Ilaqutariit 73-it Nuummi Svend Jungep Aqqutaata Nuukullaallu akornanni inissiarsuarni najugallit angerlarsimaffeqaannassanerlutik imaluunniit angerlarsimaffeerutissanerlutik naluaat. Namminersorlutik Oqartussat Kommuneqarfik Sermersuullu politikkikkut pissaaneqarniunneranni, kommunillu inissiaatileqatigiiffiullu aningaasaqarnikkut aaqqiagiinngissuteqarneranni, eqqugaapput.
Sulisartut kattuffiata SIK-p siulittaasuata Jess G. Berthelsenip, ilaasortami ilaasa inissiarsuarmi najugallit, pisoq isumakuluutigaa.
Ilaqutariit 73-it Nuummi Svend Jungep Aqqutaata Nuukullaallu akornanni inissiarsuarni najugallit angerlarsimaffeqaannassanerlutik imaluunniit angerlarsimaffeerutissanerlutik naluaat. Namminersorlutik Oqartussat Kommuneqarfik Sermersuullu politikkikkut pissaaneqarniunneranni, kommunillu inissiaatileqatigiiffiullu aningaasaqarnikkut aaqqiagiinngissuteqarneranni, eqqugaapput.
PISOQ NAATSUMIK, NAALISIGAATSIARLUGU
Kommuneqarfik Sermersooq 2015-imiit 2019-imut Sermersuumi periuseq atorlugu inissianik attartortarpoq. Kommunip attartortitsisartunut namminersortunut akisunerusumik attartoriarluni, Iserit A/S-ip nalinginnaasumik initaarnissamik utaqqisunut allattorsimaffimmiittunut ineqarnermut akiliummik annikinnermik akiliisitsisarluni attartorteqqittarpaa.
Sermersuumi periuseq naapertorlugu kommunit aningaasaataat marloqiusamik attuumassuteqarput:
1) Inissianik sanaartorneq kommunip ukiuni 20-ni erniaqanngitsumik akiligassaqanngitsumik taarsigassarsititsineratigut aningaasaliiffigineqarpoq. (Assersuutigalugu kommunip inissiaatileqatigiiffik Nuuk City Invest ApS, Nuummi Nuukullammi inissianik sanaartornerani, erniaqanngitsumik akiligassaqanngitsumillu 28,5 millionit koruuninik taarsigassarsisippaa.)
2) Kommunip ineqarnermut akiliutit qaffasinnerit attartortumullu akiliutit appasinnerit assigiinngissutaat akilertarpai. (Ukioq manna nikingassutaa 22,7 millionit koruuniupput).
Piffissami tassani inissiaatileqatigiiffinni aqqaneq-marlunni attartortoqarpoq inissiallu 416-it attartorteqqinneqarlutik. Kalaallit Nunaanni Kommuninut Nakkutilliisoqarfimmut 12. februar 2020-mi kommunip Sermersuumi periuseq malillugu isumaqatigiissutinik nutaanik isumaqatigiissuteqartarunnaarnissaanik ingerlaannaq inerteqquteqalernissaa tikillugu.
kurt@sermitsiaq.gl
Sulisartut kattuffiata SIK-p siulittaasuata Jess G. Berthelsenip, ilaasortami ilaasa inissiarsuarmi najugallit, pisoq isumakuluutigaa.
– Ilaqutariit 73-it taakku politikkikkut, aningaasatigut akisussaaffimmillu unamminermi eqqugaassanngillat, Jess G. Berthelsen Sermitsiamut oqarpoq.
Kommunip pilersitaa — kommunip akisussaaffia
Jess G. Berthelsenip Sermersuumi periuseq 2021-mi apersorneqarnermini nersualaaraluarpaa, illoqarfimmimi inissaaleqiffiusumi attartortittakkamik inissianik amerlanerusunik pilersitsimmat.
– Aap, Sermersuup periusaa taamani kukkuneqarnersoq naluarput, kommunip kukkussutigisussaanngikkaluarlugu kukkussutaa. Kingornatigut paasinarsivoq periuseq ajunngitsumik siunertaqaraluarluni inatsisinik unioqqutitsisoq, Jess G. Berthelsen oqarpoq.
Kommunip erniaqanngitsumik akiligassaqanngitsumillu millionikkaanik inissianut aningaasaliisartunut taarsigassarsititsisarnera, taakkualu inissiat kommunimut akisuumik attartortittagaat SIK-p siulittaasuata maluginiarpai.
- Kommunip karsianniittut innuttaasut aningaasaatigaat, ernialersorneqartussaapput tunniussuunneqaratik, Jess G. Berthelsen oqarpoq.
Qanoq iliortoqarsinnaava?
– Kommuneqarfik Sermersuumi periuseq pilersinneqarpoq, kommunilu ajornartorsiummik aaqqiisussaassapput. Aaqqiissutissarli suussava? Naluara, nalunngilarali ilaqutariit 73-it pisuussutiginngisaminnik ilanngunneqartut eqqugaassanngitsut, Jess G. Berthelsen oqarpoq.
