- Pituttorsimavugut misigisimallutalu ikiorneqarusunnata.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
- Pituttorsimavugut misigisimallutalu ikiorneqarusunnata.
Arnaq sulisitsisumit inatsisinik unioqqutitsisumik sulisitaasimasup aappaa, maannalu SIK-p taakku sinnerlugit Kalaallit Nunaata Eqqartuussivianut suliassanngortitsisoq, oqaluttuarpoq.
Allaaserisani arnat marluk pineqartut atitik atorlugit saqqummerusunngillat, sulisitsisuminnit nunaqqatiminnillu Filippinerinit Kalaallit Nunaanniittunit allanit kinguneqartitsivigineqarsinnaanertik pissutigalugu.
Pisorli arnamut kinguneqareersimavoq. Arnap, AG-mi allaaserisami matuma sammisaa, suliartornermini tikilluaqqusaajunnaarsimasusut misigaaq.
- Upperiuminaappoq. Ukiut pingasut sinnerlugit Aurorami Nuuk Centerimiittumi tagiartuisartutut sulivunga, juulimilu ullut ilaanni suliartorama paasivara tagiartuisarfik peerneqarsimasoq. Soorunami suleqatikka aperaakka qanoq pisoqarnersoq, akineqarnangali suleqatigisorisannit oqaatsikkut saassunneqarpunga. Kattuppaannga, suleqatimmalu ilaata sakkortuumik toortarlunga sioorasaarpaanga. Ingerlaannartariaqarninnik kinguneqarpoq. Qanormi iliussagaluarama?, oqaluttuarpoq.
NORMU KUKKUSOQ
Aviisimit AG-miit sapaatip-akunnerata siulianitulli, RS Servicesimik piginnittoq, Rhafaelle Martinsen oqaaseqartinniarsarigaluarparput.
SIK-p eqqartuussissuserisuata Kalaallit Nunaanni Eqqartuussivinnut suliassanngortitsinera qanoq isumaqarfigineraa apererusukkaluarparput.
Aamma sulisuminut Filippineriniit suliartortitaminut atugassarititai, ilaatigut aningaasarsiat, sulinngiffeqarnermi aningaasarsiat, akileraarutit A-t allarpassuillu pillugit apererusukkaluarparput. Aamma sooq eqqunngitsumik tunngavilersuilluni Kalaallit Nunaannut suliartortitsiniarnersoq, ilaatigut qanoq ililluni isumaqatigiissut ilumoortuunngitsoq 10.000 koruuninik akeqartissinnaaneraa tusarusukkaluarparput.
Rhafaelle Martinsenip sapaatip-akunnerata siuliani oqaaseqangaarnanilu oqarasuaatikkut attaveqarneq kipivaa. Arlaleriarluta sianerfigisaqattaareeripput normumut kukkusumut sianernerariarluta attaveqaat kipiinnarpaa.
- Naluara suli atorfeqarnerlunga, soraarsinneqanngilanga kisiannili tikilluaqquneqarnanga. Taama paasivara.
Suliffiit pingasut
Arnaq taanna Filippineriniit Kalaallit Nunaannut tikippoq – ukioq manna novembarimi ukiut tallimat matuma siorna. Taanna Queens Spami najugaqaatigaluni sulilerpoq. Queens Spa SIK-p suliffeqarfinnik eqqartuussivimmut suliassanngortitaannut ilaanngilaq. Queens Spa allamik piginnittoqalersimasoq AG-p paasivaa.
- Filippineriniit pingasuulluta suliartorluta tikippugut. Tagiartuisarfimmi qulingiluanut ammarneraniit unnukkut sullitaarunnissatta tungaanut matusartumi najugaqarlutalu sulisarpugut. Tassani sulereeraangami neriniartarfimmi saqisutut sulisarpunga taannalu matugaangat eqqiaasarlunga. Tassa ullup ingerlanerani suliffiit pingasut suliffigisarpakka. Taama sulininni 13.000 koruuninik akissarsisarpunga. Qaammat ilivitsoq sulinngiffeqarnanga ataannartumik sulivunga, suliassaqarujussuarnerullu kingunerisaanik qasulluinnarlunga. Pissutsilli atukkakka pissutigalugit allatut iliuuseqarsinnaanngilanga. Ilisimasakkami killeqarmata, nassuiaavoq.
Nunami allamiutut suliffeqarneq suliffissatut neqeroorutigineqartut aallaavigalugit aningaasarsisoqartartoq ilanngullugu oqaatigaa.
