Demokraatit Kommuneqarfik Sermersuumi borgmesterinngortitserusupput
Kommunimut qinersinissaq qanilliartortillugu Demokraatit Kommuneqarfik Sermersuumi borgmesteritut piukkussartik saqqummiuppaat.
Poul Petersen (D) kommunimut qinigassanngortippoq illoqarfiillu pingaarnersaanni borgmesterinngornissaq anguniarlugu.
Assi: Oscar Scott Carl
Kommuneqarfik Sermersuumi Demokraatit naapertorlugit borgmesterip talerperliusup naligiinneq inuuniarnermilu naapertuilluarneq salliutissaavai, maannalu partiip borgmesterissatut Poul Petersen sassartippaa:
- Borgmesterip naligiisitsisumik talerperliussuseqartumilli politikkillip pingaarnerutissavai naligiisitsineq inuuniarnermilu naapertuilluarneq. Imaappoq innuttaasut tamarmik qanorluunniit tunuliaqutaqaraluarunik ilinniarsinnaanissaat, sulisinnaanissaat, taperserneqarsinnaanissaminnullu periarfissaqarnissaat qulakkeerneqartariaqarmat, Poul Petersen tusagassiorfinnut nalunaarummi allappoq.
Poul Petersen borgmesteritut qinigassanngortissaguni ilaatigut borgmesteriusumut Avaaraq Olsenimut IA-meersumut, kommunimut qinersinissami aamma qinigassanngortittumut, unammillertinngorpoq.
IA Kommuneqarfik Sermersuumi amerlanerussuteqartuuvoq, kommunillu 2009-mi aaqqissuunneqaqqinneraniilli borgmesteriuffigalugu.
Suliffeqarfiit namminersortut pisortat suliassaannik tigusisinnaapput
Demokraatit naapertorlugit pisortat ingerlatsineranni sullissinerup arriippallaarnera ajornartorsiutit annersaasa ilagaat. Suliffeqarfiit namminersortut suleqatigilluarneqarsinnaasut partiip siunnersuutigaa, taamalilluni kommunip suliassaannik tigusisinnaalerlutik.
- Pisortani ingerlatsivinni sullissinerit pitsaanerullutillu sivikinnerusumik ingerlanneqarsinnaalertariaqarput aaqqiissutissanillu eqqumaffiginnittoqartariaqarpoq, sulifffeqarfiit privatit pisortat suliassaannik ingerlatsilersinnaatilersillugit taamaalillutik aaqqiissutissatigut ikiuussinnaasunngortillugit.
Borgemesterip talerperliusup innuttaasut nipaat tusaaniassagai, najukkami oqartussaaneq annertusineqassasoq, pitsaanerusumik sullissisoqalissasoq najukkamullu naleqqunnerusunik aaqqiisoqartalissasoq Poul Petersen neriorsuivoq:
- Borgmesteri tamanik naligiisitsisumik talerperliusumilli ingerlatsisoq kommunep innuttaasullu akornganni ammasuunissamik eqqartueqatigiisitsinissamillu siuarsaasussaavoq, kikkut tamarmik tusaaneqarsinnaasussaassapput, peqatigiillutalu ajornartorsiutaasinnaasunik naapitatsinnik aaqqiissuteqarsinnaassaagut, soorluttaaq najugaqartut aalajangeeqataanerulersinnerisigut, taamaasilluni pitsaanerusumik periuseqartumik sukkanerusumillu sullissinerit aaqqiiffigineqarsinnaaniassammata.
Kommunimut qinersineq apriilip aallaqqaataani pissaaq.
