KL

DK

Anna Wangenheim: Naalakkersuisut nipaarsaarussipput

Nakorsat pingaaruteqarluinnartut atorfiinik atorunnaarsitsinermut allaffeqarfiullu atuivallaarneranut Naalakkersuisut isertuussipput, Anna Wangenheim, peqqissutsimut tunngatillugu Demokraatit oqaaseqartartuat isumaqarpoq.

Anna Wangenheim
Anna Wangenheim
Dorthea Reimer-Johansen
Journalist
Offentliggjort

Qaanaami, Upernavimmi, Uummannami, Qasigiannguani, Qeqertarsuarmi, Maniitsumi, Paamiuni, Ittoqqortoormiini, Narsami, Nanortalimmi aamma Qaqortumi aalajangersimasumik nakorsaqanngilaq.

Piffissami aatsaat taama peqqinnissaqarfiup ilungersornartorsiorfiani, Naalakkersuisut isummerfigisassat pingaaruteqarluinnartut, innuttaasut inuunerannut toqqaannartumik sunniisussanut ammasussaagaluarnermik ingalassimaartitsisut, Anna Wangenheim (D) isumaqarpoq.

Taanna isumaqarpoq allaffissornerup annertusigaluttuinnarnerani nakorsatut atorfiit allallu atorfiit pingaaruteqartut atorunnaarsinneqartut.

- Annilaarnarpoq, nunap ilaani aalajangersimasumi nakorsaqannginnera, taassumalu soorunalimi sulisunut sinnerinut sunniuteqarnerlulluni. Naalakkersuisut qanoq ilillutik qulakkeerusuppaat, sulisut suliassatut aalajangersarneqarsimasut iluanni suliinnarnissaat, akilerneqaratik piumaffigineqarnerisa saniatigut, aammalu sulisinnaanermut akuersissutitik annaanngikkaluarlugit?, Anna Wangenheim aperivoq.

Allaffeqarfimmi sulisunik atuivallaarneq

Anna Wangenheim isumaqarpoq Naalakkersuisut aatsaat taama qaffasitsigisumik atuisoqarnissaanik aammalu aningaasanik atugassanik sippuisoqarnissaanik akuersisimasut, naak allaffeqarfimmi sulisunut aamma taartaagallartutut tikisitanik taaneqartartunut nakorsiartarfinni sulisunut kingunissaasut imaannanngikkaluaqisut. Sulisut aalajangersimasut, peqqinnissaqarfimmi toqqammaviusut, naammattumik illersorneqarnissaat tapersersorneqarnissaallu qulakkeeqqaarnagu.

- Aalajangersimasumik sulisorisat sumiginnarneqarput siunissartik qanoq ingerlassanersoq ilisimanagu, tamannalu peqqinnissaqarfimmi sulisut akornanni nalorninermik pakatsinermillu pilersitsilluni

Aaqqiinissamut qununeq peqqinnissarlu pillugu inatsit

Naalakkersuisut aaqqiinissamut qununermik takutitsipput peqqinnissaq pillugu inatsisip ammasumik oqallinnissaq pinngitsoortikkamikku, Anna Wangenheim isumaqarpoq.

Taannami isumaqarpoq peqqinnissaq pillugu inatsisip siunertarigaa innuttaasut assigiimmik peqqinnissaqarfimmut saaffiginnissinnaanerat, tamannali angorusutaq ulorianartorsiornerarpaa. Naalakkersuisut peqqinnissakkut sullissineq pillugu allakkiaq tamakkiissoq allanngortinneqartussaq suli saqqummiutinngimmassuk soorlu peqqinnissaq pillugu isumaqatigiissutigineqartumi aalajangerneqartoq.

- Allannguummik taamaattumik saqqummiisoqanngippat imaariaannaammat, peqqinnissaq pillugu inatsimmi anguniakkat innuttaasut naatsorsuutaannut pisariaqartitaannullu naapertuutinngittut, Anna Wangenheim tusagassiuutitigut nalunaarummi allappoq.

Aaqqiissutit attanneqarsinnaanngitsut

- Naalakkersuisut oqaluttuarissallugu amigaatigaat, aqutsisoqarfiup atorunnaarsinneratigut aammalu nutaamik ingerlatsinermik pilersitsinikkut, pisortamik atorfinitsitseqqinnermik, pisortallu tullersortissamik aammalu peqqissaasunut pisortap ilaneqarnissaa, aammalu peqqissutsimut Naalakkersuisoqarfimmi annertusaanissaq allaffimmi sulisut ilanerisigut, sunik kinguneqassanersoq, ulluinnarni passussinermi sulisorisanit aningaasanik aallernermi.

Innuttaasut peqqinnissaqarfitsik qanoq aqunneqarnersoq paasitinneqarsinnaasariaqartut, Anna Wangenheim naqissusiivoq.

- Naalakkersuisut kajumissaarpagut akisussaaffimmik tigusissasut peqqinnissaqarfimmut tunngasunik ersarissumik isummissasut. Pisariaqarpoq ersarissumik pilersaarummik saqqummiisoqarnissaa, qanoq ililluta peqqinnissaqarfiup pitsaassusaata attannissaa pitsanngorsarnissaalu angusinnaaneripput, sulisut passusisartuusut, peqqinnissaqarfitsinni qasusuillutik sullissisut, pilliutiginngikkaluarlugit.

Anna Wangenheinip isornartorsiutaanut Peqqissutsimut Naalakkersuisoq akitinnissaanut Sermitsiaq sulissuteqarpoq.

lægemangel inuiaqatigiit sundhed samfund

ATORFIIT Se alle jobs

Powered by Labrador CMS