Attaveqaatitigut pikkorissarnerit sulinermi ajutoornerit pinaveersaartissavaat
Siunissami Kalaallit Nunaanni sulinermi avatangiisinut tunngatillugu attaveqaatitigut pikkorissarnerit ingerlanneqarsinnaalissapput.
Ukiuni kingulliunerusuni Kalaallit Nunaanni sulinermi ajutoornerit amerlavallaarput. Folketingimi ilaasortaq Aaja Chemnitz (IA) taamak oqarpoq, taassumalu neriuutigaa pikkorissartitsinerit ajutoornernik pinngitsuueqataatitsisinnaassasut.
Foto: Leiff Josefsen
Januaarip aallaqqaataani 2026 aallarnerfigalugu ullumikkumit Kalaallit Nunaanni amerlanerit periarfissaqalissapput sulinermi avatangiisit pillugit ilinniagaqarnissaminnut. Nalunaarut nutaaq periarfissiissaaq attaveqaatit aqqutigalugit pikkorissartitsisarnerit ingerlanneqarsinnaanissaannut.
Tusagassiuutitigut nalunaaruteqarluni Suliffeqarnermut ministereqarfik taamak allappoq.
Kaare Dybvad Bek (Socialdemokratiet), Danmarkimi suliffeqarnermut ministeri, naammagisimaarinnippoq, attaveqaatit aqqutigalugit pikkorissartitsinerit ingerlanneqarsinnaanerat neriorsuutigineqarsinnaalermat, taamaaliornikkut ungasissumiinneq aporfiginagu amerlanerusut ilinniarnissamut periarfissinneqarsinnaanerannik ammaassissammat.
- Ilinniarneq sulinermi avatangiisinik nukittorsaanissamut pilersitsissaaq, aammalu isumannaannerusumik eqqissisimanerusumillu Kalaallit Nunaanni suliartornissamut tunngavissiissaaq. Tamannali aqqutigalugu suliffimmi ajutoornerit ikilisarnissaat anguniarneqassaaq, tusagassiorfinnut nalunaarummini taanna oqarpoq.
Danskit naalakkersuisuisa sulissutigisimavaat Kalaallit Nunaanni sulinermi avatangiisinik inatsisitigut aaqqissuussinerup nutarterneqarnissaa, maannalu suliffeqarfinni aqutsisunut sulinermilu avatangiisit isumannaatsuunissaat pillugu sinniisunut ilinniartitaanerup nukittorsarneqarnissaa.
Ajutoornerit amerlavallaartut
Ajutoornerit sakkortuut arlallit pisimapput ukiuni kingullerni. Kingullertigullu 2022-mi sisamat toqumik kinguneqartumik sulinermi ajutoornerit pisimapput, taakkunannga pingasut sanaartornermut- aamma sanaartugassanik ingerlatsinermut aammalu nioqqutissanut toqqorsivinnut/engrosimut tunngasuupput.
Taamaattumik ajutoornerit amerlavallaat pissutigalugit Inuit Ataqatigiit sinnerlugit folketingimi ilaasortap, Aaja Chemnitzip, danskit naalakkersuisuisa iliuuserisaat pitsaasutut isigaa.
- Ukiuni kingullerni nunatsinni suliffinni ajutoornerit amerlavallaat takusimavagut. Uannut pingaaruteqarpoq qulakkeerniassallugu sulisut suliartoraangamik sulinerullu nalaani tamarmik toqqissisimasinnaasut.
- Taamaattumik nuannerpoq, maanna nunatsinni tamarmi internetsikkut attaveqaatit aqqutigalugit suliffimmi avatangiisinut pikkorissarnissamut periarfissaqalermat, taanna oqarpoq.
Aaja Chemnitz naatsorsuutigaa, attaveqaatit aqqutigalugit pikkorissarnerit, inatsisininik nutarterineq nakkutilliinermillu nukittorsaanerup peqatigisaanik pitsaanerusunik suliffimmi atugassaqartitsinermik ajutoornerillu ikinnerulersinnissaanik pilersitsisinnaassasut.
2022-imi Sullivinnut Nakkutilliisoqarfik ilisimatitsivoq, suliffeqarfiit suliffimmi avatangiisinut inatsisinik malinninnersut nakkutilliinermik immikkut ittumik iliuuseqassallutik.
