Danmarki kalaallinut naapertuutinngitsumik pineqarsimasunut saammaasseqatigiinnissamik aningaasaateqarfimmik pilersitsiniarpoq

Danmarki kalaallinut naapertuutinngitsumik pineqarsimasunut saammaasseqatigiinnissamik aningaasaateqarfimmik pilersitsiniarpoq

Danskit naalakkersuisui kalaallinut naapertuilluanngitsumik pineqarsimasunut saammaasseqatigiinnissamik siunertalimmik aningaasaateqarfimmik pilersitsiniarput — soorlu arnanut spiralilersorneqarsimasunut taarsiivigineqarnissamik piumasaqartunut atorneqarsinnaasumik.

Kalaallit naapertuilluanngitsumik iliuuseqarfigineqarsimasunut imaluunniit immikkoortinneqarsimasunut aningaasatigut taarsiivigineqarsinnaanerat qalliallappoq.

Danskit naalakkersuisui saammaateqatigiinnissamik aningaasaateqarfimmik taaneqartartumik pilersitsinissamut maanna piareerput, aningaasaateqarfillu kalaallinut kalaaliunertik pissutigalugu naapertuilluanngitsumik pineqarsimasut aningaasatigut taarsivigineqarsinnaalissallutik.

Assersuutigalugu arnat spiralilersorneqarsimasut taarsiivigineqarsinnaalerlutik.

Ministeriuneq Mette Frederiksen (S) tusagassiuutitigut nalunaarummi oqarpoq.

- Danskit naalakkersuisui saammaateqatigiinnissamik aningaasaateqarfimmik pilersitserusupput. Taanna arnat spiralilersorneqarsimasut kalaallillu allat kalaaliunertik pissutigalugu aaqqissuussaanikkut sumiginnagaasimasut immikkoortinneqarsimasulluunniit aningaasatigut taarsiiffigineqarsinnaanerannut atorneqassaaq, oqarpoq.

Qanoq suleriuseqartoqassanersoq suli inissinneqanngilaq.

Mette Frederiksen Kalaallit Nunaata illoqarfiisa pingaarnersaannut Nuummut pingasunngorpat tikeraassaaq, tassanilu arnanut akuersiteqqaarnagit spiralilerneqarsimasunut Danmarkip iliuuserisimasai pillugit pisortatigoortumik utoqqatserfigissallugit.

Ministeriunerup Naalakkersuisut siulittaasuat Jens-Frederik Nielsen ataatsimeeqatigissavaa, tassani aningaasatigut taarsiissuteqartarnissamut periusissaq eqqartorneqassaaq.

Naalakkersuisut siulittaasuata qanoq suleriuseqartoqassaneranik kissaateqarnera suli ilisimaneqanngilaq.

Inatsisitigut ataataqanngitsut allallu aamma taarsiiffigineqarsinnaassasut

Spiralilersuisimanermut suliami eqqartorneqaqisumi pineqartut taarsiivigineqarsinnaanerisa saniatigut kalaallinut allanut taarsiissuteqarsinnaaneq misissorneqassasoq, danskit naalakkersuisuisa aamma nalunaarutigaat.

Tassaasinnaapput kalaallit inatsisitigut ataataqanngitsut taarsiivigitinnissamik siornatigut itigartinneqarsimasut.

Suliami tassani pineqarpoq 1900-kkut ingerlaneranni kalaallit meerarpassuit uersakkat inunngorsimasut ataataminnut attaveqarsinnaanerat inatsisit atuuttut malillugit ajornarsimanera.

Inatsisit allanngortinneqarnissaata tungaanut ataatamik kinaanerata paasinissaa, kingornussisinnaanerat kinguliaqatigisinnaaneralu pisinnaatitaaffiginikuunngilaat. Kitaani 1963-imi Kalaallillu Nunaata sinnerani 1974-imi pivoq.

Mette Frederiksenip utoqqatsernerani spiralilersuisimanermik suliaq kisiat innersuunneqanngilaq, aammali pisimasut allat pineqarlutik.

- Danmark sinnerlugu arnat spiralilersorneqarsimasut utoqqatserfigaakka, aamma sumiginnaanermut Danmarkip akisussaaffigisaanut. Tassalu kalaallit Kunngeqarfimmi innuttaasunit allanit immikoortinneqarsimanerat ajornerusumillu pineqartarnerannut, utoqqatserpunga, Mette Frederiksen ataasinngornermi tusagassiuutitigut nalunaarummi oqarpoq.

Aningaasat qanoq amerlatigisut saammaateqatigiinnissamik aningaasaateqarfimmiissanersut paasissutissiissutigineqanngilaq.