Blok 5-mi toqutsineq: Angutit marluk maanna tigummigallagaalerput
Angut 41-nik ukiulik sapaatiummat ulluni 25-ni tigummigallagassanngortinneqarpoq, taanna angullu 25-nik ukiulik angummik 20-nik ukiulimmik toqutsisimasutut unnerluutigineqarput.
Assiliisoq: Leiff Josefsen
Blok 5-imi toqutsisoqarsimaneranut atatillugu angut 41-nik ukiulik angummik 20-nik ukiulimmik toqutsisimasutut unnerluunneqarluni ulluni 25-ni tigummigallarneqalersoq, Kalaallit Nunaanni Politiit tusagassiutinut nalunaarummi allapput.
Angut 41-nik ukiulik arfininngormat tigusarineqarpoq 20-nillu ukiulimmik toqutsisimasutut unnerluutigineqarluni. Taanna Blok 5-ip pequusiviani oktoberip sisamaani toqungasoq nassaarineqarsimavoq.
Angutit marluk unnerluutigineqarput
20-nik ukiullip nassaarineqarneranit ullut marluk qaangiuttut — oktobarip arfernani — angut 25-nik ukiulik aamma suliamut tamatumunnga atatillugu ulluni 25-ni tigummigallarneqalerpoq.
Angutip 41-nik ukiullip tigusaaneranut unnerluutigineqarneranullu suna pissutaanersoq politiit oqaatigisinnaanngilaat, suliamut paasiniaaneq suli ingerlanneqarnera pissutigalugu.
Matut matoqqasut
Angut matoqqasumik sassartinneqarpoq, tusagassiutinullu nalunaarummi allassimanngilaq angut unnerluutigineqarnermut qanoq isumaqarnersoq imaluunniit tigummigallarneqarnissani suliareqqitassanngortissimaneraa.
Oktobarip qulingiluaani politiit innuttaasunut kajumissaaripput toqutsisoqarnerani Blok 5-ip eqqaani pasinartumik pisoqarsimappat politiinut nalunaarutigissagaat.
