OQAATSIT INATSISARTUNI ATORNEQARTUT
Brobergip pasilliutaanut Mimi Karlsen akissuteqarpoq
Naleqqap siulittaasua, Pele Broberg Inatsisartut siulittaasuanut pasilliuteqarpoq qinikkanut nipangersaaniarnerarlugu. Maanna Inatsisartut siulittaasuat inussiarnersumik taamaattorli aamma aalajangersimasumik akissuteqarpoq erseqqissaalluni inatsisit malittarisassallu sukkulluunniit atuuttut malinneqartussaasut. - Ilaasortap Inatsisartoqarnermi malittarisassat ilisimanagit (imaluunniit akuerinagit) siulittaasoq siulittaasoqarfilluunniit aaqqiagiinnginnermut akuliutsinniarsarippagu, tamanna siulittaasup inussiarnersumik itigartittariaqarpaa. Akerlianilli ilaasortaq ikiorneqarnissaminik ilitsersorneqarnissaminillu pisariaqartitsippat siulittaasup matua ammajuarpoq, taanna erseqqissaavoq.
Inatsisartut siulittaasuata erseqqissaatigaa nammineq Inatsisartuni siulittaasutut siulittaasoqarfiullu arlaannaatigulluunniit inatsisartuni ilaasortat siunnersuutaannik suliaqarnerminni soqutigisarsorneq tunngavigalugu sulinikuunatik.
Assiliisoq: Leiff Josefsen
Partii Naleraq piffissami matumani Inatsisartut ataatsimiinnerini oqaatsit sorliit atorneqassanersut annertuumik ukkatarinnippoq.
Naleqqami siulittaasoq, Pele Broberg nammineq 2018-mi aningaasaqarnermut Naalakkersuisuugallarami parteeqatiminut erseqqissaateqarnikuuvoq, Naalakkersuisut Inatsisartut siulittaasoqarfiata sinnerlugu akissuteqassanngitsut.
Kisianni taamaattoq Inatsisartuni ilaasortatut aalajangersimavoq siunnersuummik saqqummiussissalluni, aamma siunnersuutigisani Inatsisartut namminneerlutik suleriaasiannut attuumassuteqaraluarpalluunniit taamaalillunilu Naalakkersuisunut (inatsisinut atuutsitsisunut) suliassanngortinneqarsinnaanngitsoq.
Inatsisartut siulittaasuat apeqqusersorpaa
Siunnersuutimi oqaluuserisassanut ilanngunneqannginneranik aallaaveqartumik, Borbergip toqqarpaa Inatsisartut Siulittaasuat apeqqusersussallugu qinikkanillu nipangersaaniartutut pasilliuteqarfigissallugu.
Pasilliut aallaqqaammut Inatsisartut Siulittaasuata tusagassiuutit aqqutigalugit akissuteqarfiginngilaa, taamaattorli siunnersuuteqartumut toqqaannartumik saaffiginnissuteqarluni akissuteqaqqaaraluarpoq. Aammali allagarsiani taanna Pele Brobergip toqqarpaa tamanut siammartissallugu, isumaqarami allagaq siulittaasoqarfimmi soqutigisarsortoqarneranut uppernarsaataasoq.
- Uannit allakkanut tusagassiorfinnut nalunaarummi taaneqartunut tunngatillugu uppernarsarsinnaavara tusagassiorfitsigut oqaaseqaatai pissutigalugit ilaasortamut pineqartumut (Pele Brobergimut) pisortatigoortumik allakkanik Inatsisartut Siulittaasuattut qanittukkut nassiussisariaqarsimagama. Inatsisartunut sukkulluunniit Siulittaasuusup aammalu Inatsisartunut ilaasortat akornanni tatigeqatigiinneq eqqarsaatigalugu allakkat taakku oqaaseqarfigisinnaanagillu takutissinnaanngilakka, Mimi Karlsen erseqqissaavoq nangillunilu:
- Ataatsimulli isigalugu taamaallaat paasissutissiissutigisinnaallugu Inatsisartunut sukkulluunniit Siulittaasuusup suliassarimmagu Inatsisartutigoortumik sulinermi aammalu ilaasortanut ataasiakkaanut partiinullu maleruagassat assigiinngitsut malitsinnissaat kiisalu qulakkiigassaralugu Inatsisartut ilaasortanut sulisunullu suliffeqarfiunissaa pitsaasoq toqqissisimanartorlu.
