Qarasaasiakkut
pigisanik nalilinnik nalunaarsuisarneq maanna Kalaallit Nunaanni
atorneqartussanngortutut isikkoqarpoq.
Eqqartuussivitsigoortumilliuna
nalunaarsuineq suusoq? Qarasaasiakkoortinneralu sooq pingaaruteqarpa?
Qarasaasiakkut
pigisanik nalilinnik nalunaarsuisarneq maanna Kalaallit Nunaanni
atorneqartussanngortutut isikkoqarpoq.
Eqqartuussivitsigoortumilliuna
nalunaarsuineq suusoq? Qarasaasiakkoortinneralu sooq pingaaruteqarpa?
Aaqqissuisoqarfimmi
maani eqqartuussissuserisoq Jannik Isikor Arctic Lawimeersoq
inatsisitigut taaguutinik– taakkulu inuinnarnut qanoq
sunniuteqartarnerannik – paasisaqarumalluta ikiortiseraarput.
-
Maannakkut Kalaallit Nunaanni eqqartuussivitsigoortumik
nalunaarsuinernik ingerlatsinngilagut, danskimmi eqqartuussivikkut
nalunaarsuisarnermik inatsisaat nunatsinni
atortussanngortinneqarsimanngimmat. Taamaammat pigisat
aalajangersimasut ”nalunaarsortarpagut”. Tunngaviusumik taakku
assigiipput, pingaarutilinnilli assigiinngissuteqarput, Jannik Isidor
aallarniilluni oqarpoq, imalu nassuiaanini nangippaa:
-
Eqqartuussivikkoortumik nalunaarsuiffik/pigisanik nalunaarsuiffik
tamanut iserfigineqarsinnaasumik nalunaarsuiffiuvoq piginnittuunermik
qulakkeerinnittoq. Tassani pisisut, tunisisut taarsigassarsiffiillu
kia sumik piginnittuuneranik pisinnaatitaaffiillu pisussaaffillu suut
pigisamut aalajangersimasumut ilaatinneqarnerisa erseqqissuunerisigut
qulakkeerinniffigineqartarput. Tamanna inuinnarnut
aningaaserivinnillu, taarsigassarsisitsinermi pingaaruteqarpoq.
-
Taamaalilluni inuit allat pigisamut aalajangersimasumut suut
qularnaveeqqusiunneqarsimanerannik takunnissinnaanngortitsisarpoq,
taamaalillunilu pigisap aalajangersimasup assersuutigalugu
piginnittumut (suli amerlanerusunik) aningaasanik atukkiinissamut
tunngatillugu matussutissiissutitut qularnaveeqqusiissutitulluunniit
atornissaa soqutiginaateqarnersoq paasinarsisinnaasarluni.
Kalaallit
Nunaanni unammillernartut
Ullumikkut
Kalaallit Nunaanni aaqqissuussineq atorneqartoq
unammilligassaqarfiuvoq. Taannalu ajornartorsiutinik
pilersitsisinnaavoq, Jannik Isidor nassuiaavoq.
-
Pigisamik aalajangersimasumik piginnittuunermik nalunaarsuineq
Kalaallit Nunaanni inatsisitigut pituttuisuunngilaq. Tamannalu
pigisanik aalajangersimasunik pisisup pisarsiaminik
nalunaarsuiniarnerani, tuniniaasullu – pisortat nalunaarsuiffiini –
piginnittuusutut nalunaarsorneqarsimannginnerani
unammilligassiisinnaavoq. Taamaattoqarnerani piffissap ingerlanerani
pisisuusimasut tuniniaasuusimasullu tamarmik
pissarsiarineqartussaapput, taamaalillunilu pigisap aalajangersimasup
pisisunut pineqartunut tunniunneqarsimanera qulakkeerneqarluni.
Tamannali suliassarujussuusinnaasarpoq. Ingammik pigisaq
aalajangersimasoq amerlasooriarluni tunineqarsimatillugu tamakkulu
ukiut arlallit qaangiuttut pisimaneranni.
-
Nalunaarsuisimannginnerli tuniniaasup pigisani
nalunaarsorsimanngippagu, tassanngaannarlu piginnittuusimasup
takkulluni suli pigisamik aalajangersimasumik piginnittuunerarnerani
pisisumut aamma ajornartorsiutaasinnaavoq.
Eqqartuussivitsigoortumik
nalunaarsuisannginneq aamma pigisamik aalajangersimasumik
pisinissamut aningaasanik atorniaraanni
ajornartorsiutinnguussinnaavoq.
-
Assersuut alla tassaasinnaavoq aningaaseriviup pigisaq
aalajangersimasoq qularnaveeqqusiullugu taarsiiniartup
piginnittuusimasut erseqqinnginnerat paasippagu, tamannalu
taarsigassarsisitsinermik kinguarsaasinnaalluniluunniit
pinngitsoortitsisinnaavoq, Jannik Isidor oqarpoq.
-
Assersuutit makku takorluugaapput, digitalimilli eqqartuussivimmi
nalunaarsuisinnaaneq, taamaalillunilu pigisanik nalunaarsuisinnaaneq
uppernarsaatitut atulerpat, ajornartorsiutit taamaattut
pinngitsoortinneqarsinnaapput.
Piffissartornartoq
Qarasaasiakkut
pigisanik nalilinnik nalunaarsuisarnerup Kalaallit Nunaanni
piviusunngornissaa sivisusinnaasoq, Jannik Isidor isumaqarpoq.
-
Taannali piffissap ingerlanerani, Kalaallit Nunaanni pissutsit
immikkuullarissut eqqummaariffigalugit
atulersikkiartorneqarsinnaavoq, isumagalu malillugu pigisat
aalajangersimasorpassuit nalunaarsorneqarneri piginnittuinnut
naapertuuttuussanngillat.
-
Qarasaasiakkut pigisanik nalilinnik nalunaarsuisarneq pigutsigu,
tamanna suliap oqinnerulerneranik eqaannerulerneranillu
kinguneqassaaq. Suut tamarmik qarasaasiaq internetimut attavilik
atorlugu isumagineqarsinnaassapput. Taamaalilluta pappiaraviit
nassiuteqattaartarneri pinngitsoorsinnaassavarput. Tamannalumi
piffissartornarpoq taamaalillunilu suliap ingerlaneranik
ajornarnerulersitsillunilu akisunerulersitsisarluni. Taamattaaq
pappiaraatit tammannginnissaat qulakkeerneqassaaq.
Qarasaasiakkut
pigisanik nalilinnik nalunaarsuisarnerup Kalaallit Nunaannut
iluaqutaanissaa, Jannik Isidorip upperilluinnarpaa.
-
Pissutsit maanna atuuttut Kalaallit Nunaata pigisanik
aalajangersimasunik muteerniusumik aqutsinermut sanilliullugu
kinguussaarnera kinguneraa. Tamanna inuussutissarsiutitigut
ineriartortitsinermut inuinnaallu pigisanik aalajangersimasunik
niuernerannut pitsaanngitsumik sunniuteqarsinnaavoq. Digitalimik
aaqqiineq aaqqissuussinermik muteerninngortitsiinnassanngilaq,
tamatumali aamma inatsisitigut illersugaaneq nukittorsassavaa,
Kalaallillu Nunaannut aningaasaliiumassutsimut iluaqutaalluni,
aningaasaliisummi aningaasaliissutiminnik qulakkeerinninnissartik
annertuumik soqutigisarimmassuk, eqqartuussissuserisoq Jannik Isidor
naggasiivoq.
