KL

DK

Angallannermut ministerip qallunaat kalaallillu biilersinnaanermut allagartaasa assigiinngissutaat illersorpaa

Danmarkimi innuttaasut kalaallit biilersinnaanermut allagartallit 70-ileereerunik biilersinnaajumallutik nakorsamit uppernarsaammik pisariaqartitsipput. Folketingimut ilaasortaq Aaja Chemnitz naapertorlugu tamanna assigiinngisitsineruvoq, angallannermulli ministeri naapertorlugu tamanna paasiuminarpoq.

Politikeri saamerlermeersoq Thomas Danielsen 2022-miilli Danmarkimi angallannermut ministeriuvoq.
Morten Okkels Tusagassiortoq
Saqqummersinneqarpoq

Danmarkimi biilersinnaanermut allagartaqarneq 70-inik ukioqalernermi atorunnaartarpoq, nutaamillu allagartaqalernissaq pisariaqartarpoq. Atuunnerata sivitsornissaanut nappaateqannginnermut allagartaq pisariaqartarpoq. Danmarkimili biilersinnaanermut allagartaqartut taamaaliortariaqanngillat.

Tamanna Danmarkimi kalaallinut innuttaasunut sumiginnaanermik assigiinngisitsinermillu ersersitsivoq, tamannalu danskit naalakkersuisuisa aaqqinniartariaqarpaat, folketingimi ilaasortaq Aaja Chemnitz (IA) isumaqarpoq.

Taamaakkaluartoq Danmarkimi angallannermut ministerip Thomas Danielsenip (V) isumaa ingerlaannaq allanngunngilaq. Folketingimi ilaasortamut Aaja Chemnitzimut akissummini oqaatigaa qallunaat kalaallillu biilersinnaanermut allagartaat immikkut nalunaarummik peqartut:

- Taamaattumik inatsisit assigiinngitsut marluk pineqarput, taakkulu arlalitsigut assigiinngissuteqarput. EU-p biilersinnaanermut allagartaqarnermut malittarisassaanik malinninnissamut Danmark pisussaaffeqarpoq, tamannalu Kalaallit Nunaannut atuutinngilaq, Kalaallit Nunaat EU-p avataaniimmat. Taamatuttaaq Kalaallit Nunaanni Danmarkimilu pissutsit assigiinngissuteqarput, taamaattumillu biilersinnaanermut allagartaqarnermut tunngatillugu inatsisit soorunami aamma assigiinngissuteqarput.

Malittarisassat kalaallinut biilersinnaanermut allagartalinnut tamanut atuupput, inuiaassuseq innuttaassuserlu apeqqutaatinnagit, ministeri tikkuaavoq naggataatigulli periarfissamik ammaassivoq.

- Namminersorlutik Oqartussat angallannermut tunngasunik kissaataannik oqaloqatigiinnissamut piareersimajuaannarpunga, Namminersorlutillu Oqartussat saaffiginnippata kalaallit biilersinnaanermut allagartaasa atuuffiisa nutarterneqartarnerisalu pillugit malittarisassat allanngortinneqarnissaannut kissaateqarlutik, soorunami oqaloqatigiinnissamut ammavunga, Thomas Danielsen oqarpoq.

biilersinnaanermut allagartaq aaja chemnitz inuiaqatigiit kalaallit nunaat danmark thomas danielsen

ATORFIIT Se alle jobs

Powered by Labrador CMS