Borgmesteri qujassuteqartoq: Nammineq kajumissusillit nutaanik periarfissiipput
Sisimiuni innuttaasut kajumissutsiminnik suliaqartut nammineq piffissartik atorlugu aqqusiniorput, maannalu illoqarfimmi innuttaasut pinngortitaminnissaminnut periarfissaqarnerulerput, tamannalu borgmesterip qujassutigaa.
Foto: Tôrtia Reimer-Johansen
Sisimiuni innuttaasut pingasut Sisimiuni Akiani Kangerluarsunnguaq kaajallallugu pisuttuartarfittut sikkilertarfittullu atugassamik aqqusinioqqammerput. Krister Støvlbæk, Klaus Møller erneralu Malik qaammatialunni aqqusiniorlutik ulapaarput, maannalu innuttaasunut takornarianullu atorneqarsinnaasunngorlugu naammassillugu. Iliuusaat borgmesterimiit nersualaarneqarlunilu qujamasuutigineqarpoq:
- Siullermik isumaqarpunga nammineq kajumissutsiminnik suliaqartut, ingammik Klavs erneralu Malik, piffissaq taamak annertutigisoq atorlugu innuttaasunut taamak annertutigisumik tunissuteqarnerat pillugit innuttaasut sinnerlugit assorujussuaq qujaffigalugilliu nersualaartariaqarlugit, Malik Berthelsen (S) oqarpoq.
Nammineq kajumissuseqarneq arlalinnik periarfissiivoq
Borgmesteri Malik Berthelsen isumaqarpoq nammineq kajumissutsiminnik suliaqartut takutikkaat nammineq periarfissat qanoq nuannernerulersinneqarsinnaallutillu amerlisarneqarsinnaanersut.
- Isumaqarpunga suliaqartut takutikkaat nammineq aamma qanoq iliuuseqaqataanikkut najugaqarfigisami periarfissat qanoq nuannernerulersinneqarsinnaallutillu amerlisarneqarsinnaanersut, Malik Berthelsen oqarpoq naggaserlugulu:
- Klavs, Malik, Krister, kommunimut innuttaasunullu tunissutissinnut qujanarsuaq, kakkaqaasi!
