Nuummi mittarfissuarmi malittarisassat nutaat unammillernartut atuutilerput. Mittarfinnik nakkutilliisup Trafkstyrelsenip nalunaaquttap akunneranut timmisartut qanoq amerlatigisut mittarfimmi sullinneqarsinnaanerat killilerpaa. Sullissineq ataaseq tassaavoq timmisartup qangattarnera imaluunniit minnera.
Timmisartuutileqatigiiffik naapertorlugu killilersuinerit nutaat ingammik nunap iluani timmisartuussinernut annertuumik kinguneqarumaarput. Ajornartorsiut Air Greenlandip siulliulluni tallimanngormat saqqummiuppaa.
Nuummi mittarfissuarmi malittarisassat nutaat unammillernartut atuutilerput. Mittarfinnik nakkutilliisup Trafkstyrelsenip nalunaaquttap akunneranut timmisartut qanoq amerlatigisut mittarfimmi sullinneqarsinnaanerat killilerpaa. Sullissineq ataaseq tassaavoq timmisartup qangattarnera imaluunniit minnera.
Timmisartuutileqatigiiffik naapertorlugu killilersuinerit nutaat ingammik nunap iluani timmisartuussinernut annertuumik kinguneqarumaarput. Ajornartorsiut Air Greenlandip siulliulluni tallimanngormat saqqummiuppaa.
Sermitsiap tamanna Trafikstyrelsen apeqqutilliissutigaa, maannalu akissutisilluni:
– Greenland Airportsip Nuup Mittarfiani atugassarititaasussat arlalitsigut naammassinngikkaa aamma timmisartunut paasissutissiinermut kiffartuussivianut (AFIS-imut) piumasaqaatinik atuuttunik malinninngitsoq Trafikstyrelsenip timmisartuussinermik nakkutilliisuisa ataasinngornermi septembarip 22-ani immikkut ittumik misissuinerminni – Greenland Airportsillu aasaanerani angallannermi pilersaarutaanik misissuinerup kingorna – paasivaat, allaffimmi pisortaq Signe Marie Finderup Slot allappoq.
– Aamma Greenland Airportsip nalunaarutiginikuusaanniit Nuup mittarfiani timmisartortitseqatigiiffiit nutaat kiffartuunneqartussat amerlanerupput, nangippoq.
Silaannakkut angallannermi ajornartorsiutit
Nuummiit Nuummullu nalunaaquttap akunneranut sullissinerit amerlanerpaamik sisamaannanngorlugit killiliisisoqarpoq, taakkunanngalu tikittut amerlanerpaamik marluusinnaallutik.
- Timmisartuussinerit pingaarnersiukkat, assersuutigalugu ambulancit timmisartuussinerat aamma ujaasinerit annaassiniarnerillu, killilersuutinut taakkununnga ilaanngillat. Taavalu nunaqavissut qulimiguuliat ataaseq mittarfiup qanitaani angalasinnaanera akuerineqarpoq, Trafikstyrelsen paasissutissiivoq.
Tamanna timmisartuussinermut unammillernarpoq, Air Greenlandimmi pilersaarutai Nuummi mittarfik aallaavigalugu ilusilersugaapput, piffissamilu sivikitsumi timmisartunik amerlanerusunik mitsitsisoqarsinnaasarnissaa pilersaarummiilluni. Suliffeqarfiup sapaatip-akunnerata siuliani nalunaarutaani tamanna aamma eqqaaneqarpoq.
- Allannguinerit sioqqullugit Air Greenlandimi akunnermut timminerit arfineq pingasut tungaannut ingerlanneqartarput, timmisartorsuup Danmarkimut Danmarkimiillu angalaneranut atatillugu. Maanna taamaallaat sisamaasinnaapput. Kingunerissavaa sinerissap Nuullu timmisartorsuup tikiffigisartagaata akornanni ullormi ataatsimi aqqutit pilersaarutit 40 procentii missaaniittut ingerlanneqarsinnaajunnaassammata, Air Greenlandimi ingerlatsinermut pisortaq Line Frederiksen oqarpoq.
Qanoq sivisutigisumik atuutissanersoq oqaatigineqarsinnaanngilaq
Taamaammat angalasut amerlanerusut ullup ataatsip ingerlanerani angalasinnaajunnaarlutik Nuummi unnueqqaartalissapput.
Trafikstyrelsenimiit mittarfiup timmisartuussinerillu qanoq sivisutigisumik killilersorneqassanersoq oqaatigineqarsinnaanngillat.
– Erseqqissaatigissavarput Trafikstyrelsen killilersuutinik arlalinnik Greenland Airportsimut atuutilersitsigaluarpat atuutilersitsinngikkaluarpalluunniit Greenland Airports mittarfinni isumannaallisaanermut akisussaasuummat. Taamaattumik suliniutit nutaat qanoq sivisutigisumik atuutilersinniarneqassanersut nalilersinnaanngilarput, Signe Marie Finderup Slot oqarpoq.
Air Greenlandip qaammatini tulliuttuni angalanissamut pilersaarutini allanngorteqattaassavai.
- Neriuppugut Air Greenland peqatigalugu timmisartornikkut isumannaallisaanermi allanik iluarsiissutinik pilersitsisinnaalluta, angalasunut kingunipilui sapaatit akunnerit sisamat tallimat tulliuttut annikillisarlugit, Greenland Airportsimi pisortaq Jens Lauridsen tallimanngormat oqarpoq.
