Arnanut
Filippinerineersunut pingasunut suliamut tunngasumi ataasinngornermi
pisoqarpoq. Arnap ataatsip angerlarsimaffianut politiit ornigupput
sapaatip-akunneratalu ataatsip ingerlanerani Kalaallit Nunaat
qimassagaa nalunaarutigalugu.
Nunani tamalaani
suliartortunut aqutsisoqarfimmit SIRI-mit aalajangiineq, tassani
Kalaallit Nunaanni najugaqarnissamut qinnuteqaat
itigartinneqarsimasoq, politiit nassarpaat. Allakkat aggustip
15-ianni ullulerneqarsimasut inuttaanut aggustip 19-ianni
tunniunneqarput. Arnap nunami sulisinnaaneranut Majoriaq 2024-mi
decembarip naaneranut sivitsuinikuugaluartoq taama pisoqarpoq.
Kisiannili piumasarineqarpoq RS Servicesimi sulissasoq, tassa
suliffeqarfimmi SIK-p 372.000 koruuninik akiliinissamik
eqqartuussivimmut suliassanngortitaani. Suliaq AG-p aasap
ingerlanerani allaaseraa, tassani arnat Filippinerineersut pingasut
akilernerlunneqartarsimaneri pissutigalugu SIK-p suliffeqarfik
Kalaallit Nunaanni Eqqartuussivimmut suliassanngortippaa.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
Arnanut
Filippinerineersunut pingasunut suliamut tunngasumi ataasinngornermi
pisoqarpoq. Arnap ataatsip angerlarsimaffianut politiit ornigupput
sapaatip-akunneratalu ataatsip ingerlanerani Kalaallit Nunaat
qimassagaa nalunaarutigalugu.
INATSISINI IMA ALLASSIMAVOQ:
Sulinissamut
akuersissummik tunineqarneq najugaqarnissamut akuersissummik
tunineqarnermut attuumassuteqarpoq. Kalaallit Nunaanni allamik
suliffissarsiorniaraanni nunagisamut uteqqaartariaqarpoq imaluunniit
nunami allami minnerpaamik qaammatini pingasuni inatsisit
naapertorlugit najugaqariarluni nujagaqarnissamut
qinnuteqaqqittoqarsinnaalluni. Najugaqarnissamut akuersissummik
tunineqarnissamut suliffeqarfiup suliffigisassap nunanit
allaneersunit – aamma Filippinerinit – sulisoqarsinnaanera
akuerineqarsimanersoq apeqqutaavoq.
Nunani tamalaani
suliartortunut aqutsisoqarfimmit SIRI-mit aalajangiineq, tassani
Kalaallit Nunaanni najugaqarnissamut qinnuteqaat
itigartinneqarsimasoq, politiit nassarpaat. Allakkat aggustip
15-ianni ullulerneqarsimasut inuttaanut aggustip 19-ianni
tunniunneqarput. Arnap nunami sulisinnaaneranut Majoriaq 2024-mi
decembarip naaneranut sivitsuinikuugaluartoq taama pisoqarpoq.
Kisiannili piumasarineqarpoq RS Servicesimi sulissasoq, tassa
suliffeqarfimmi SIK-p 372.000 koruuninik akiliinissamik
eqqartuussivimmut suliassanngortitaani. Suliaq AG-p aasap
ingerlanerani allaaseraa, tassani arnat Filippinerineersut pingasut
akilernerlunneqartarsimaneri pissutigalugu SIK-p suliffeqarfik
Kalaallit Nunaanni Eqqartuussivimmut suliassanngortippaa.
- Uffarlunga matunnut
kasuttortoqartoq. Kasuttorpalunneq sakkortusiartuinnarmat
allaruseriarlunga matu ammarpara. Annilaajummerpunga tupallungalu
takugakku politiit matuma silataaniittut. Isertinnagit
atisaleqqaarumavunga.
Arnamulli politiinit
paasissutissaq apuunneqartoq nuannersuinnaanngilaq.
- Passera takujumavaat,
nunaqqatinniillu tusarnikuugakku passi politiinit
arsaarinnissutigineqartartoq passima takutinnissaa annilaangatigaara.
Qujanartumik ingerlaannaq utertippaat. Paaserusuinnarpaat
kinaassutsimut uppernarsaatiga, oqarpoq.
Politiit Nunani tamalaani
suliartortunut aqutsisoqarfimmit SIRI-mit aalajangiineq tigummivaat,
tassani allassimavoq najugaqarsinnaatitaanera sivitsorneqanngitsoq,
allaallu sapaatip-akunnerata ataatsip ingerlanerani Kalaallit Nunaat
qimassagaa.
