KOMMUNEQARFIK SERMERSOOQ
Angalanissamut Aningaasaateqarfimmut qinnuteqartoqarsinnaanngorpoq
Innuttaasut tamarmik maanna angalanissamut legatimik qinnuteqarsinnaalerput, kisianni eqqumaffigisassat tassaapput ilaqutariit meerartallit isertitakinnerusullu, ukiuni tallimani angalasimanngitsut pingaarnersiuinermi sallersaassasut.
Kommuneqarfik Sermersuumi innuttaasuuit? Immaqa illit ilaquttatillu Nuummit Europamut Tuukkaq ilaaffigalugu toqqaannartumik angalassallusi imaluunniit nunatta iluani angalanissassinnut toqqagaasinnaavusi, Kommuneqarfik Sermersuumiit 2025-mut angalanissamut aningaasaateqarfimmit akiliunneqarlusi.
Assiliisoq: Leiff Josefsen
Kommuneqarfik Sermersooq, ukiut tamaasa upernaajunerani angalanissamut legatinik agguaassisartoq nalunaaruteqarpoq 2025-mut angalanissamut aningaasaateqarfimmit qinnuteqarsinnaaneq ammaanneqartoq.
Kommuni paasissutissiivoq aningaasaateqarfiup siunertarigaa sumiiffimmi ataasiinnavissuarmi inisseqqasarnerup kingunerinik nuanniissinnaasunik pinaveersaartitsineq. Aammali kommunimi innuttaasut nunarsuarmioqataanermik misigisimanissaannik siunertaqartumik Kalaallit Nunaani avataanilu innuttaasut angalarusunnermik kissaateqarnerannik piviusunngortitsinissamut tapersiinissaq.
Innuttaasut tamarmik qinnuteqarsinnaapput, kisianni ilaqutariit meerartallit isertitakinnerusullu salliunneqassapput
Kommuneqarfik Sermersuumi innuttaasut tamarmik aningaasaateqarfimmut qinnuteqarsinnaatitaapput. Kommuni neriorsuivoq qinnuteqartut tamarmik pimoorussamik naliliiffigineqassasut angalanissamut legatip siulersuisuinit.
Kommunip maluginiaqquaa ilaqutariit meerartallit isertitakinnerusullu aammalu ukiuni tallimani kingullerni angalasimanngitsut pingaarnersiuinermi salliutinneqarumaartut.
Qinnuteqartut tamarmik toqqaannartumik nalunaarfigineqassasut, kommuni neriorsuivoq aammalu naggataatigut tusagassiuutitigut nalunaarummini erseqqissaatigalugu qinnuteqarfissaq kingulleq tassaasoq tallimanngorneq januaarip 15-at 2025.
