Borgmesterip pisortaanissani toqqaraa
Kommune Qeqertalimmi Alida C. Rafaelsen pisortaanertut atorfinitsinneqassasoq kommunalbestyrelsip ataatsimiinnerminni aalajangerpaat.
Alida C. Rafaelsen Kommune Qeqertalimmi pisortaaninngorpoq. Alida C. Rafaelsen allaffissornermik ingerlariaqqiffiusumik EVU-mi aningaasaqarnermik allaffissornermillu siunnerfilimmik ilinniagaqarpoq.
Assi: Kommune Qeqertalik
Kommune Qeqertalimmi borgmesterip Simigaq Heilmannip (D) pisortaanissani toqqarpaa. Alida C. Rafaelsen, siornatigut kommunimi allattoqarfimmi pisortaasimasoq naatsorsuuserinermilu aamma pisortaasimasoq atorfinitsinneqarpoq.
Kommunalbestyrelsi tallimanngornermi oktobarip pingajuanni ataatsimiinnermini Alida C. Rafaelsenip atorfinitsinneqarnissaa aalajangiukkaat, Kommune Qeqertalik tusagassiuutitigut nalunaarummi ilisimatitsivoq.
Alida allattoqarfimmi
pisortatut aamma naatsorsuuserinermi pisortatut Kommune Qeqertalimmi atorfeqartareernikuuvoq. Pisortaanertut aamma misilittagaqarpoq, taamaattumik Alida kommunip
suliffeqarfittut aaqqissuussaaneranik annertuumik ilisimasaqarpoq, kommunip allappoq.
- Alida sulinermigut
ilungersuussillaqqissuuvoq, aamma kommunimi pisortaanertut
misilittagaqarluarmat Kommune Qeqertaliup ineriartorteqqinnissaanut suleqatigiilereernerput
aallartilluareersoq nangeqqinnissaanut qilanaarlungalu toqqissisimavunga, Kommune Qeqertalimmi borgmesteri Simigaq Heilmann oqarpoq.
Suliassat aallartinnissaannut qilanaartoq
Kommunimi pisortaaninngortup tatigineqarnini nuannaarutigalugulu sulilernissani qilanaaraa:
- Assorujussuaq nuannaarutigivara atorfinitsinneqarlunga, kommunalbestyrelsimillu suleqateqalernissara qilanaaralugu. Suliassat anguniakkallu - imaannaanngitsuusinnaasut pissanganartullu - kommunimi immikkoortuni tamani sulisut amerlasuut peqatigalugit aallartinnissaannut qilanaarpunga, Alida C. Rafaelsen oqarpoq.
Alida C. Rafaelsen Kommune Qeqertalimmi pisortaanerugallartutut 2025-imi juunimiilli atorfeqarsimasoq kommunip ilanngullugu paasissutissiissutigaa.