- Suli tupaqqavunga,
qiasaqattaarpunga paasisinnaanagulu maanna killiffiga.
Suut tamarmik
iluatsissapput
Ukioq
manna maajimi politiinut saaffiginnissimalluni oqaluttuarpoq. Tassani
paasiniarpaa SIK-p suliakkiinera pissutigalugu RS Servicesimi,
ilaatigut salon Aurorami, sulisinnaajunnaaruni qanoq
iliorsinnaanerluni.
-
Taamani oqarfigineqarpunga allamik suliffittaaginnaqqullunga taava
suut tamarmik aaqqiissammata. Taamaaliorpunga. Ullumikkut allamik
suliffeqarpunga, ukioq mannalu juulimi Majoriamit sulisinnaanermut
akuersissutiga decembarip tungaanut atuuttussaq akuerineqarpoq,
soorunami RS Servicesimi suli sulinissara piumasaqaatigineqarluni.
Majoriamut qinnuteqaatima saniatigut Danmarkimi nunanut allanut
ministereqarfimmut najugaqarnissamut allagartamik nutaamik
qinnuteqarpunga, isumaqaraluarlungalu akuerineqassallunga.
Ajoraluartumilli akuerineqanngilaq. Pissutsit atukkakka
nuanniinngillat, oqaluttuarpoq.
Aningaasanik
amigaateqartoq
Ukiut
marluk ingerlanerini RS Servicesimut akiitsuni akilersorsimallugit
nassuiaavoq. Akiitsut 24.000 koruunit, Royal Greenlandimi atorfimmut
isumaqatigiissummut 10.000 koruunit Filippineriniillu Nuummut
billitsimut 14.000 koruunit.
SIRI-MI SULIAP INGERLANERA:
Arnaq
Nuummut maajip arfernani 2022-mi tikippoq.
2023-mi
maajip tallimaani nunami tassani najugaqarnissamut sulisinnaanermullu
akuersissutip sivitsuisoqarnissaa qinnutigaa.
2024-mi
maajip aallaqqaataani qinnuteqaataa itigartitsissutigineqarpoq.
2024-mi
juulip 17-ianni allamik sulisitsisoqalerami nunami tassani
najugaqarnissamut sulisinnaanermullu akuersissummik qinnuteqaqqippoq.
-
Aviisimilu allaaserineqartutut akilernerlutaavugut,
sulinngiffeqarsinnaanata, akiitsunut taarsersuilluta, ineqarnermut
akiliisitaasarluta il.il. taamaalilluta aningaasanik ileqqaarnissamut
periarfissaqarnata. Ullormut pisariaqartitavut aqqutinullu aningaasat
kisiisa pigaavut, uangalu anaanaga aningaasanik aamma nassittarlugu.
Napparsimavoq nukkannillu pingasunik isumaginnittuulluni, maani
Kalaallit Nunaanni inuussutissaqanngingajallutalu
ileqqaarsinnaanngilagut. Qatanngutigiinni sisamaasuni
angajullersaavunga, taamaattumik ilaquttatsinnik pilersuinissara
pisussaaffigivara. Ataatarput toqunikuuvoq, taamaattumik uanga
kisimiillunga taakkuninnga pilersuisinnaallunga, oqaluttuarpoq.
Arnaq
sulisitsisuminut attaveqarsimalluni anisitaajumaarnerminillu
oqaluttuussimallugit oqarpoq.
-
Kalaallit Nunaannut uterteqqikkusuppaanga sulisarnera iluarigamiuk.
Uanga aamma maaniiginnarusuppunga. Tamannali aamma
ajornaatsuinnaanngilaq. Filippinerini illoqarfiit pingaarnersaanni
Manillaminngaanniit Danmarkimi aallartitaqarfimmut Kalaallit
Nunaannukarnissara qinnutigeqqaassavara, nunap immikkoortuani Davaomi
najugaqarpunga, taannalu Manillamit nalunaaquttap akunnerinik
marlunnik timmisartumik ungasitsigisumiippoq. Tassa siunissaq
takorloorsinnaanngilara. Akiitsueruteqqammerpunga aallaqqaataaniillu
Kalaallit Nunaannukaqqinnissannut akiitsoqaleqqittussanngorlunga.
Filippinerinulluunniit qanoq uternissara nalulluinnarpara, tassami
aatsaat aggustimi suliffittaarpunga, billetsimullu akissaqarnanga,
oqaluttuarpoq.
