Eqqartuussineq nutaaq Watsonimut tunngasoq inuppassuarnit najuuffigineqarpoq -tigummigallarneqarnera sivitsorneqarpoq

Pingasunngornermi ullaap tungaani avatangiisinik illersuiniartup Paul Watsonip eqqartuussivimmi sassartinneqarnissaa soqutigineqarluaqqippoq.

Nuummi Nunatta Eqqartuussiviata saavani inuppassuit katersuupput, eqqartuussiviullu ilua ulikkaaqqangaarmat sulisut issiavinnik ilasisariaqarput.

Paul Watson Japanimut tunniunneqassanersoq Danmarkimi inatsisinik atortitsinermut ministereqarfiup suliamik suliarinninnerani, avatangiisinik illersuiniaq taanna tigummigallarneqaannassanersoq eqqartuussinermi sammineqarpoq.

Kalaallit Nunaanni Politiit unnerluussisussaatitaata, Mariam Khalilip, Paul Watsonip novembarip 13-iata tungaanut ulluni 21-ni tigummigallarneqarnissaa piumasaraa.

Unnerluussisoq: Qimaanissaa suli aarlerinarpoq

Watsonip pinerlussimasutut pasisaassutaata peqqarniissusaanut kiisalu Nunatta Eqqartuussisuuneqarfiani suliap suliarineqarnerata naapertuilluartuutitaaneranut pissutaasumut unnerluussisoq innersuussivoq. 

Qimaasinnaanera suli aarlerinartoq unnerluussisussaatitaasoq isumaqarpoq, taamaattumillu tigummigallarneqarnera sivitsorneqallaquaa.

Akerlianilli Watsonip illersuisua Finn Meinel Watsonip iperagaanissaa kissaatigaa, pinerlunnerullu peqqarniissusaanut naleqqulluarneranullu innersuussuteqarpoq, pinerlunnerlu tigummigallarneqarnissamut naammattumik peqqarniissuseqanngitsoq isumaqarpoq.

Japanimiunit eqqartuunneqaatigineqarniaq, 2010-mi Sikuiuitsumi kujallermi pisimasoq, pillugu Finn Meinel Paul Watsonimik apersuivoq. Tassani ilaatigut Watsonip inuttaasa ilaata Japanimiut umiarsuaannut qaartartumik tippassaasumik igitsimmat, Japanimiumik arfanniamik ajoqusiisimasutut unnerluutigineqarpoq.

Inuttut atukkaminik oqaluttuartoq

Watsonip aamma inuttut atukkani oqaluttuarai, ilaatigut Nuummi pineqaatissinneqarsimasunut inissiisarfimmiinnini artornartoq, tassami ilaquttani sapaatip-akunneranut minutsit quliinnaat takusinnaagamigit. Ilaqutai tamarmik aliasupput, oqarpoq.

Unnerluussisussaatitaasup Japanimi unnerluutigineqarnermik innersuussilluni tigummigallarneqartuarnissaa tunngavilersorpaa. Japanimi oqartussaasut unnerluutiginnissutaat ilumoorpata, taava pineqartoq peqqarniitsuliornerusimassanerarpaa.

Saassussineq butanimik qaartartulianik eqqaassinerusoq aamma ataatsimoorluni saassussilluni butanimit syre-mik eqqaassisoqarsimasoq arfanniummi inuttat takusinnaasimagaat, Mariam Khalil oqarpoq.

Japan ukiorpassuarni unioqqutitsilluni arfanniartarneranik Finn Meinel tunngavilersuivoq, taamaattumillu Watsonip iliuusaa inatsisinut naapertuuttuunerarpaa.

Assersuussineq isornartorsioraa

Unnerluussisussaatitaasup eqqartuussutit marluk atuffassissutigai, taakkulu naapertuilluartuuneranik uppernarsaataanerarlugit, illersuisulli taakku assortorpaat, naliliinerlu tamanna akuerineqarsinnaanngitsutut taavaat:

- Illunut aallaasersornerit 2010-mi pisunut assersuunneqarsinnaanngillat.

Illersuisut tamanna Watsonimut tunngatillugu pisimasumut assersuunneqarsinnaanngitsunik nassaartoqarsinnaannginneranik ersersitsinertut isigaat.

Eqqartuussutinut taamaattunut toqqaannartumik assersuusiorsimanngisaannarluni unnerluussisussaatitaasoq oqarpoq.

Paul Watson eqqartuussivimmi oqaaseqaqqippoq oqarlunilu eqqartuussut politikkimik pissuteqartoq:

- Naluara eqqartuussineq tamanna sumik siunertaqarnersoq, isumaqarpungali naapertuilluanngitsumik pisoqartoq, Watson oqarpoq.

Sapaatip-akunneri pingasut tigummigallarneqaqqissaaq

Nalunaaqutaq 10.30 eqqartuussineq naammassineqarpoq, Paul Watsonillu tigummigallarneqarnera sapaatip-akunnerini pingasuni novembarip 13-iata tungaanut sivitsorneqarpoq.

Watsonip suliap naammassineqarnissaanik tigummigallarneqarunnaarnissaminillu kissaateqarnera eqqartuussisup paasilluarsinnaavaa.

Eqqartuussineq ingerlaannaq Nunatta Eqqartuussivianut illersuisut suliareqqitassanngortippaat.

Paul Watsonip Japanimut tunniunneqarnissaa pillugu qaqugu aalajangiiffigineqarnissaa ilimagineqarsinnaanersoq, Sermitsiap marlunngornermi Inatsisinik atortitsinermut ministereqarfik saaffigalugu apeqqutigaa. Ministereqarfik suli akissuteqanngilaq.