Anaanaasoq mianersoqqusisoq: Meeraq meeqqerivimmi kimmarneqartoq
Septembarip qiteqqunnerani sisamanngornerugaa ulloq Ellamut, ataatsimik affarmillu ukiulimmut, meeqqerivimmi ulloq nalinginnaassusaagaluarpoq. Ellali arlaleriarluni meeraqatiminiit kiinakkut timikkullu kimmarneqarmat Ellamut anaanaanullu ulloq amiilaarnartuuvoq. Kimmartinneri ima sakkortutigipput, allaat aseruuttuunnginniassammat nakorsaaserneqartariaqarluni.
Meeraq meeraaqqerivimmiittoq kiinnamigut timimigullu kimmarneqarsimangaarmat antibiotikamik katsorsarneqartariaqarsimavoq.
Trine Juncher Jørgensen
OBS: Allaaserisami assit atuartut ilaannut sakkortusinnaapput.
Anaanaasup panini, Ella ataatsimik affarmillu ukiulik meeraaqqerivimmut aagamiuk assut tupappoq.
Paniatami uluaani, siutaani talianilu kimmartinnerit ersarissut takuneqarsinnaapput.
- Ellaatinnguara sisamanngornermi meeraaqqerivimmiinnermini quleriarlugu aqqanileriarluguluunniit meeqqamit allamit meeraaqqerivimmi maani Nuummiittumi kimmarneqarsimavoq. Kimmarneqarnera ima sakkortutigivoq, allaat pencillininik nakorsaasertariaqarluni, kimmarnerit aseruutinnginniassammata, Sika Nielsen Lange, Ellamut anaanaasoq oqaluttuarpoq nangillunilu:
- Meeqqerivimmut aallugu anaanatut annernartorujussuuvoq meerarisaq kimmarneqarsimasoq takullugu, nipaannerani malugisinnaallugu qanoq inuttaanut sunniuteqarsimanersoq, taavalu unnuakkut tupalluni nilliallunilu iteqattaartoq takusinnaallugu annernartorujussuuvoq.
Sivisuumik kimmarneqartoq
Sika Nielsen Langep oqaluttuai naapertorlugit kimmaaneq meeqqerivinni sulisussaaleqinermut peqqutaavoq.
Meeqqap ataatsimik affarmillu ukiullip kiinaa timialu arlaleriarluni kiineqarpoq sulisut meeqqanik allanik isumassuineranni. - Sulisunik amigaateqarneq ernumanartorujussuuvoq, tamannalu meeqqanut angajoqqaanullu sunniuteqarpoq, anaanaasoq oqarpoq.
Foto: Sika Nielsen Lange
Meeqqerivik Sika Nielsen Langemut nassuiaavoq piffissami tassani sulisoq ataaseq pikkorissariarsimasoq, aappaa ataatsimiigiarsimalluni pingajuallu meeqqamik aneerussuvimmi sinnassaasimalluni.
- Meeqqerivimmi sulisorpassuaqarpoq pikkorissunik isumassuilluartunik, kisianni assut ilungersorput. Taartaasut aggerlutillu ingerlasarput sulilivinngisaannarlutillu, tamanna meeqqanut angajoqqaanullu atugarliortitsisarpoq. Meeqqat sulisussaleqinerup kingunerisaanik kisimiitinneqartariaqarnerat ajorpoq, Sika Nielsen Lange oqarpoq.
- Paniga meeqqamit allamit piffissami sivisuumi kimmarneqarsimavoq - aatsaat sulisoq alla inimut isermat kimmaaneq unitsinneqarpoq. Paniga nilliallunilu qiangaatsiarsimassaaq. Tamanna eqqarsaatigiinnarlugu oqimaappoq, Ellamut anaanaasoq oqarpoq.
Sulisussaaleqineq
- Erseqqissarusuppara panimma meeqqeriviani inimi sulisut pingasuusut aalajaatsuusut nuannaarutigalugit, aamma nalunngilara aqutsisoq sulisussaaleqineq iliuuseqarfiginiarlugu taartaasussanik ujarlertoq.
Isumaqatigiissut nutaaq apriilit aallaqqaataanit 2020-mit marsip 31-aniani 2024-ip tungaanut atuuppoq. Tassani inimi perorsaasumut tapit 13 %-imik qaffanneqarnikuupput. Tamanna isumaqarpoq qaammammut 2.500 koruuninik qaffattut. Taava qaammammut inimi perorsaasoq skatsi peernagu 22.945,14 koruunisisalerpoq.
- Kisiannimi kialluunniit akissarsiakitsilluni, ajunngitsorsiassaqartinnani aamma qaangiuttoorsinnaatitaanani sulinissaq nuannarinngilaa. Kommuni sipaarniarfigineqangaatsiarpoq, tamannalu eqqunngitsuliorneruvoq! Meeqqat suliffippassuillu eqqugaaqqapput, angajoqqaajusut meeqqaminnik paaqqinnittarfinnut sulisussameertunut tunniussisinnaannginnertik pillugu suliartosinnaannginnamik.
- Tamanna ajornartorsiutaajuaannartoq iliuuseqarfigineqartariaqarpoq, Sika Nielsen Lange naggasiivoq.
Kommuneqarfik Sermersooq pisimasoq pillugu ataatsimullu isigalugu meeqqerivinni sulisussaaleqineq pillugu Sermitsiaq oqaaseqartitsiniarluni sulissuteqarpoq.
