INATSISARTUNI OQAATSINIK ATUINEQ
Oqaatsinik sorlernik atuisoqassanersoq piumasaqaat itigartinneqartoq
Inatsisartut ataatsimiittarfianni kalaallisut oqaatsit kisimik atorneqaqqusaalissasut Naleraq Inatsisartunut aalajangeeqqusilluni siunnersuuteqaraluarpoq. Inatsisartulli siulittaasoqarfiata siunnersuut itigartitsissutigimmagu siunnersuuteqartoq annikinngitsumik kissaammerpoq.
Assiliisoq: Leiff Josefsen
Nuna tamakkerlugu politikkikkut suliaqarnermi oqaatsit sorliit atorneqassanersut pillugit apeqqusiineq Naleqqamit saqqummiunneqarpoq 2018-imi.
Taamani Inatsisartuni ilaasortaq, Jens Napãtôk (N) apeqquteqarpoq Suna inatsit imaluunniit peqqussut toqqammavigalugu Inatsisartut aalajangiiffigisassatut siunnersuutaat, allannguutissatut siunnersuutaat, nassuiaatitseqqussutit, apeqquteqaat aallaavigalugit oqallinnerit aamma Naalakkersuisunut apeqqutit oqaatsit
marluk atorlugit ”taamaallaat” saqqummiunneqarsinnaatitaanersut (apeqqut 118/2018, aaqq.).
Parteeqataa, taamani aningaasaqarnermut naalakkersuisuusoq, Pele Broberg akivoq "Apeqqut Inatsisartut Siulittaasoqarfiata suliassaqarfianut attuumassuteqartoq".
Aningaasaqarnermut naalakkersuisuusimasup Pele Brobergip parteeqamminut Jens Napãtôk-mut 2018-mi akissutaa
Tusarfik: Inatsisartut
Maanna 2024-mi Pele Broberg (N) nammineq Inatsisartuni ilaasortatut assingusumik ujartuillunilu piumasaqarpoq, tamatumuunali piumasaqaatigalugu kalaallisut oqaatsit Inatsisartut ataatsimiittarfiani kisimik atorneqassasut.
Kisianni Pele Brobergip siunnersuutaa Inatsisartut siulittaasoqarfiannit itigartinneqarpoq, tamannalu Brobergip kissaammissutigingaatsiarsimavaa:
- Maanna, Inatsisartut siulittaasuat Mimi Karlsen (IA) siuttuliullugu, innuttaasut ammasumik
malinnaasinnaajunnaarsinneqarlutik, inuiaqatigiit qinigaasa oqallinnissaat nipangersarneqarpoq, Pele Broberg isornartorsiuivoq nangillunilu:
- Siunnersuut tamanit malinnaavigineqarsinnaalluni oqallisigineqarpat, oqaatsitsinnut tunngasunik partiit
allat isumavitsik inuiaqatigiinniit takutittussanngussavaat. Itigartitsineq politikkerneruvoq,
qaqinneqarunimi Naalakkersuisoqatigiimmi partiivinut kusanarnaviannginnami - Pele Broberg oqarpoq.
Sermitsiamit Inatsisartut siulittaasuat oqaaseqartinniarlugu sulissutigaarput, matumani qinikkanik nipangersaaniartutut pasillerneqarmat.
