Anorersuartussaammat marlunngornermi timmisartuussinissat taamaatiinnarneqarput
Nuummi marlunngornermi silarlussaaq. Taamaammat ualikkut timmisartuussinissaraluit taamaatinnarneqarput.
Nuummi marlunngornermi ualikkut anorersuartussaammat timmisartuussinissaraluit taamaatiinnarneqarput.
Assi: Emil Nørgaard Stach
Nuummi aqagu anorlernissaa imaliliornissaalu aarlerisaarutigineqarpoq. Taamaammat nunap iluani ualikkut timmisartuussinissat taamaatinneqarput.
Air Greenland nittartakkamini allappoq.
Angalasussat eqqugaasut pilersaarummik nutaamik ullumi nalunaaqutaq sisamanngortinnagu tunineqassapput.
- Angalasut unnuiffissamik pisariaqartitsisut aqagu marlunngornermi nalunaaqutaq ullup qeqqata kingorna mittarfimmut takkunnissaat qinnuigissavagut, tamatumalu kingorna nalunaarsorneqassammata akunnittarfimmut inissanut nerisassanullu akiliutissamik tunineqassallutik, Air Greenland allappoq.
Akunnittarfinni inissat killeqarmata nammineq unnuiffissarsisinnaasut taamaalioqqullugit kaammattorneqarput.
Billetsimik utertitsisoqarsinnaasoq
Angallannermut Aqutsisoqarfiup killilersuutai nutaat pissutaallutik timmisartuni inissat piffissami matumani ingerlaannaq ulikkaartarput. Taamaammat angalanissamut pilersaarut nutaaq pinartoqarneranik takussutissaqanngikkaanni allanngortinneqarsinnaanngilaq. Soorlu toqusoorsimagaanni napparsimagaanniluunniit.
Kinguaattoorneq pissutaalluni angalanissamut siunertaq inortoraanni billetsi aamma utertinneqarsinnaavoq - billetsinut allanngortinneqarsinnaanngitsunut taanna aamma atuuppoq.
Immikkut ittumik ulappunneq peqqutigalugu sulisullu ulluni makkunani pisarnerminiit ikinnerunerat peqqutigalugu suliassanngortinnera sivisunerulaarsinnaavoq.
- Ajuusaarutigaarput ajornakusoortitsisimassagutta naammagittarnissinnulli paasinninnissinnullu qujavugut, Air Greenland allappoq.
