Eqqartuussissuserisutut suliffeqarfik Sermersuumit millionilinnik iluanaaruteqarpoq

Randersip Lollandillu kommuniinut suliami, Eqqartuussiviit Qullersaannit katillugit 1.829.000 koruuninik akiliisussanngortinneqartuni, Kommuneqarfik Sermersuup eqqartuussissuserisunut aningaasartuutai maannamut 3 millionit koruunit sinneqarput.

Naak Eqqartuussisoqarfimmi Qullersaqarfimmit isumaqatigineqaraluarlutik, Randers Kommunep Lolland Kommunellu akiliinissaannik piumasaqarluni eqqartuussivimmut suliassanngortitsineq maannamut amigartooruteqarfiuvoq.

Eqqartuussissuserisut Københavnimiittut, Civitas Advokater, 2021-miilli katillugit 3.062.500 koruuninik akiligassiisimapput, Sermitsiap allakkanik takunnissinnaatitaanermi takusinnaasaani, akiligassiani tamanna takuneqarsinnaavoq.

Akikillisaaffigineqartut

Avataanit eqqartuussissuserisumit inatsisitigut ikiorneqarnermut aningaasartuutit 444.375 koruuninik amerlanerusimassagaluarput, Københavnimi eqqartuussissuserisut allaffiata oqarnera naapertorlugu, „Civitas Advokater“ „annertuumik“ akikilliliisimanngikkaluarpat. Eqqartuussissuserisumit inatsisitigut ikiorneqarneq akunnermut ataatsimut 3.300 koruuneqartoq ilisimatitsissutaavoq.

Innuttaasunut marlunnut oktobarimi 2010-mi Nuummi Eqqartuussivimmi pineqaatissinneqartunut kingornalu Hedensted Kommunemi inissiisarfimmut inissinneqartunut, suliaq tunngavoq. Kingorna Hedenstedimiinnerminni iliuuserisimasatik pillugit apriilimi 2014-imi Horsensip eqqartuussivianit eqqartuunneqaramik, Nuummi eqqartuussiviup eqqartuussutaa atorunnaarsinneqarpoq.

- Innuttaasut inissinneqarsimanerinut 2019-ip aallartilaarnera tikillugu  Kommuneqarfik Sermersooq akiliisarpoq. Innuttaasut pineqaatissinneqarsimasut inissinneqarsimanerinut tunngasunik 2018/19-imi kommune sulianik misissuisimavoq, taamanikkullu sulianut taamaattunut tunngasut pinerluttulerinermi inatsit naapertorlugu peqqissaavimmit akisussaaffigineqarput. Kalaallit Nunaanni pineqaatissiissutaasoq atorunnaarsinneqarsimasoq tassunga atatillugu paasineqarpoq, taamaattumillu danskit kommunii taakkuugunarput akiliisussaatitaasut, kommunimi politikerinit suliamik saqqummiussineranni takuneqarsinnaavoq.

Suli naammassinngitsoq

Eqqartuussisoqarfimmi Qullersaqarfiup Kommuneqarfik Sermersooq isumaqatigaa, tamakkiisuunngitsumilli. Taamaattumik suliaq suli naammassineqanngerujussuarpoq, illoqarfiimmi pingaarnersaata kommunia suli 16,3 millionit koruuninik pissaqarluni isumaqarpoq.

Aningaasat taakku 10 millionit koruunit sinnerlugit amerlassusillit, Region Sjællandimut akiliutaasarsimasunut tunngassuteqartuusut paasinarsivoq.

"Lolland Kommunemut Randers Kommunemullu Kommuneqarfik Sermersuup akilertinniagaata annertunersaa Kofoedsmindenimiititsinermut Region Sjællandimut akilersinniarneqartumut tunngasuusoq, piviusorsiortumillu aningaasartalerneqarsimasoq", ingerlatsivimmi pisortaq Ejner Grønvold saqqummiussami ilisimatitsivoq.

Akiliisussaatitaaneq

Innuttaasumik Kofoedsmindemiisitsinermut danskit kommunii peqatigiillutik aningaasartalersuisarnerinik, taamaattumik Randersip Lollandilluunniit akiliisussaatitaannginnerinik, "piviusorsiortumik aningaasartalerneqarsimaneranik" oqarneq tunngaveqarpoq.

Region Sjællandimut piumasaqaatiminnik ingerlatitseqqiiniarlutik Civitas Advokater suli suliamik ingerlatsipput, eqqartuussissuserisunullu aningaasartuutit nutaat Kommuneqarfik Sermersuup naatsorsuutigisariaqarpai.

Naak arlaleriarluni saaffiginnittoqartaraluartoq, eqqartuussissuserisumut akiligassat millionilikkaartut pillugit Kommuneqarfik Sermersuumi ingerlatsivimmi pisortaaneq kommunaldirektøriluunniit oqaaseqartinneqarsinnaasimanngillat.

Powered by Labrador CMS