BDO-p nalunaarusiaa: Kommunit avinneqarnerat millionilikkaanik akeqassaaq
Aningaasaqarneq eqqarsaatigalugu kommuni nutaaq Ilulissat kommuneqarfissaa nukittunerpaassaaq, kommunilli allat amigartooruteqalissapput. Tamanna kukkunersiuisarfimmit BDO-mit nalunaarusiami Avannaata Kommuniata suliaritissimasaani atuarneqarsinnaavoq.
Kommunip avinneqarnissaa kommunalbestyrelsip aalajangersimagaa, Avannaata borgmesteria Palle Jerimiassen aviisimut Sermitsiamut oqarpoq.
Assiliisoq: Leiff Josefsen
Kommunip avinneqarnerata kingunerisinnaasaanik misissuititsinissamik Avannaata Kommuniani kommunalbestyrelsi suliakkiisimavoq.
Kukkunersiuinermik siunnersuinermillu suliffeqarfik BDO periarfissanik marlunnik naliliisimavoq, kommunillu tamanna nittartakkamini saqqummiuppaa.
Periarfissaq 1-imi Avannaata Kommunia kommuninut marlunnut avinneqassaaq, tassani Ilulissat illoqarfia nunaqarfiilu kommunitut ataatsitut inississallutik, illoqarfiillu sinneri pingasut, Upernavik, Uummannaq aamma Qaanaaq nunaqarfiilu ilanngullugit, kommunitut namminersortutut ataatsitut inississallutik.
Periarfissaq 2-mi Avannaata Kommunia kommuninut sisamanut avinneqassaaq tassani illoqarfiit Ilulissat, Upernavik, Uummannaq aamma Qaanaaq nunaqarfiilu namminersorlutik kommuninngortinneqassallutik.
Periarfissat misissorneqarsimasut assigiinngitsut atorlugit innuttaasut amerlassusaat takussutissami ataani takuneqarsinnaapput:
Grafik: BDO / Avannaata Kommuniata agguataarneqarnissaata kingunerisassaanik nassuiaat
Periarfissaq 1 tulluarnerpaamik avitsinerusoq BDO nalunaarusiami allappoq, kommunimmi taakku marluk inuttussutsimikkut
assigiingajassapput. Periarfissaq 2 malikkaanni kommunit
assigiinngitsorujussuit pilersinneqassapput:
- Pingaartumik Kommuni QA (Qaanaap kommunia) 752-inik innuttaqarluni, kommunimi susassaqarfinni tamani, kiffartuussinermini qaffasissutsip tungaatigut
aporfissaqarsinnaavoq, BDO allappoq.
Ukiumut aningaasartuuteqarnerujussuanngussasut
BDO-p naliliinera naapertorlugu Avannaata Kommuniata avinneqarnera aningaasaqarnikkut millionilikkaanik naleqassaaq, qanorluunniit avinneqaraluarpat.
Periarfissaq 1-mi ukiumoortumik aningaasartuutaanerulertussat 11,75 millionit koruuninut missingerneqarput, ullumikkut Avannaata Kommuniani ingerlatsinermut sanilliullugu. Tamatuma saniatigut
ikaarsaariarnermi aningaasartuutit 17,2 millionit koruuniussapput, BDO naliliivoq.
Naak kommunit nutaat taakku marluk assigiingajammik innuttaqassagaluarlutik, Ilulissat kommunia aningaasaqarnikkut nukittunerulissaaq:
- Taamaalilluni Kommuni IL isertitat aningaasartuutillu eqqarsaatigalugit 57 millionit koruuninik sinneqartooruteqassaaq, Kommunili UUQ 95 millionit koruuninik amingartooruteqassasoq naatsorsuutigineqarpoq, BDO allappoq.
Periarfissaq 2-mi ukiumut aningaasartuutaanerulersussat 37,09 millionit koruuniussangatinneqarput, ullumikkut Avannaata
Kommuniani ingerlatsinermut sanilliullugu.
Tamatuma saniatigut 36,6 millionit koruunit ikaarsaariarnermi aningaasartuutaassapput.
Ataani takussutissami takuneqarsinnaasutut, Ilulissat kommunia ukiumut 57 millionit koruuninik sinneqartooruteqarnissaa naatsorsuutigineqarpoq, kommunillu allat pingasut 39, 37 aamma 44 millionit koruuninik amigartooruteqarnissaat naatsorsuutigineqarluni.
BDO / Avannaata Kommuniata agguataarneqarnissaata kingunerisassaanik nassuiaat
Avannaata Kommuniata avinneqarsinnaanera Naalakkersuisut misissuleruttoraat Naalakkersuisoq Jess Svane (S) aviisimut Sermitsiamut oqarpoq, kommunillu avinneqarsinnaanera naggataatigut Inasisartunit kisimi aalajangiiffigineqarsinnaasoq aamma erseqqissarpaa.
Qaasuitsup Kommuniata avinneqarnera pissutigalugu Avannaata Kommunia pilersinneqarpoq. Qaasuitsup Kommunia 2018-imi januaarip aallaqqaataani Avannaata Kommunianut Kommune Qeqertalimmullu avinneqarpoq.
