BDO-revision, Avannaata Kommunianut
kukkunersiuisut sullissisut,
Avannaata Kommuniata avinneqarnissaata kingunerisinnaasai pillugit
nalunaarusiamik juulip qiteqqunnerani tunniussissaaq. Nassuiaatip
imarisaa ilisimaneqarniassammat illoqarfinnut tamanut agguaanneqassaaq.
– Kommunip immikkoortortaqarfiisa aningaasaqarnerat, isertitaat
aningaasartuutaallu, ingerlatsinerat allaffissornerullu aningaasartuutai
tassani takuneqarsinnaassapput. Nassuiaat siusinnerusukkut pissarsiaraarput,
Namminersorlutilli Oqartussat paasissutissanik nassuiaammi atorneqartussanik
tunniussiniarnerat arriimmat naammassinissaa kinguaattoorfiuvoq, Avannaata
Kommuniani borgmesteri Palle Jeremiassen (attaviitsoq) Avannaata Kommuniata
avinneqarnissaanut politikkikkut suliap inissisimaffia pillugu nassuiaavoq.
Kommunalbestyrelsi Anthon Frederiksenip (N) siunnersuutaa tunngavigalugu
kommunip avinneqarnissaa kommunalbestyrelse
tunngaviusumik aalajangerpoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
BDO-revision, Avannaata Kommunianut
kukkunersiuisut sullissisut,
Avannaata Kommuniata avinneqarnissaata kingunerisinnaasai pillugit
nalunaarusiamik juulip qiteqqunnerani tunniussissaaq. Nassuiaatip
imarisaa ilisimaneqarniassammat illoqarfinnut tamanut agguaanneqassaaq.
– Kommunip immikkoortortaqarfiisa aningaasaqarnerat, isertitaat
aningaasartuutaallu, ingerlatsinerat allaffissornerullu aningaasartuutai
tassani takuneqarsinnaassapput. Nassuiaat siusinnerusukkut pissarsiaraarput,
Namminersorlutilli Oqartussat paasissutissanik nassuiaammi atorneqartussanik
tunniussiniarnerat arriimmat naammassinissaa kinguaattoorfiuvoq, Avannaata
Kommuniani borgmesteri Palle Jeremiassen (attaviitsoq) Avannaata Kommuniata
avinneqarnissaanut politikkikkut suliap inissisimaffia pillugu nassuiaavoq.
Kommunalbestyrelsi Anthon Frederiksenip (N) siunnersuutaa tunngavigalugu
kommunip avinneqarnissaa kommunalbestyrelse
tunngaviusumik aalajangerpoq.
Borgmesterip Namminersorlutik Oqartussanut qinigaaffiup sivitsorneqarnissaanuf noqqaassuteqassasoq, taamaaliornikkut kommunalbestyrelsip kommunip
avinneqarnera naammassiniassammagu.
– Kommunalbestyrelsimit peqquneqarpunga Namminersorlutik Oqartussat
qinigaaffimmik minnerpaamik ukiumik ataatsimik sivitsuinissamik
qinnuteqaqqullunga. Ikaarsaariarnermi piffissaq qulakkeerniarlugu, Palle
Jeremiassen oqarpoq.
Innuttaasut taasitinneqarnissaat
BDO-p nalunaarusiaata utaqqinerani aaqqissuusseqqinnissamut periarfissat
assigiinngitsut suliarineqarput.
Kommunalbestyrelsimi ilaasortaq Bendt B. Kristiansen (IA)
siunnersuuteqarpoq kommunip avinneqarnera pillugu innuttaasunik
taasititsisoqassasoq. Kommunip avinneqarnissaanut siunnersuut innuttaasunillu
taasisitsinissaq ataatsimut suliarineqassasut, tamannalu novembarimi pissasoq
Kommunalbestyrelsimi ilaasortat isumaqatigiissutigaat.
