Persuttaasarneq pillugu Sisimiuni akerliussutsimik takutitsisut: - Tassa

Tallimanngormat nalunaaqutaq tallimat-qeqqartoq innuttaasut 200-ut missaaniittut Sisimiuni Akikip silataaniipput.

Taakku tamarmik ataatsimut oqariartuuteqarput: Persuttaaneq akuerinngilarput.

Nipaatsumik akerliussutsimik takutitsineq illoqarfimmi Akikimit aallartippoq. Tassani aaqqissuisut tikilluaqqusinerminni oqaatigaat pisoqatigiinnermi pisoqataasut pissuserissaassasut ataqqinnillutillu. Kingorna inuit 200-it missaaniittut pisiniarfiup Paarnap tungaanut allagartarsualisarlutik pisoqatigiipput. Paarnap eqqaani oqariartuutitik allassinnaallugit.

Navanara Lennert-Andersen pisoqataasunut ilaavoq, taassuma sooq akerliussutsimik peqataanini ima nassuiarpaa:

- Uannut pingaaruteqarpoq tamatta - meeqqat, inuusuttut, inersimasut utoqqaallu toqqissisimanissarput. Tamatta maaniissinnaatitaavugut toqqissisimalluta. Aamma unnukkut aneersinnaatitaavugut ersiorata. Neriuppunga tusaaneqassalluta.

- Tamatsinnut sakkortuvoq

Peqataasunut aamma ilaavoq persuttagaasumut ilaqutaasoq.

- Pisoqarnikuugami sakkortuumik. Ilaqutarivara nukappiaraq. Tamatsinnut sakkortoorujussuuvoq. Maaniippunga persuttaaneq unitsinneqartariaqartoq takutinniarlugu, Sabine Henson killitsisimaqaluni oqarpoq.

Adam Jarniewski, GUX-imi ilinniartitsisuusoq aamma peqataasuni ilaasoq. Aaqqissuussarlu tapersersorniarlugu peqataavoq:

- Aaqqissuussamut tapersersuinera takutikkusuppara, aamma maaniittut inuusuttunut persuttaanerit unitseqqullugit oqariartuuteqartut taperserumallugit. Qitornaqarpunga atuarfimmilu sulillunga. Allanngortoqartariaqarpoq, neriuppunga oqariartuutigut tusaaneqassasut: Persuttaaneq akuerinngilarput, taamaattoqartussaanngilaq.

Borgmesteri tapersersuisoq

Qeqqata Kommuniani borgmesteri, Malik Berthelsen akerliussutsimik takutitsinermut takkuppoq, innuttaasullu akerliussutsimik takutitsinerannut qujassuteqarluni.

- Innuttaasut kommunalbestyrelsi sinnerlugit qutsavigerusuppakka taamatut aaqqissuisut. Kommunalbestyrelsimit arajutsisimanngilarput innuttaasut pisunut ilungersunartunut tujorminartunullu qatsusseqqanerat, tamanna kommunalbestyrelsimit tamaavitta aamma taamatut isumaqarpugut.

- Nalinginnaasumik illoqarfik Sisimiut toqqissisimanartumik nuannersumillu inuuffigivarput. Taanna assortorneqarsinnaanngilaq. Taamaattumik inuit aalajangersimasut taamak tujorminartigisumik pissusilersornerat illoqarfitta taama tujorminartigisumik avammut tusaamaneqartinnera assorujussuaq aliasuutigalugulu tujormigivarput.

Akerliussutsimik takutitsinermut innuttaasut oqariartuutitik nivinngarsinnaavaat.