MOTOORI
Biilersinnaanermut allagartalinnut app-i kalaallinut atorneqarsinnaanngitsoq
Danmarkimi Digitalinngortitsinermut Aqutsisoqarfik biilersinnaanermut allagartanut app-imik 2020-mi saqqummersitsivoq, taamaalilluni biilersinnaanermut allagartaq biilinut nassartariaqarunnaarluni. Kalaallisulli biilersinnaanermut allagartaqaraanni app-i taanna atorneqarsinnaanngilaq, tamannalu Inuit Ataqatigiit sinnerlugit Folketingimut ilaasortap tupigusuutigaa
2020-miilli qallunaat biilersinnaanermut allagartatik biiliminnut nassartariaqarunnaarpaat, taarsiulluguli biilersinnaanermut allagartamut app-imik atuisinnaalerput. Kalaallilli biilersinnaanermut allagartaat app-imi atorneqarsinnaanngillat, digitalinngortitsinermut ministeri Marie Bjerre ilisimatitsivoq.
Torben Klint
2020-mi
biilersinnaanermut allagartanut ilassutitut biilersinnaanermut allagartanut
app-imik Digitalinngortitsinermut Aqutsisoqarfik saqqummiussivoq. Taamaalillutik
mobiilikkut app uppernarsaatitut qallunaat takutissinnaagunikku,
biilersinnaanermut allagartaq angerlarsimaffimminni
toqqorsivimmiitissinnaalerpaat.
Kalaallilli
biilersinnaanermut allagartaat Danmarkimi atuukkaluartut, marloriarlunilu
biilernermik ilinniartinneqareernerup kingorna qallunaatut biilersinnaanermut
allagartatut nalilerneqartaraluartut, innuttaasut kalaallit biilersinnaanermut
allagartanik piginnittut allagartaminnik elektroniskimik
nalunaarsuisinnaanngillat. Tamanna Inuit Ataqatigiit sinnerlugit Folketingimut
ilaasortap Aaja Chemnitzip tupigusuutigaa, kalaallisullu biilersinnaanermut
allagartaq app-imut ilanngunneqarsinnaanersoq taassuma digitalinngortitsinermut
ministeri Marie Bjerre (V) aperisimavaa, taamaalilluni Naalagaaffeqatigiinni
innuttaasut tamarmik uppernarsaatinik takutitsinissamut assigiimmik
periarfissaqalissammata.
–
Kalaallit biilersinnaanermut allagartaat app-imi
ilanngunnissaat maannakkut pilersaarutaanngilaq. Biilersinnaanermut allagartamut
pioreersumut ilassutaasumut kalaallisut biilersinnaanermut allagartallit
app-imut atassuserneqarsinnaanissaannut kiisalu teknikkikkut inatsisitigullu
piumasaqaatit sukumiisumik misissoqqaartariaqarput.
App-eq Danmarkimi biilersinnaanermut allagartanik
nalunaarsuisarfimmut teknikkikkut atassuserneqarsimammat, tamanna pissutigalugu
sutigut aaqqissuussamik allannguisoqartoqartariaqarnersoq erseqqinngilaq.
App-imut kalaallisut biilersinnaanermut allagartallit ilanngunneqassappata, inatsisitigut
allannguisoqartariaqarnersoq paasiniartariaqassaaq, Marie Bjerre, Digitalinngortitsinermut
Aqutsisoqarfimmit paasissutissanik akissuteqarnissaminut aallersimasoq,
allappoq.
Biilersinnaanermut allagartamik taarsiineq
Kalaallilli
Danmarkimi najugaqartut biilersinnaanermut allagartallit Danmarkimi
biilersinnaanermut misilitsinnermikkut allagartaq taarsertissinnaagaat,
ministerip akissutini nangippaa.
-Tamatuma
kingorna biilersinnaanermut allagartaqartup aamma
app atorsinnaavaa, Kalaallit Nunaannit Danmarkimiilluunnit passeqaruni.
Innuttaasut
kalaallit biilersinnaanermut allagartaannik piginnittut Danmarkimi
biilersinnaanermut allagartamut taarsiititsinngikkunik, app-imik
atuisinnaanerat pillugu piumasaqaatit qanoq kinguneqassanersut teknikkikkut
inatsisitigullu apeqqutit arlallit suli akineqannginnerat, Marie Bjerrep
tusaatissatut tiguaa.
- Taamaakkaluartoq
apeqquteqartoq oqaloqatigilluarusuppara, Marie Bjerre naggasiivoq.