– Kommuni qanoq avinneqassanersoq suli aalajangerneqanngilaq.
Kommunalbestyrelsip immikkut ataatsimiinnerani tamanna oqaluuserineqassasoq
naatsorsuutigaara, kommunalbestyrelsili aalajangerpoq kommuni avinneqarssasoq
tamannalu naammassineqassaaq, Palle Jeremiassen nassuiaavoq.
Aaqqissuussaanermut
isumalioqatigiissitap suliaa utaqqinianngikkaat
Naalakkersuisut Kommunillu akornanni politikkikkut
ataqatigiissaarisut kommunit aaqqissuussaanerat pillugu siorna
suleqatigiissitaliorput. Politikkikkut ataqatigiissaarisut kingullermik
ataatsimiinneranni aaqqissuussaanermut isumalioqatigiissitaq pilersinneqarpoq,
taannalu kommunit aaqqissuussaanerannik maanna atuuttumik nalilersuissaaq
aaqqiissutissanillu allanik siunnersuuteqassaaq. Taakkulu kommunip
aaqqissuussaanera pillugu suliaat utaqqineqarpoq.
Avannaata Kommuniatali politikkikkut
ataqatigiissaarisut isumaqatiginngilaat kommunillu avinnissaanut suliaq
ingerlatiinnarlugu, kommunalbestyrelsip ataatsimiinnerani imaqarniliami
allassimavoq:
“Kommunit taamatut isikkoqarlutik
ingerlaqqissinnaanerat tassanilu akisussaaffinnik/oqartussaaffinnik
sumiiffinnut annerusumik tunniussisinnaaneq atorfillit akornanni
suleqatingiissitamik ingerlanneqassasoq isumaqatigiittoqarpoq. Avannaata
Kommunia uani aalajangernermi isumaqataanngilaq kommunalbestyrelsip
suliakkiussaa ingerlammat.”
Taamaattumik Avannaata Kommuniani borgmesteri
nalunaarpoq kommunimi atorfillit politikkikkut ataqatigiissaarisut
suleqatigiissitaanni kommunip aaqqissuussaanerata nalilersorneqarneranut
peqataassanngitsut.
– Kommunalbestyrelsip tunngaviusumik aalajangerpaa
kommuni avinneqassasoq. Tamatuma saniatigut kommuni suleqatigiissitanut maanna
kommunip aaqqissugaanera attatiinnarneqarnissaanik tunngavilimmut
peqataassappat, tamanna politikkikkut aalajangiussamut naapertuutinngilaq,
Palle Jeremiassen oqarpoq.
Kommunip
avinneqarnissaa pillugu paasititsiniaaneq
Illoqarfinni kommunip avinneqarnissaa pillugu
paasititsiniaasoqassasoq, tamannalu borgmesterimit ingerlanneqassasoq Avannaata
Kommuniani kommunalbestyrelsi aalajangerpoq. Tamatumalu kingorna novembarimi
2024-mi kommunip avinneqarnissaa pillugu innuttaasunik taasititsisoqassasoq
ilanngullugu aalajangiunneqarpoq.
"Illoqarfinni paasititsiniaanerit
ingerlanneqarneranut atatillugu Nunaqarfinni Siulersuisut siulittaasui
peqataasassapput, taakkualu sumiiffimminnut angerlartassapput
paasititsiniaanerit ingerlateqqillugit. Taamatut periuseqarnermi sumiiffiit
tamarmik anguneqarsinnaapput nalunaarusiap imarisaanik paasititsiniaanermi.
Paasititsiniaanerit ingerlareerpata taasititsisoqarnissaa
tullinnguussinnaavoq", imaqarniliami allassimavoq.
Nunamut namminermut naalakkersuisoq Jess
Svane Avannaata Kommuniata avinneqarnissaanut tunngasumik borgmesterimit Palle
Jerimiassenimit pisortatigoortumik saaffigineqareeruni aatsaat oqaaseqarumavoq.
