Angajoqqaat angerlarsimaffeqanngitsut meeqqatik tigoqqinniassammatigit initaartinniarneqartut

Meeqqanik angerlarsimaffiup avataanut inissiinermut aningaasartuutit 2020-miilli 35 procentinik qaffariarsimapput. Aningaasaqarnermut naalakkersuisup, Múte B. Egedep (IA), 2026-mut aningaasanut inatsisissatut siunnersuut saqqummiunnerani tamanna oqaluttuaraa.

Kommunit meeqqanik angerlarsimaffimmut inissiisarneranni aningaasartuutit qaffakkiartornerat pissutigalugu Naalakkersuisut nutaamik iliuuseqarniarsariniarput.

Kommuneqarfik Sermersuumi tamanna siunertaralugu iliuuseqartoqarpoq.

Suliniummi angajoqqaat angerlarsimaffeqannginnertik pissutigiinnarlugu meeqqaminnik arsaagaasimasut initaarnissaat siunertaavoq.

- Suliniut aallartinneqarpoq meeqqat aaqqissuussaasumik angerlarsimaffeqanngitsuuneq pissutigalugu inisseqqaannannginnissaat qulakkeerniarlugu – aamma meeqqap ilaqutariittut inuuneqarnissamut pisinnaatitaaffeqarnera tapersersorniarlugu, aqutsisoqarfik suliniummut tunngatillugu allappoq.

Angajoqqaat qulingiluat 17-inik qitornallit

Meeqqat angajoqqaaminnut nooqqissappata angajoqqaat qulingiluat, katillugit 17-inik meerartallit, Nuummi initaarnissamik pisariaqartitsisut aqutsisoqarfimmit paasineqarpoq. Tamanna kommunimi Meeqqanut, Ilaqutariinnut Atuarfeqarnermullu Ataatsimiititap sapaatip akunnerani matumani ataatsimiinnerani oqaluuserisassani atuarneqarsinnaavoq.

Meeqqap ilaqutariittut inuusinnaatitaaneranik tapersersuineq suliniutip pingaarnertut siunertaagaluartoq aningaasanik aamma sipaartoqarsinnaasoq, aqutsisoqarfimmit nalilerneqarpoq:

- Utaqqiisaasumik inimik attartortitsinermut aningaasartuutit (ukiumut 120.000-180.000 koruunit missaanniittut) ulloq unnuarlu angerlarsimaffimmut inissiinermit (meeqqamut ataatsimut ukiumut 1- 1,2 mio. koruunit missaanniittunit) ikinnerungaatsiarput.

- Ilaqutariinnik ataasiinnarnik marlunnik meerartalinnik angerlartitsinerup aningaasartuutit ukiumoortumik 2 mio. koruuninik ikinnerulersissinnaavai., aqutsisoqarfik suliniut pillugu allappoq.

Nuummi inissanik pissarsinissaq aqutsisoqarfimmit iluatsinneqarpoq, meeqqallu angerlarteqqinnissaannut suliat aallartinneqareerlutik. Iliuuseqarneq iluatsilluartutut maanna nalilerneqarpoq.

Tasiilami inissaaleqineq akimmiffiusoq

Kommunip illoqarfiini allani aamma iliuuseqartoqarpoq. Tasiilami meeqqanut 39-nut angerlarsimaffiup avataanut inissinneqartunut angajoqqaajusut 16-it immikkoortortaqarfimmit toqqarneqarsimapput.

Tasiilamili inissaaleqineq ajornartorsiutaavoq, taamaattumik ilaqutariit taakkua utaqqiisaasumik ataavartumillu initaarnissaannut periarfissat ajornakusoornerullutik. Ingerlatsiviulli Iserit A/S qanimut suleqatigalugu aaqqiissutissarsiorpoq.

Kommunimi tamarmi angajoqqaat 27-t, katillugit 60-inik meerartallit, angerlarsimaffeqannginnertik pissutigalugu arsaagaasimasutut nalunaarsorneqaqqapput.