- Aningaasanik taarsigassarsilluni Kalaallit Nunaannut tikittoqartarpoq. Aningaasat sulisitsisumit taarsigassarsiarineqartut akissarsianit ilanngaatigineqartarput, soorluttaaq ineqarnermut akiliutit taamaaliortinneqartartut. Uanga tagiartuisarfimmi ineqarninnut akiliutiga qaammammut 1.000 koruuniuvoq. Tamatuma saniatigut kinaassutsimut uppernarsaammut, MasterCardimut aamma aningaaserivimmi kontomik pilersitsinermut akiliut, sulisitsisuma kortit tamaasa 150 koruuninik akileeqqusiffia, aamma akilertarpakka. Tassa ilisimasakka killeqaramik. Isumaqarama taamaattoqartartoq, oqarpoq.
Pituttorsimasoq
Tikisitatut suliffeqarfimmut isumaqatigiissuteqarfigisamut pituttorsimasoqartarpoq, ingerlaannarlu allamik suliffittaartoqarsinnaaneq ajorluni.
Assersuutigiinnarlugu suliffimminit soraaraanni Kalaallit Nunaannut attuumassuteqarunnaartoqartarpoq angerlartariaqalerlunilu. Allami sulilerusukkaanni inatsit malillugu nunagisamut angerlaqqaariarluni nutaamik qinnuteqartoqartarpoq.
- Coronalu takkuppoq, tamatumalu kingunerisaanik allamik suliffissarsiorsinnaalerpunga. Isumassarsiatsialaanngitsorli paasinarsivoq. RS Servicesimi sulilerpunga.
- Ikiorsinnaavakkit, RS Servicesimik piginnittoq oqarpoq. Oqartoqarsinnaavoq arsakuninngaanniit innermut toqqaannaq pisunga. Pissutsit pitsaanerunngillat aningaasarsiamalu allagartai paasilluarsinnaanngilakka. Allami ineqalerpunga, aningaasarsiamalu allagartaani takusinnaavara - imaluunniit ima nassuiaanneqarpunga tangiartuisarfimmit nuunnerma kingorna iluarsaanneqarneranut 5.000 koruuninik akiliissasunga, arnaq oqaluttuarpoq.
Inimut allamut nuukkami sisamanik allanik ineqateqalerpoq; aappariit Filippinerillu arnat marluk. Namminiuffigisinnaasaa assiaqummik nuunneqarsinnaasumik assiaqutaqarpoq.
- Uiga ukiut marluk matuma siorna naapippara. 2,5 kvadratmeterisut angitigisumik inigisaqarnera tupigusuutigaa, tamatumalu kingorna uiga iliuuseqarnialerpoq.
30 koruunit
Aningaasaqarnera uiata misissorpaa, Queens Spami aamma Salon Aurorami akissarsiaasa allagartai misissornerani ima qisuariarpoq:
- Amiilaarn...!
- 11.000 koruuninik akissarsiaqarpunga, amerlanertigut qaammatip ulluini tamani sulininnit, akunnermusiakkalu minnerpaaffissamiit appasinnerujussuuvoq. Aap, sulisitsisunniit paasitinneqarpunga akunnermut 110 koruuninik akeqartunga. Aningaasarsiakkali qaammammut sulininnut agguaakkaanni nalunaaquttap-akunneranut 30 koruunit missaanniippoq. Sulinngiffeqarsinnaanngilanga, qaangiuttoornermusiaqarnanga imaluunniit nalliuttuni tapeqarnanga, aamma sulinngiffeqarnermi aningaasarsianut soraarnerussutisiassanulluunniit ileqqaangaqanngilanga. Uigalu akileraartarfimmukarami paasivaa aningaasarsiannit akileraarutit A-t akilerneqanngisaannarsimasut. Tamatuma kingorna paasiniaarsuaalerpoq.
Suliaq politiinut SIK-mullu suliassanngortinnissaa sivisuumik ulapputaasimasoq oqarpoq, nuannaarutigaali suliami taperserneqarluni kiisami eqqartuussivilersuussisoqalerpat.
- Ajoraluartumik tamanna suliffeqarunnaarninnik kinguneqarsimassaaq, kissaatigaarali naapertuilluartoqassasoq. Aamma RS Servicesip inatsisinik malinninnissaa. Misigivunga atornerlunneqarujussuarlunga. Kissaatiginarsinnaagaluarpoq oqartussat suliffeqarfinnik nunanit allaneersunit sulisoqartartunik nakkutilliinerussasut. Aammali kissaatiginarsinnaagaluarpoq nunatsinnut uteqqaanngikkaluarluta allamik suliffittaarsinnaanngussasugut. Coronap nalaani malittarisassat sakkukilliimipput, taamaattumik suliffinni siullermiit RS Servicesimut nuuppunga, oqarpoq.
