Asfaltiliorfiup kommunip suleriarsinnaaneranik pingasoriaatinngortitsivoq
Kommuneqarfik Sermersooq maanna asfaltiliorfik nutaaliaasoq tigusimalerpaa, Munck Gruppenip Nuuk Mittarfittaata tallilerneqarnerani sanasimasaata. Tigusineq mittarfiliortiternerup immikkoortuata pingaarutilissuup naammassineranik ersersitsivoq kommunimullu periarfissanik nutaanik pilersitsilluni illoqarfiup pingaarnersaata aqqusernginik pitsanngorsaanissamut, allappoq kommune.
Aqquserngit asfaltilersorneri pilertornerulersinnaalissapput, kommunimmi Munck Gruppip asfaltiliorfia maanna tiguaat.
Assi: Leiff Josefsen
Nuummi mittarfissuup sanaartorneqarnera naammassimmat, kommunip Munck Gruppenip asfaltiliorfia maanna tiguaa.
Asfaltiliorfik kommunip atugarisimasaanit angineruvoq. Suliaqarsinnaassusialu pingasoriaammik annertunerummat, tamanna kommunimut periarfissanik pitsaanerusunik pilersitsivoq, Nuummimi aqqusinernik aserfallatsaaliuinissamut sanaartornissamullu periarfissiilluarmat.
Kommuneqarfik Sermersooq nittartakkamini taama paasissutissiivoq.
- Tamanna isumaqarpoq, siunissami pitsaanerusumik aqqusinernik aserfallatsaaliisinnaalissasugut aqquserniorsinnaalerlutalu, tamanna innuttaasunut iluaqutaassaaq pitsaanerusumik attanneqarsinnaanerusunillu aqqusineqalernikkut. Asfaltiliorfiup kommunip attaveqaasersuutinik suliaqarnerani pingaaruteqalernissaa Nuummilu aqquserngit pitsaanerulersinnissaat qilanaaraarput, Margrethe Rosing Hegelund, Kommuneqarfik Sermersuumi immikkoortortaqarfimmi pisortaq oqarpoq.
Asfaltiliorfik mittarfissuup nutaap sanaartorneqarnerani immikkut atorneqartarsimavoq, kommunilli tigusineratigut aqqusinniornermi annertuumik periarfissiivoq. Nuummi aqqusengit maanna aserfallatsaaliorniarneqarnerat ilungersunarpoq - pingaartumik Sipisap eqqaani, tassanimi biilit ullormut 19.000-it missaat ingerlaartarput.
Asfaltiliorfik nutaaq atorlugu aqquserngit aserfallatsaalineqarneri pitsaanerulissasut kommunip naatsorsuutigaa.
