SISIMIUNI SAVIMINILERINERMIK ILINNIARFIK NUTAAQ
Borgmester Malik nuannaarpoq: Kommunemut inussuttunullu nutaarsiassatsialak
Qeqqata Kommuniani kommunalbestyrelse ukiuni arlalinni ilungersorluni sulissuteqarsimavoq Saviminilerinermik Ilinniarfiup Nuummit Sisimiunut nuunneqarnissaa pillugu. - Nutaarsiassaavoq nuannersoq Naalakkersuisut pilersaarutit atuutiinnarnissaat pillugu aalajangiusimanninnerat, tamanna kommunimut aamma inuusuttunut iluaqutaassaaq, borgmester Malik Berthelsen (S) nuannaarluni oqarpoq.
Pilersaarutit naapertorlugit 2030-mi Sisimiuni Saviminilerinermik ilinniarfik nutaaq naammassineqassaaq.
Asseq toqqorsivimmit: Leiff Josefsen
Qeqqata Kommunianit ukiuni arlalinni kissaatigisaavoq Sisimiut ilinniarfinnut teknikkimut tunngasunut katersuuffiussasoq, tassami KTI Tech College Greenland-imi ilinniarneqarsinnaasut teknikkimut tunngasut, sanaartornermut tunngasut aammalu aatsitassarsiornermut ilinniarfik tassaneereermata . Jern- aamma metalskolen aamma KTI-mut atavoq, kisianni taanna Nuummi inissisimalluni.
Maanna ilimanarsilluinnaarpoq inuussutissarsiutinut ilinniarfiit kiisalu teknikkimut qaffasinnerusumik ilinniarfiit Sisimiuni katersorneqarniartut, tamannalu borgmesterip Malik Berthelsen-ip (S) nuannaarutigaa:
- Soorunami nuannaarutigaara Naalakkersuisut nutaat aalajangermata pilersaarutit attatiinnarneqassasut Saviminilerinermik Ilinniarfiup Nuummiit Sisimiunut nuunneqarnissaa pillugu. Tamanna Qeqqata Kommuniata aammalu Sisimiut siunissaanut pingaaruteqarluinnarpoq, Malik Berthelsen oqarpoq nangillunilu:
- Kangerlussuup atorneqarnerata allanngorneranut atatillugu kommunitsinni innuttaasut ikileriarujussuarsimapput, 2024-mut sanilliullugu ukioq manna 2025-mi innuttaasut 150-t annaasimalereerpagut, tamannalu soorunami uagutsinnut annernartuuvoq, aamma akileraarutitigut isertitanik annaasaqarpugut.
Sisimiut teknikkimut ilinniarfiit katersuuffiattut
Borgmester Malik Berthelsen kommunimi suliffiit amerlasuut matuneqarsimaneranut Nuup mittarfia ammarneqarneranut atatillugu innersuussivoq, erseqqissarlugulu kommuni isertitaqarfissanik nutaanik pisariaqartitsisoq.
Borgmesterip aamma naqissuserpaa pilersaarutit aalajangersimasut Saviminilerinermik Ilinniarfiup nuunneqarnissaani kommunip aningaasaqarneranut iluaqutaaginnassanngitsoq kisiannili aamma Sisimiuni DTU peqatigalugu teknikkimut tunngasunik ilinniarfiit katersorneqarnissaat kissaatigineqartup piviusunngortinneqassammat, tamannalu inuiaqatigiinnut tamarmut aamma inuusuttunut iluaqutaassaaq.
- Naalakkersuisut nikittartut ukiuni arlalinni suliaq pillugu aalajangiisarsimapput, kisianni maanna pilersaarutit piviusunngortinneqarnissaat periarfissaalerpoq Naalakkersuisut nutaat tamatuminnga suliaqarmata, tamannalu assorujussuaq nuannaarutigaara, tassami tamanna neriuummik siunissamillu qaamasumik pilersitsivoq, Qeqqata Kommuniani borgmesteri Malik Berthelsen (S) Sermitsiamut oqarpoq.
