Atuareernermi ornittakkat atuartitsivittut atorneqassaasut
Nuup ilaani atuareernermi ornittakkat matuneqarput. Ataasinngorpamiit atuareernermi ornittakkani init atuartunut marlunngornerup tungaanut USK-imi atuarsimasunut atuartitsivissatut atorneqartalissapput. USK illorsuarmi oqummik nassaartoqarnerata kingorna matugasuarneqarpoq.
USK illorsuarmi oqummik nassaartoqarnera pissutigalugu matuneqarpoq. Maanna Nuummi atuareernermi ornittakkat matuneqarput. USK-imi atuartut ataasinngornermiit atuareernermi ornittakkani atuartinneqalissapput.
Assi: Kommuneqarfik Sermersooq
Nuummi atuareernermi ornittakkat pingasut matugallarneqassasut Kommuneqarfik Sermersooq aalajangerpoq. Tassaapput Miniklubben Qinngutsinniittoq kiisalu Inneruulat Qajaasallu Nuussuarmiittut.
Meeqqat atuareernermi ornittakkanut taakkununngartartut matusigallarnerup nalaani atuarfimminni inini allaniittassapput.
Atuarfik Ukaliusami oqoqarnera pissutigalugu atuarfimmi init atuareernermi ornittakkaniittut atuarfimmut taartaasutut atorneqartalissapput.
- Meeqqat inuusuttullu atuarnerat siulliullugu qulakkeerneqassaaq. Taamaammat atuareernermi ornittakkat inigisartagaat atorneqarsinnaasut aalajangerpugut. Atuareernermi ornittakkat sumiiffinni allaniissinnaaniassammata aaqqiissutissanik maanna ujartuileruttorpugut, meeqqanut atuarfinnullu aqutsisoqarfimmi pisortaq Lone Nukaaraq Møller oqarpoq.
Atuarfik Ukaliusaq, kommunip 2016-imut atuarfinnut pilersaarutaa naapertorlugu atuartunut 525-nut inissaqartitsisoq, oqoqarnera pissutigalugu matugasuarneqarpoq. Atuartut nukarliit ulluni makkunani atuareernermi ornittakkaniipput, atuartullu akulliit angajulliillu sapaatip akunnerata tulliani ataasinngornerup tungaanut angerlartinneqarlutik.
Atuareernermi ornittakkat suli ammasut
Atuareernermi ornittakkat NUIF aamma Illu ammaannarlutillu ammasarnerminnik sivitsuisut erseqqissassallugu pingaaruteqarpoq. Aammattaaq meeqqat inuusuttullu ataavartumik aaqqiissutissamik nassaartoqarnissaata tungaanut sammisaqarnernut peqataasinnaaniassammata utaqqiisaasumik periarfissanik pilersitsinissaq kommunimit sulissutigigineqarpoq, kommuni ilisimatitsivoq.
Aaqqiissutissat allat piareerpata angajoqqaat atuartullu toqqaannartumik ilisimatinneqassapput.
- Atuareernermi ornittakkat meeqqanut inuusuttunullu amerlasuunut pingaaruteqartut nalunngilarput. Taamaammat piffissami matumani naapittarfissaqarnissaat soqutigisanillu aallussisinnaanissaat qulakkeerniarlugu ilungersorpugut, Lone Nukaaraq Møller oqarpoq.
