Eqqakkat ammasumi ikuallannissaannut kommunit marluk immikkut akuersissummik tunineqarput
Avatangiisinut Naalakkersuisoq, Bentiaraq Ottosen (A), aalajangerpoq Avannaata Kommunia aamma Kommuneqarfik Sermersooq immikkut akuersissummik tunineqarallassasut eqqakkat ammasumi ikuallannissaannut, akuersissullu 31. december 2025 tungaanut atuutissaaq.
Foto: Naalakkersuisut
Avannaata Kommuniani, Nunatsinni kommunit sinnerisa eqqagassaleriffianut Esani A/S-imut piginnittooqataanngitsoq, piffissami killilikkami akuersissummik tunniussisoqarpoq illoqarfiit nunaqarfiillu amerlanersaanni, Kommuneqarfik Sermersuumilu Tunumi nunaqarfinni illoqarfinnilu arlalinni.
Akuersissutit atuutissapput decembarip 31-iat 2025 tungaanut. Tamatuma saniatigut avatangiisinut Naalakkersuisoq, Bentiaraq Ottosen, nassuiaavoq piffissami killilikkami akuersissummik tunniussineq pisariaqarluinnarsimasoq, Avannaata Kommuniani Kommuneqarfik Sermersuumi eqqagassat pillugit ajornartorsiutaasumut aaqqiissutissatut isumannaatsutut.
Sumiiffinni ukunani ammasumi eqqakkanik ikuallaasoqarsinnaavoq
Avannaata Kommuniani: Upernavik, Innaarsuit, Kangersuatsiaq, Kullorsuaq, Nutaarmiut, Nuussuaq, Naajaat, Tasiusaq, Upernavik Kujalleq, Aappilattoq, Uummannaq, Ikerasak, Niaqornaq, Qaarsut, Saattut, Ukkusissat, Qaanaaq, Qeqertat, Savissivik, Siorapaluk, Ilulissat, Ilimanaq, Oqaatsut, Qeqertaq aamma Saqqaq.
Kommuneqarfik Sermersuumi: Isertoq, Kulusuk, Kuummiit, Sermiligaaq, Tiilerilaaq aamma Ittoqqortoormiit.
Eqqakkanik tigooraavinnik pilersitsineq aaqqiissutissallu ataatsimoortut suli atuutilinnginneri
Naalakkersuisuni ilaasortaq, Bentiaraq Ottosen nalunaarpoq kommunit eqqagassat pillugit unammilligassanik aaqqiissutissanik attanneqarsinnaasunik pilersitsinissamut oqaloqatigiinnerit pitsaasut ingerlalluarnerarlugit. Kingullermik oktobarip qulingiluaani nunatta kommuniinit tallimaasunit sisamat ataatsimeeqatigisimanerarpai.
- Nunatsinni eqqagassalerineq oqaloqatigiissutigaarput. Oqaloqatigiinnerlu ingerlateqqinneqassaaq eqqakkallu ajornartorsiutaanerisa annikillisarnissaannik suliaqarneq annertusarneqassaaq, suli isumaqarama ammaannartumi ikuallaasarnerit pinngitsoortinniarneqartassasut.
- Nuummi Sisimiunilu nuna tamakkerlugu ikuallaaviit maanna marluullutik ingerlapput, najukkanili eqqagassalerinerup unammillernartoqartinneqarnera Naalakkersuisuni suli paasisinnaalluarparput. Unammilligassat ilaatigut tigooraavissanik nutaanik pilersitsinissamik poortuinermullu aaqqiissutinik atulersitsinissap amigaatigineqarneranik pissuteqarput. Kommuninik suleqateqarnerup nukittorsarnissaa ilungersuutigissavara, ammaannartumi ikuallaasarnermik atuiunnaarnissarput anguniarlugu, avatangiisinut Naalakkersuisoq, Bentiaraq Ottosen oqarpoq.