- Siulittaasoq ilaasortanut tamanut (atorfilittanullu tamanut) sinniisuuvoq. Suliassap tamatuma ilaatigut kingunerisarpaa Inatsisartunut ilaasortamut siulittaasup saaffiginnissuteqarnissaata ilaatigut pisariaqalersinnaanera. Siulittaasumit ilaasortamut allakkat tamanut saqqummiunneqarnerisigut ilaasortaq “tusagassiorfikkut tamanut saqqummiunneqartutut” misigippat ajornartorsiutaasinnartut akuerineqarlutik paaseqatigiiffiulluartumik ataatsimoortumik aaqqiiviginiarneqarnissaannut periarfissanik siuarsaataanavianngilaq. Taamaattumillu ajornartorsiutaasinnartut oqaloqatigiinnikkut – pingaartumik siulittaasup tungaanit isigalugu aaqqiivigineqarnissaat tamanut saqqummiussiffiusussaanngitsumik – aaqqiiviginiarneqarnissaat pisariaqartinneqarpoq.
- Tamannarpiarlu pissutigalugu Inatsisartut Siulittaasuattut ilaasortamut allakkama imarisaat pillugit tusagassiorfinnut oqaaseqarneq ajorpunga, tassa ilaasortap pineqartup nammineerluni tamanut saqqummiunnissaat toqqarsimanngippagu, Mimi Karlsen erseqqissaavoq.
Inatsisartut suleriaasiaannut tunngassuteqarpoq
Inatsisartut siulittaasuata ilanngullugu uppernarsarpaa suleriaatsimi oqaatsinut aalajangersakkat pillugit aalajangiiffigisassatut siunnersuut Inatsisartut ataatsimiinnissaanni aggersumi oqaluuserisassanut Siulittaasoqarfimmit ilanngunneqarsinnaasimanngimmat:
- Siunnersuutit oqaluuserisassanut ilanngunneqarnissaat pillugit isummerfiginnikkaangami, siulittaasoqarfiup nakkutigisassaraa malittarisassat tamarmik malinneqarsimanersut.
Tassunga atatillugu aamma siulittaasoq erseqqissaavoq naalakkersuinikkut arlaannaannulluunniit attuumassuteqanngitsumik suliaq ingerlanneqartussaasoq. Arlaata ima oqaatiginikuuaa; siulittaasoqarfimmi ataatsimiinnissamut isinnginnerminni siulittaasoqarfimmut ilaasortat “partiimut sorlermut ilaasortaanerminnut natsatik” peeqqaartaraat.
- Siulittaasup (siulittaasoqarfiulluunniit) akerlilerneqarneq ajornerata aamma nassatarisaanik siulittaasup ilaasortaq akerlilerniarneq ajorpaa. Tassa inersuarmi aamma tusagassiorfitsigut. Ilaasortap Inatsisartoqarnermi malittarisassat ilisimanagit (imaluunniit akuerinagit) siulittaasoq siulittaasoqarfilluunniit aaqqiagiinnginnermut akuliutsinniarsarippagu, tamanna siulittaasup inussiarnersumik itigartittariaqarpaa. Akerlianilli ilaasortaq ikiorneqarnissaminik ilitsersorneqarnissaminillu pisariaqartitsippat siulittaasup matua ammajuarpoq, Mimi Karlsen naggasiivoq.
