Arctic Umiaq Linemi pisortaq nutaaq
Taitsiannguaq Olsen juulip aallaqqaataani 2024-mi Arctic Umiaq Linemi pisortanngussaaq, Royal Arctic Line taama paasissutissiivoq.
Foto: Arctic Umiaq Line
Taitsiannguaq Olsen juulip aallaqqaataani 2024-mi Arctic Umiaq Linemi pisortanngussasoq, Royal Arctic Linep tusagassiuutitigut nalunaarutigaa.
Taitsiannguup, Namminersorlutik Oqartussat peqatigalugit, Arctic Umiaq Linep nunatsinni imaatigut ilaasunik angallassinermi siunissami atuuffigisassaata erseqqissarneqarnissaa pingaarnertut suliassarissagaa, ingerlatseqatigiiffiup pisortaanera Niels Clemensen paasissutissiivoq.
Arctic Umiaq Line ullumikkut Namminersorlutik Oqartussanut kiffartuussinissamik isumaqatigiissuteqarpoq, isumaqatigiissullu taanna 2025-p naanissaata tungaanut atuuppoq.
Royal Arctic Linemi ilisimaneqarluartoq
Taitsiannguaq Olsen Royal Arctic Linemi ilisarisimaneqarluarpoq, siornatigut tassani ukiuni 25-ni atorfeqarsimalluni.
- Imarsiornermut ingerlatsinermullu misilittagaqarluarpoq Arctic Umiaq Linemilu siulersuisut suleqatiginissaanut qilanaarput.
Taitsiannguaq Olsenip Jens Jakob Sandgreen ingerlatseqatigiiffimmi piffissami 2022-2024-mi pisortaasoq kingoraarpaa.
