KL

DK

Atuarfissap nutaap akuerineqarnissaa kommunip suli ilungersuutigaa

Kommuneqarfik Sermersuumi atuarfissuarmi nutaami Atuarfik Inussummi ikuallattoornermi isumannaallisaanermut periusissiap akuerineqarniarnera suli unammillernartoqarpoq.

Atuartut ilinniartitsisullu atuarfimmut nutaamut 2025-mi nuukkumaartut Kommunip neriuutigaa.
Thomas Munk Veirum
Tusagassiortoq
Saqqummersinneqarpoq

Atuarfik Inussuk nutaarluinnaq Nuup qeqqaniittoq atuartunut ilinniartitsisunullu atulersinnaaqqullugu suli aaqqiissutissarsisoqanngilaq.

Atuarfiup ikuallattoornermi isumannaallisaanermut periusissiaata akuerineqarnissaa suli ajornartorsiutigineqartoq kommuni pingasunngornermi nittartakkamini allappoq.

Kommuni ilisimatitsivoq suliffiup avataani qatserisartutut siunnersortit sulisinneqartut, matumanilu ikuallattoqartillugu isumannaallisaanermut periusissiap Istakimut juulli sioqqullugu tunniutereerneqarsimassasoq naatsorsuutigineqarpoq.

Pimoorullugu suliarineqartoq

Atuarfik 2025-mi atulernissaa naatsorsuutigineqarpoq.

Pissutsit ilungersunartutut isigineqartut Meeqqanut Atuarfeqarnermullu Ataatsimiititami siulittaasoq Poul Petersen oqarpoq, aamma angajoqqaat sulisullu attaveqaqatigiinnerat pitsanngorsarneqassasoq, "pitsaanerusinnaasut nassuerutigineqarlutik“:

- Killiffik pimoorullugu suliaraarput aamma atuartut sulisullu isumannaatsumiitinnissaannut aaqqiissutissarsiorpugut. Peqataanik angajoqqaanik sulisunillu oqaloqatiginnittarnivut pitsaanerusinnaasut nassuerutigaarput, aamma maannamiit ammasumik attaveqaqatigiinnissaq pillugu immitsinnut pisussaatippugut, sapaatip-akunnerani matumani ataatsimiinnermi suliaq oqaluuserineqareersorlu Poul Petersen oqarpoq.

ASK-imi USK-imilu silaannaap pitsaassusaa ajornartorsiutaasoq

Atuarfik nutaaq aasaanerani atuanngiffeqarnerup kingorna atulersinneqartussaagaluarpoq, taamaatiinnarneqarlunili. Taamaattoqarnera pissutigalugu atuarfinni marlunni Atuarfik Samuel Kleinschmidtimi Ukaliussamilu aturfittaamut nuuttussaagaluartuni atuartitsineq ingerlatiinnarneqarpoq.

Atuarfilli taakku marluk atuinnarneqarnerat aamma ajornartorsiorfiuvoq.

Illup iluani silaannaq ajornartorsiutaavoq, taamaammat atuartunut sulisunullu pitsaanerpaamik atuartitsisoqarsinnaanani. Taamaattumik Atuarfeqarnermut Ingerlatsivimmiit inini silaannalunnerpaajusuni silaannarmik saliissutinik/isugutatsitsisartunik ikkussuinissat allanillu pitsanngorsaatissanik sulissutigineqarpoq.

- Tamatuma saniatigut ajornartorsiutit pinartut pitsanngorsaaviginiarlugit aamma atuartut sulisullu atugarissaarnerat isumannaatsumiinnissaallu pingaarnersiorneqarnissaat qulakkeerniarlugit immikkut aningaasaliisoqarpoq, Kommuneqarfik Sermersooq allappoq.

poul petersen samfund inuiaqatigiit indeklima brandsikkerhedsstrategi atuarfik inussuk kommuneqarfik sermersooq

ATORFIIT Se alle jobs

Powered by Labrador CMS