KL

DK

Ataatsimiititalip immikkut ittup Savalimmiut WTO-mut ilaasortanngorsinnaanera aalajangiiffigissavaa

Danskit naalakkersuisuisa Savalimmiunilu naalakkersuisut § 6 naapertorlugu ataatsimiititaliaq siullermeerlutik sulilersikkaat. Savalimmiut WTO-mut ilaasortanngorsinnaanersoq paasiniarneqarnissaa siunertaavoq. Pisoq pingaarutilik, ministeriunerup Mette Frederiksenip naqissuserpaa.

Lagmandip ministeriunerullu ataatsimiititaliap § 6 naapertorlugu atuutilersinneqarnissaannik eqqartuussiviit qullersaannut qinnuteqaatertik Københavnimi tallimanngormat atsiorpaat.
Morten Okkels Tusagassiortoq
Saqqummersinneqarpoq

– Savalimmiut namminneq nunartik sinnerlugu nunat tamalaat niueqatigiinnikkut suliniaqatigiiffiannut WTO-mut ilaasortanngornissamut Savalimmiut inatsisaanni inissisimaffianut naapertuuppa?

Ministeriunerup Mette Frederiksenip lagmandillu Aksel V. Johannesenip tallimanngormat § 6 naapertorlugu ataatsimiititaliamut saqqummiussimasaanni apeqqut taama nipeqarpoq.

Savalimmiuni namminersorneq pillugu inatsimmi § 6 naapertorlugu ataatsimiititaliaq periarfissaavoq. Savalimmiut qanoq annertutigisumik namminneq aalajangiisinnaanersut, suullu naalagaaffiup oqartussaaffiginerai, ataatsimiititaliap nalilersussavaa.

Savalimmiut nunat tamalaat niueqatigiinnikkut suliniaqatigiiffiannut WTO-mut ilaasortanngorusupput taamaalillutillu namminneq niuernikkut isumaqatigiissutit isumaqatigiinniutigisinnaalerumallugit.

Danskit naalakkersuisuisa tamanna paasisinnaavaat, paasiniartariaqarporli taamaaliortoqarpat inatsit tunngaviusoq unioqqutinneqassanersoq.

Aqqutit nutaat

Ataatsimiititaliaq perngaammik suliasinneqarlersoq Ministeriuneqarfik oqarpoq:

– Pisoq pingaarutilik, naalagaaffeqatigiinnitsinni nutaamik aqqummik sapiilluta ingerlanissamut takussutissiisoq. Naligiilluta ataqqeqatigiillutalu, ministeriuneq Mette Frederiksen oqarpoq.

Danskit naalakkersuisui Savalimmiunilu naalakkersuisut tamarmik immikkut ataatsimiititaliamut ilaasortanik marlunnik toqqaapput, taakkualu isumaqatigiippata suliaq naammassineqassaaq.

Isumaqatigiinngippata eqqartuussiviit qullersaannit eqqartuussisut pingasut aalajangiissapput.

– Ataatsimiititaliap suliaq sukkasuumik suliarissagaat naatsorsuutigaara, 2025-llu ingerlanerani aalajangiisoqarnissaa qilanaaraara, lagmand Aksel V. Johannesen oqarpoq.

mette frederiksen inuiaqatigiit færøerne aksel v. johannesen wto samfund § 6-nævnet

ATORFIIT Se alle jobs

Powered by Labrador CMS