ASK-ip oqoqarnera pasitsaanneqartoq
Nuummi meeqqat atuarfiat alla oqoqartoqarnera pissutigalugu matussagaluarpat, Kommuneqarfik Sermersooq upalungaarsimalluni pilersaaruteqalereerpoq.
Sermitsiap paasissutissaatai naapertorlugit atuartut angajoqqaavi ilisimatinneqarput atuartut pigisatik atuarfimmut aassagaat, tallimanngornermilu atuartitsinissaraluaq taamaatiinnarneqartoq.
Nuummi atuarfik alla aamma oqoqarsorineqarpoq. Tassa Atuarfik Samuel Kleinschmidt (ASK).
Kommuneqarfik Sermersooq nittartakkamini allappoq atuarfiup silaannaa misissorneqaleruttortoq.
Sermitsiap paasissutissaatai naapertorlugit atuartut angajoqqaavi paasitinneqarsimapput atuartut aqagu pigisatik aassagaat tallimanngornermilu atuartitsinissaq taamaatiinnarneqartoq. Angajoqqaat arlallit oqoqarnera naammagittaalliuutigisimavaat, ASK-imilu igalaat saavi allallu oqummik ersarissumik takussutissaqarnerat tamat attaveqartigiittarfiini siammarterneqarsimapput.
Sapaatip-akunnerata tulliani atuartut ukiakkut atuanngiffeqartussaapput.
Kommuneqarfik Sermersooq Sermitsiamut allappoq atuarfik matuneqarsimanngitsoq, atuartulli tallimanngornermi angerlartinneqaannartussaanerat ilumoornersoq suli akissuteqarfiginngilaat.
Nuummi atuarfik Ukaliusaq (USK) oqoqarnera pissutigalugu matuneqareerpoq.
Illoqarfiit pingaarnersaanni atuarfik nutaaq, Atuarfik Inussuk, suli atulersimanngilaq.
Upalungaarsimanermut pilersaarut piareeqqasoq
Kommuneqarfik Sermersooq tusagassiuutinut nalunaarummi allappoq atuarfik oqoqarnera pissutigalugu matuneqarpat atuartitsinerup ingerlaannarnissaa qulakkeerniarlugu upalungaarsimasoqartoq.
- Paasilluarparput angajoqqaat, meeqqat aamma sulisut akornanni ernumasoqalersinnaanera atuarfinnik matusinernik nuutitsinernillu ingerlatsisoqalersillugu. Tamassi eqqissisarusuppassi: Pilersaaruteqarpugut piareeqqasumik, aamma meeqqat arlaannaalluunniit sumi tamani init arlaannut nuutsinneqarnavianngillat. Aaqqiissutit tamarmik toqqissisimanartuussapput, illersorneqarsinnaallutik aamma pilersaarusiugaallutik, borgmesteri Avaaraq Olsen (IA) oqarpoq.
Pinasuartumik pilersaarut, Meeqqanut Atuarfeqarnermut Ingerlatsivimmit suliarineqartoq Nuummi ininik naleqquttunik arlalinnik imaqarpoq. Init taakkua isumannaassusiat, illup iluini silaannarissusiat aamma atuartitsinermi avatangiisitut atorneqarsinnaassusiat nalilerneqarput, taamaaliornikkut atuartitsineq sapinngisamik pitsaanerpaamik nanginneqarsinnaaqqullugu, atuartitsiviup nuukkallartariaqarsinnaanera pisariaqalissagaluarpat.
- Uagutsinnut pingaarnerpaaq tassaavoq meeqqat nalerisimanerat aamma sulisut toqqissisimasinnaanerat. Atuarfik aamma atuartitsineq eqqartoraangatsigu tamatta ataatsimoorluta siunissarput oqaluuserisarparput. Taamaattumik uagut aaqqiissutissavut eqqarsaatigilluagaassapput piujuartuullutillu – inuttut aamma suliassanut tunngasutigut, borgmesteri oqarpoq.
