Atlantikup avannaaani naalagaaffimmi qullersat Savalimmiuni ataatsimiissasut

Ataasinngorpat Savalimmiuni Atlantikup avannaanni naalagaaffiit pisortaat ataatsimiissapput tassanilu naalakkersuisut siulittaasui sisamat sillimaniarnikkut pissutsit oqaluuserissallugit naapissapput.

Tassani danskit statsministeriat Mette Frederiksen Savalimmiut lagmandiannik Aksel Vi. Johannsenimik, Naalakkersuisut siulittaasuannik Jens-Frederik Nielsenimik Islandillu statsministerianik Kristrún Frostadóttirimik ataatsimeeqateqassaaq.

Norskit statsministeriiat Jonas Gahr Støre, qarasaasiakkut ataatsimiinnermi peqataassaaq.

Taama Statsministeria tusagassiuutinut nalunaarummi allappoq.

Ataatsimiinneq piffissami matumani nikerarfiusumi sapinngisamik akulikinnerpaamik naalagaaffiit pisortaasa ataatsimeeqatigiittarnerannut ilaavoq.

Sapaatit akunneri marluunngitsulluunniit qaangiuttut Mette Frederiksenip kalaallit naalakkersuisuni siulittaasoq Jens-Frederik Nielsen danskit folketingianni naapippaa.

Tallimanngormat statsiministeri Norgimi Oslomi nunat tamat akornanni naalagaaffiit pisortaasa naapinneranni peqataavoq.

- Naak nunagut nunarsuarmi piffinni assigiinngitsuni naapittaraluartut, taamaattoq nunat taakkuulluta Issittumi Atlantikullu avannaanni sillimaniarnikkut maanna pisut naapilluta oqaloqatigiissutigisarnerat pissusissamisoorpoq, statsminister Mette Frederiksen tusagassiuutinut nalunaarummi allappoq.

- Taamaammat Tórshavnimi naapissinnaanitta iluatsinnera, Norgillu qarasaasiakkut peqataasinnaanera nuannaarutigaara.

Ataasinngornermi aaqqissuussaq sillimaniarnermi politikikkut ataatsimiinnertut nassuiarneqarpoq.

Atlantikup avannaa aamma piffinngorsinnaavoq saqitsaaffiusoq, ingammik Issittup ukiuni arlalinni eqqissisimaffittut isigineqarnerata kingorna.

Iligiit oqaloqatigiittarnerat taamaammat qanimut pisassaaq, danskit statsministeriat oqarpoq.