Kommunip millionilinnik taarsigassarsititsinini atorunnaarsikkai
Aningaasaliisut namminersortut namminneq aningaasaatitik atorlugit inissianik attartortittakkanik sanaartortut ineqarnermut akiliut aalajangersinnaavaat, kommunilli ineqarnermut taarsigassarsititsisarfianit taarsigassarsinikkut inissianik sanaartorunik, ineqarnermut akiliut inatsisitigut annerpaaffissalerlugu killeqarpoq.
Kommuneqarfik Sermersooq namminersortut qulingiluat attartornissamut isumaqatigiissuteqarfigai, kommunilu ukiuni 20-ni erniaqanngitsumik akiligassaqanngitsumillu aamma taarsigassarsititsisimalluni.
Kommunip Nuummi inissianik 416-inik sanaartornissamut katillugit 125 millionit koruuninik taarsigassarsisitsinera pineqarpoq.
Ineqarnermut Attaveqaasersuutinullu Naalakkersuisoqarfiup Sermersuumi periuseq iluarsiiffigineqassasoq kommuni peqquaa.
Taarsigassarsiat misissorneqarnerata takutippaa attartornermut isumaqatigiissutit qulingiluat amerlanersaat ineqarnermut aningaasalersuinermut inatsimmut naapertuutinngitsut, kommunillu taarsigassarsititsinerit qulingiluat tamaasa atorunnaarsippai.
Suliffeqarfiit marluk ingerlaannaq iliuuseqarput.
Nuuk City Invest ApS-ip Nuukullammiittut inissiat 73-it attartorinneqarnerat taamaatippaa.
Manguaqqami inissiarsuarnut marlunnut 132-nik initalimmut taarsigassarsiat attatiinnarneqarnissaat piumasaralugu Sarfaarsuit ApS-ip kommuni eqqartuussivimmut suliassanngortippaa.
Ineqarnermut akiliutit affaannanngortinneqassapput
Nuukullammiittut inissiat 73-it attartornissaanut Kommuneqarfik Sermersuup Nuuk City Invest ApS-imut ukiut tallimat matuma siorna isumaqatigiissutigaa, isumaqatigiissut 2030-mi decembarip aallaqqaataata tungaanut atortussanngortinneqarluni.
Inissiap attartorneranut akiliut 7,5 millionit koruuniussasoq aalajangerneqarpoq taannali inatsisinut naapertuutinngilaq. Inatsisimmi naapertorlugit ineqarnermut akiliut annerpaamik 3,9 millionit koruuniusinnaavoq.
Taamaattumik kommunip Nuuk City Invest ima toqqagassippaa: Inissianut akiliutit appartinneqassaaq taamaaliornikkut inatsisit killissarititaaniilerluni, imaluunniit ineqarnermut taarsigassarsiat akilerneqartariaqarput, taamaalilluni Nuuk City Invest namminersortutut ineqarnermut aningaasaliisartutut ineqarnermut akiliutit nammineq aalajangersinnaassallugit.
Nuuk City Investip ineqarnermut akiliutip affaannanngortinnissaa akueriumanngilaa, taamaattumillu kommunip erniaqanngitsumik akiligassaqanngitsumillu taarsigassarsiat 28 ½ millionit koruunit utertinneqarnissaat piumasaraa.
Suliaq unittoortoq
Nuuk City Investip qaammatit pingasut sioqqullugit nalunaaruteqarluni attartorneq taamaatippaa, inissiaatileqatigiiffiulli Nuukullaami attartortut 73-it maanna attartornermut akiliut atorlugu 2026-mi marsip 31-ata tungaanut najugaqarnissaannik neqeroorfigai. Attartortut taamaalillutik ukiup aappaa avillugu allamik initaarnissaminnut periarfissaqarput, tamatumalu kingorna Nuukullammiittut inissiat inissiatut akunnittarfinngortinneqassaaq.
Kommuneqarfik Sermersuup akerliliutigaa Nuuk City Investip attartornermut isumaqatigiissut ineqarnermut akiliutip allanngornera pissutigalugu taamaatiinnarsinnaaneraa, tamannalu Namminersorlutik Oqartussat inatsisaannit kisimi aalajangerneqarpoq, kommunillu attartortitsinermik unitsitsineq eqqartuussivikkoorunniarpaa.
Kommuni suliami inatsisit assigiinngitsut marluk pineqartut tunngavilersuivoq: Nuuk City Investimik inuussutissarsiutigalugu attartornermut isumaqatigiissut attartornermut inatsimmut naapertuuppoq, kommunilli Nuuk City Investimut taarsigassarsititsinera ineqarnermut aningaasalersuinermut inatsimmi piumasaqaatinik naammassinninngilaq.
– Attartornermut isumaqatigiissut naammassisimavarput, taamaattumillu attartornermut isumaqatigiissummik unioqqutitsisimasutut pasilliutit ilumuunnginnerarparput, Ole Jakobsen Sermitsiamut oqarpoq.
Iserit A/S-ip attartortut 73-it ima eqqissisarpai:
- Eqqortumik iliorsimanerput qularinngilluinnarparput, eqqartuussivimmili ajorsaraluaruttaluunniit attartortitanut akisussaaffivut allanngornavianngillat.
Nuuk City Investip Kommuneqarfik Sermersuumut attartornermut isumaqatigiissummik atuutsitsiunnaarnera ilalerneqassappat Nuukullammi attartortut 73-it Iseritip inissaannik ujarliutissallugit neriorsuivoq.
