Borgmesterinngornissamut isumaqatiginninniarnerit ingerlapput: Kaffisungaatsiarpugut
Kommuneqarfik Sermersuumi isumaqatiginninniarnerit aallarteqqammersut IA-p siuttuuffigigai.
Avaaraq S. Olsen apriilip aallaqqaataani kommunimut aamma qinersiartorpoq.
Assi: Oscar Scott Carl
Kommuneqarfik Sermersuumi kommunalbestyrelsinut nutaanut minnerunngitsumillu borgmesterinngornissamik isumaqatiginninniarnerit aallartilaarput.
Avaaraq Olsen (IA), isumaqatiginninniarnernik aqutsisoq, Sermitsiamit oqaloqatigineqarpoq, taassumalu oqaatigaa arriitsumik aallartisartoqartoq.
- Kaffisoqatigiilluni ataatsimiinnerit suli ingerlappagut. Partiit tamaasa aggersartussaavakka tamatumalu kingorna killiffiit pillugit paasititsiiuamaarluta.
- Pisarnerit malillugit naapeqatigiissaagut, partiit aamma nalunaarfigaakka isumaqatigiinniarnerit politikerit akornanni ingerlassasut, piareersimaleruttalu tusagassiuutinut nalunaaruteqarumaarluta, oqarpoq.
Avaaraq Olsen borgmesteriugallarpoq. Kommunimi suliat tukattut ilaatigut ineqarnermut suliaq pissutigalugu Charlotte Ludvigsen 2022-mi borgmesteritut tunuarmat taarserpaa.
Kikkut tamarmik peqataapput
Inuit Ataqatigiit Siumullu kommunalbestyrelsimut qinersisoqarmat arfineq-marlunnik ilaasortaatitaqalerput. IA-lu amerlanernik qinerneqarmat isumaqatiginninniarnermut taakku aqutsisuupput. Avaaraq Olsen oqarpoq.
Isumaqatiginninniarnerilli pillugit maannamut oqaasissaqarpallaanngilaq.
- Kaffisungaatsiarpugut.
Partiit tamarmik isumaqatiginninniarnermut suli ilaappat?
- Kikkut tamarmik kaffisoqatigiinnermut ilaapput, peqataatitsinngitsoortoqanngilaq, Avaaraq Olsen ima oqarpoq.
IA Kommuneqarfik Sermersuumi 2.767-init taaneqarpoq Siumumiillu 2.511-nit qinerneqarluni. Avaraaq Olsen qinerneqarnerpaat tulliulluni 684-inik qinerneqarpoq, Martha Abelsenilu (S) 713-init taaguunneqarluni qinerneqarnerpaavoq.
Kommunimi ilaasortat ima agguataarneqarput: IA aamma Siumut tamarmik arfineq-marluk, Demokraatit sisamat Naleraq ataaseq.
