NUUMMI BLOK 5-imi TOQUTSINERMIK SULIAQ
Takunnissimasinnaasunit politiit suli attavigineqarusupput
Kalaallit Nunaanni Politiit angummik 20-nik ukiulimmik Nuummi blok 5-imi quimi toqutaasimasutut ilimatsaassamik misissuinerat suli ingerlanneqarpoq, tassungalu tunngatillugu Toqusimasunik misissuisartoq pinerluttoqarsimaneranillu misissuisartoq ikiortigalugit politiit misissuipput. - Innuttaasut kingumut kaammattussavagut, blok 5-ip eqqaani pasinartumik pissusilersortunik takunnissimasinnaasunit attavigineqarnissarput suli pisariaqartipparput, misissuinermi pisortaq Malik Sandgreen oqarpoq.
- Suli misissuineq ingerlapparput, suliarlu matoqqasumik ingerlanneqarmat, annertunerusumik paasissutissiisinnaanngikkallarpugut, misissuinermi pisortaq Malik Sandgreen pingasunngornermi tusagassiortunik katersortitsinermi taamak oqarpoq.
Assiliisoq: Leiff Josefsen
Tallimanngorneq oktobarip sisamaanni Nuummi innuttaasut ilaat blok 5-mi queqarfimmi inummik toqungasumik naammattoorsivoq. Arfininngornermi oktobarip tallimaanni politiit angummik 25-nik ukiulimmik tigusarinnipput, taanna 20-nik ukiulimmik toqutsisimasutut pasineqarpoq.
Politiit pingasunngornermi ualikkut tusagassiortunik katersortitsipput suliaq pillugu. Taamaattorli Politiit annertunerusumik paasissutissiisinnaanngillat:
- Suli misissuineq ingerlapparput, suliarlu matoqqasumik ingerlanneqarmat, paasissutissanik amerlanerusunik saqqummiussisinnaanngikkallarpugut, misissuinermi pisortaq Malik Sandgreen oqarpoq.
Pasisaq tigummigallarneqarpoq sulilu tigummigallarneqassalluni. Sermersuup eqqartuussiveqarfiani pineqartoq sassartinneqarpoq sapaammi oktobarip arfernganni nalunaaqutaq 17.00. Inatsit tunngaviusoq naapertorlugu angutip sassartinneqarnera matoqqasumik ingerlanneqarpoq. Pasineqartoq ulluni 25-ni tigummigallagassanngortinneqarpoq, taassumalu nunatta eqqartuussivianut suliaq ingerlateqqippaa.
Pasineqartoq kisimiilluni toqutsisimasutut pasineqarpa imaluunniit toqutsinermi inuit arlaliusimasinnaappat?
- Oqaatigineqareersutut misissuineq suli ingerlavoq, taamaattumik maannakkut sukumiinerusumik nassuiaateqarsinnaanngilanga, kisianni uppernarsarsinnaavara paasissutissat pinerluffiusimasumilu nassaat Danmarkimut nassiussorneqartut misissoqqissaarneqarnissaat siunertaralugu, misissuinerlu ingerlanneqarmat akissinnaanngikkallarpara pasineqartoq kisimiissimanersoq arlaliusimanersulluunniit.
Kisianni innuttaasunut nalunaaruteqarpusi isumannaatsumik angalasinnaasut, sulili nalunarluni pasineqartoq kisimiissimanersoq ilaqarsimanersorluunniit?
- Aap, ilumoorpoq, misissuinerput naapertorlugu nalunaarutigisimavarput inuit illoqarfimmi isumannaatsumik angalasinnaasut, taamaattorli oqaatigineqareersutut, misissuineq suli ingerlanneqarmat sukumiinerusumik oqaaseqarsinnaanngilanga.
Takunnissimasinnaasut suli attavigineqarusupput
Kalaallit Nunaanni Politiit suli kissaateqarput innuttaasunik pasitsannartumik pissusilersortoqarneranik takunnissimasinnaasunik arlaatigulluunniit paasissutissanik pigisaqarsinnaasunik.
Taamaattumik politiit toqungasumik nassartoqarnerata kinguninngua takunnissimasinnaasunik ujartuillutik aallartipput, nassaartoqaqqammiinnartorlu kaammattuutigineqarluni toqungasumik nassaartoqarnissaata sapaatip akunnera sioqqullugu arlaannik pasitsannarsinnaasunik takunnissimasinnaasut attaveqaqqullugit, tassa piffissami septembarip 27-ata missaaniit toqungasup timaata nassaarineqarnerata arfininngornermi oktobarip 5-ata tungaanut.
- Misissuinermi atatillugu innuttaasunit takunnissimasinaasunit, paasissutissaateqarsinnaasunit aammalu videoliuutiminni pasitsannartumik immiussisimasinnaasunit attavigineqarnissarput suli pisariaqartipparput.
- Politeeqarfimmut ornigulluni saaffiginnittoqarsinnaavoq aamma sianerluni 70 14 48-mut saaffiginnittoqarsinnaavoq, misissuinermi pisortaq Malik Sandgreen oqarpoq.
