummi timmisartoqarfiup illorsuaartaavani Iqaluillu mittarfiani kulturikkut aaqqissuussinernik malunnartinneqarpoq. Air Greenland sapaatip-akunneranut ataasiarluni oktobarip 23-ata tungaanut timmisartuussisassaaq.
Ullumi pingasunngornermi juunip 26-ani Nuup Canadamilu Iqaluit akornanni Air Greenlandip timmisartuussineq ammassavaa. Siornatigut aqqut taanna atorneqartarsimavoq, ukiulli qulit missaanni atorneqarsimanani.
Ammaanersiorluni nalliuttorsiorneq Nuummi timmisartoqarfiup illorsuartaavani pissaaq, tassanilu Air Greenlandip siulersuisuini siulittaasoq Malik Hegelund Olsen aamma Naalakkersuisoq (atissaa suli oqaatigineqanngilaq) oqalugiassallutik.
Iqalunnut nalunaaqutaq 14.55 aallartoqannginnerani Air Greenland kaffillerlunilu kaagillerpoq, Nuummilu kulturikkut aaqqissuussisoqassaaq.
Nunat imminnut qaninnerulerput
Nuuk-Iqaluit aqqutaata ammarneqarnera Nunavup Kalaallit Nunaatalu 2022-mi suleqatigiinnissamut isumaqatigiissutaannut atatillugu pivoq. Isumaqatigiissummi kulturi, ilinniartitaaneq, aalisarneq, mingutsitsinngitsumik nukissiorneq minnerunngitsumillu angallannerup pitsaanerulersinnissaa pillugit isumaqatigiissuteqartut suleqatigiinnerulerusupput.
Air Greenlandip pilersaarutigaa aqqut taanna oktobarip 23-ata 2024-p tungaanut ammatinniarlugu.
Iqalunnut mittoqarpat aamma aaqqissuussisoqassaaq, tassani Canadian North timmisartoqarfiup silataani grillerititsissalluni kulturikkullu sammisaqartitsissalluni, soorlu nipilersortoqarlunilu aliikkusersuisoqassalluni.
Aamma tassani Naalakkersuisut ilaat aamma Nunavummit naalakkersuisut ilaat oqalugiassaaq. Iqaluit borgmesteriat, Air Greenlandimit sinniisoq aamma Canadian Northimillu sinniisoq aamma oqalugiassapput.
Air Greenlandip timmisartua Dash 8 Iqalunnit Nuummut nalunaaqutaq 16.00 utissaaq, nalunaaqutarlu 20.00 qaangilaaraa Nuummut tikissalluni.
ICC-mi nuannaarutaasoq
Inuit kattuffianni ICC-mi siulittaasup Sara Olsvigip aqqutip ammarneqarnera nuannaarutigeqaa.
Nunat Davisstrædemiittut imminnut qaninneruleriartortut oqarpoq:
- Inuit Nunaat akimorlugit ingerlasinnaanerup attaveqatigiinnerullu annerulernissaa ICC-p 1977-imili pilersinneqarneranilli ukiuni arlalippassuarni ICC-imit kaammattuutigisarsimavarput. Nuup Iqaluillu akornanni timmisartuussisoqaqqilernera nuannaarutigeqaarput.
- Inuttut ilaqutariittullu nunat akornanni qanimut attaveqatigiittoqartoq, tamatumalu attatiinnarnissaanut ullumikkut angallannikkut periarfissat akunnattoortitsisinnaasut nalunngilarput, tusagassiuutinut nalunaarummi Sara Olsvig oqarpoq.
Inuit akunnerminni attaveqatigiinnerisa nukittunerulernerata saniatigut kulturikkut, isumaginninnikkut, ilinniartitaanikkut, aningaasaqarnikkut inuussutissarsiornikkullu suleqatigiinnermut annerusumut timmisartukkut attaveqaqqilerneq aqqutissiuussissasoq ICC-mit neriuutigineqarpoq.
- Aqqutip ammaqqinneqarnera toqqammavissagissaarluni atajuarumaartoq, taamalu Inuit Nunaanni imminut ataqatigiinnermik annerusumik pilersitsiumaartoq ICC-p neriuutigaa, Sara Olsvig oqarpoq.
