KOMMUNINUT QINERSINEQ 2025
Avaaraq: – Kommune nukittooq, patajaatsoq aalaakkaasorlu tunniutissavara
Kommuneqarfik Sermersuumi borgmesteri qinigaaffimmi qaangiuttumi kommunalbestyrelsip angusaannik naammagisimaarinnippoq. - Soorunami pissangavunga innuttaasunit ingerlaqqinnissannut pisinnaatitsissummik tunissaneraannga imaluunniit borgmesterinngortussamut allamut tunniussissanerlunga, taanna Sermitsiamut oqarpoq.
Borgmesteri Avaaraq Olsen borgmesterinngorpoq qinigaaffiup qeqqinnaani. - Ivertinneqarama sulissutigaara torersumik aalaakkaasumillu kommunitta ingerlaqqilernissaa, suliarlu tamanna iluatsittumik ingerlappara, taamaattumik naammagisimaarinnillunga eqqissillungalu borgmesteritut ingerlaqqinngitsuussaguma tullisannut tunniussissaanga. Borgmesteritut ingerlaqqinnissannut piginnaatitsissummik tunineqassaguma, partiit akimorlugit suleqatigiinnissamut isumaqatigiissummik pitsaasumik qulakkeerinnikkusuppunga, taanna Sermitsiamut oqarpoq.
Assi: Jensine Berthelsen
Nunatsinni kommunini innuttaqqortunerpaami aammalu aningaasaqarnikkut nukittunerpaami borgmesteri, Avaaraq Olsen (IA) kommunalbestyrelsimut qinersinermi innuttaasut qinersinermikkut qanoq aalajangersimanersut pillugu pissangalluni utaqqivoq.
- Soorunami qinersinerup inernera pillugu pissangavunga, soorunami neriuutigivara borgmesteritut ingerlaqqissinnassallunga. Qinersinissamut qanilliartornitsinni pissangaammillattaarpunga, kisianni ullumikkut ulloq nuannersuuvoq eqqissisimaqalungalu atorpara, maannalu qinersinerup inerneranik utaqqivugut.
Kommuni nukittooq, patajaatsoq aalaakkaasumillu ingerlanneqartoq
Qinersinermi ajorsaruit, taava kommuni qanoq ittoq tullissannut tunniussassaviuk?
- Kommuni nukittooq, patajaatsoq aalaakkaasorlu minnerunngitsumillu aamma pissanganartoq! Ukiuni kingullerni marlunni aningaasaqarnikkut unammilligassat annersaat qaangerpagut ingerlallualerlutali. Kommuni aalaakkaasunngortipparput, aammalu kommunitsinni inoqarfinnut akisussaaffinnik nussuineq ingerlassimavarput, taamaalillutik innuttaasut sumiiffimminni annertunerusumik oqaasissaqarlutillu aalajangiisinnaassuseqalernikuupput, namminneq pisariaqartitatik pillugu iliuuseqarsinnaanerulersimallutik, Avaaraq Olsen oqarpoq nangillunilu:
- Taamaalillunga tamakkiisumik eqqissillunga tullissannut kinaassagaluarnersumut tunniussisinnaavunga, kisianni soorunami neriuutigivara innuttaasunit piginnaatinneqarumaarlunga borgmesteritut nangissinnaanissannut.
Partiit akimorlugit suleqatigiinnissaq nanginneqassasoq kissaatigaa
Qinersinermi ajugaassaguit, taava salliutassatit suuppat?
- Siullermik partiit akimorlugit suleqatigiinnissamut isumaqatigiissut pitsaasoq. Tamanna ukiuni sisamani tulliuttuni suliassatsinnut sinaakkutissiisussaammat.
- Kingumut qiviassagutta partiit akimorlugit suleqatigiinneq pitsaasoq siuttuuffigisimavara, aamma politikerit innuttaasullu akornanni tatiginninneq pilerseqqissimavarput, tamannalu tulluusimaarutigaara aammalu nanginnissaanut periarfissaqarnissara neriuutigalugulu kissaateqarfigaara.
Kisiannili nammineq salliutinniakkatit suuppat?
- Kommunip ineriartortinnissaanut periarfissat pitsaanerpaat ujartornissaat nangissallugu, kommunip najugaqarfiini tamani ineriartortitsinissamut suliniutigut naammassilerpagut, tassunga atatillugu iliuusissatut pilersaarusiornissaq tullinnguuppoq, ukiorlu manna naammassineqassalluni. Tamatuma kingorna anguniakkamut aningaasalersuinissaq sulissutigisussaavarput. Tamatuma saniatigut illoqarfiit pingaarnersaannut pilersaarutivut nangissallugit piareersimavugut. Kiisalu minnerunngitsumik suliassanik tigussaasunik pingaarnersiuinerput ingerlaqqissaaq, assersuutigalugu Nuummi utoqqaat illuat, kisianni aamma kommunip sumiiffiini tamani suliniutit allat, Avaaraq Olsen (IA) naggasiivoq.
