GUX-Aasianni ilinniartunik - pingaartumik ukiukitsunik - paarsilluarput
GUX-Aasiaat perorsaasunik atorfeqartitsivoq, taakkualu pingaartumik inersimanngitsunik atuartunik isumaginnittussaapput. Aamma atuarfimmi inuusuttut fiistersinnaanerat akuerisaavoq, tassani inersimasut nakkutiginnittut akuusarlutik.
GUX-Aasianni rektori ilinniartitsisunik sulisunillu allanik peqateqarluni GUX-Aasiaat inuusuttunut pisariaqartitaannut naleqqussarsimavoq, tamannalu issittumi kulturikkut naleqartitat aallaavigalugit ingerlanneqarpoq. - Inuusuttut inuttut ilinniakkatigullu piginnaasaat annertusiartorput, Dorthie Siegstad oqarpoq.
Assiliisoq: Jensine Berthelsen
GUX-Aasianni ilinniarfik inuusuttunut naleqqussakkamik inuusuttullu pisariaqartitaat aallaavigalugit ingerlanneqarpoq, pingaartumik suli inersimasunngorsimanngitsut eqqarsaatigalugit.
Ilinniartunut isumassuineq ilinniarfiup kollegiallu iluani avataanilu ingerlanneqartarpoq. Tassani perorsaasunik arfinilinnik atorfeqartitsisoqarpoq, taakkulu isumagisarpaat ukiumi ilinniarfiusumi ullut tamaasa inersimasumik oqaloqateqartoqarsinnaajuaannassasoq. Perorsaasut ilinniartut ataasiakkaat pillugit malussarniutigissaarput, ilinniartullu suli inersimasunngorsimanngitsut atugarisaat malinnaaffigalugit, atuartarfiup iluani avataanilu.
- Assut malugisinnaasarparput inuusuttut ilinnialersut assigiinngitsorujussuarnik aallaaveqartartut uagutsinnut aallartikkaangata. Aasianni GUX-imi ilinniartut 98 procentii kollegiani najugaqarput, tassanilu immikkoortut pingasut pilersissimavagut. Immikkoortoq siulleq tassaavoq suli inersimasunngorsimanngitsunut kollegia, immikkoortut aappaat inersimasunngoreersunut, kiisalu immikkoortut pingajuat ilaqutariinnut meerartalinnut kollegiaqarfiulluni, GUX Aasianni rektori, Dorthie Siegstad oqaluttuarpoq.
Rektori Dorthie Siegstad ilanngulluu oqaluttuarpoq pingaartumik imminnut oqartussaaffigilinngitsut pillugit angajoqqaanik suleqateqarnissaq ilinniarfiup tungaanit assut pingaartinneqartoq, tassami amerlanerit siullermeerlutik angerlarsimaffimminnit, najukkaminnit ikinngutiminnillu qimagullutik misilittarmassuk. Inuusuttuaqqat amerlanerit ilinnialeraangamik inuttut assigiinngitsunik suli ilikkagassaqartartut ilinniarfimmit eqqumaffigineqarpoq, pingaartumik inuttut ineriartorneq, pisariaqartitanillu nalinginnaasunik, soorlu eqqiluisaarneq, ullaakkut makittarneq allanillu suli ilikkagassaqartarlutik, tamatumalu saniatigut inoqatinut attaveqartarnermut tunngatillugu inerisimassusaat killeqartarsinnaammat aammalu pisortanut attaviginnittarnermut tunngatillugu suli ilikkagassaqartarlutik.
Imminut mattunneq imaluunniit avataaniittunut saattarneq
GUX Aasianni rektori Dorthie Siegstad qisuariaateqarpoq oqaluttuaralugulu Aasianni pissutsit qanoq ittuunersut, Sisimiuni GUX-mi ilinniartup 16-inik ukiullip sakkortuumik saassunneqareernerata kingorna.
- Ilinniartut ukiukitsut qissimikkutsigit, taakkunannga ikigisassaanngitsut kimigiiserfigineqarlutik ilinniakkamik aallartitsisarput, aamma immaqa ilai piareersimanngikkaluarlutik. Taamaattoqaraangat ilai imminut mattuttarput ilaallu ilinniarnertik tunulliullugu allanik ujartuilersarput. Akerlianilli inuusuttut namminneq toqqarsimagaangamikku ilinnialernissartik, taakku ilinniarnerminnik aallussilluartarput ilikkagaqarnissaminnillu assut pingaartitsisarlutik, GUX-Aasianni Rektori, Dorthie Siegstad Sermitsiamut oqaluttuarpoq.
Taassuma ilanngullugu oqaluttuaraa ilinniarnermi siunnersorneqarnissamut periarfissaqartitsilluarnissaq pingaaruteqartikkamillu siunnersorti (studievejleder) tamakkiisumik taamatut atorfeqartinneqartoq, siusinnerusukkut ilinniartitsinertalimmik siunnersortitut ingerlasarneq pissutaalluni siunnersorti pissarsiariuminaassinnaasarnikuummat.
Fiisternerit ullullu nuannaarfiusut aalajangersimasunik malittarisassallit
Rektori Dorthie Siegstad taassumalu suleqatai aalajangersimapput inuusuttunut ilinniarfik naleqqussarneqassasoq aammalu inuusuttut toqqissisimallutik tassaniittassasut. Tamanna aamma atuuppoq ilinniartut fiistissatillugit allatigullu peqatigiilluni aaqqissuussisoqassatillugu. Matumanili rektori erseqqissaavoq tamatigut inatsisit naapertorlugit pisut ingerlanneqartarmata, taamaattumik aamma inersimasuunngitsunut imigassamik sassaallertoqarneq ajortoq.
- Unneqqarillunga oqartariaqarpunga fiistertarnerit aaqqissuussisarnerillu tungaatigut qanoq inissisimanissaq pillugu annertuumik eqqarsaatigisarsimallugu, imigassaq aalakoornartoq akuutillugu. Taamaattorli ilinniartuutigut amerlasuut aatsaat misilittaaleruttornerusarmata, akuersaartumik pissuseqarluta aalajangersimavugut, tassami pitsaanerusarmat nakkutigisaasumik inuusuttut fiistersinnaanermikkut aamma imminnut paarinissaminnik ilinniartarmata.
- Akuersimavara atuarfimmi aaqqissuussinernik qinnuteqartoqarsinnaasoq, tassani imigassaq aalakoornartortalik aamma sassaalliutigineqarsinnaalluni. Taamatut pisoqartillugu inersimasut tamatigut najuuttarput, nakkutiginnillutik malittarisassat inatsillu malinneqarnersut. Tamanna toqqarusunneruara pitsaanerutillugulu, taamaattoqanngippammi inuusuttut allamukarlutik nakkutigineqaratik sumi tamaani sumiiffissarsiornissaanniit. Inuusuttutummi inuusuttuupput, aatsaat misileraallutik aallartipput, tamannalu aqunneqarsinnaasumik pisussaavoq, uagutsinnilu taamaappoq.
Dorthie Siegstadip aamma oqaluttuarivaa inuusuttut ataasiakkaat imigassamik aalakoornartumik atueriaasiat aamma eqqumaffigineqartoq, ilinniarfeqarfiullu imigassamik atuinermut politikkia erseqqissaasoq, pisariaqartitsisoqartillugu ikiortissarsiornissamut periarfissaqartoq.
