Illersornissaq pillugu isumaqatigiissummi peqataatitsinnginneq borgmesterip pakatsissutigigaa
Illersornissaq pillugu isumaqatigiissutip immikkoortuata aappaani peqataatinnginneq Qeqqata Kommuniani pakatsitsissutigineqarpoq. Isumaqatigiissut Kalaallit Nunaannut Issittumullu 27,4 milliardit koruuninik naleqartoq suliffissanik ataavartunik qulakkeerinnissanersoq, assersuutigalugu Kangerlussuarmi, suli nalunartoq oqaatigineqarpoq.
Qeqqata Kommuniani borgmesteri Malik Berthelsen (S).
Toqqorsivimmit: Leiff Josefsen
Naalakkersuisut qallunaallu Naalakkersuisui nunatta isumannaatsuunissaanut nakkutigineqarnissaanullu isumaqatigiissuteqarnerat pitsaasuuvoq. Qeqqata Kommuniani borgmesteri Malik Berthelsen (S) illersornissamut isumaqatigiissut nutaaq Kalaallit Nunaannut Issittumullu 27,4 milliardit koruuninik naleqartoq atuarluaqqissaareerlugu oqarpoq.
- Nunatta nakkutigineqarnerata annertusarnissaanut nunatsinnilu aningaasarpassuarnik atuinissamik isumaqatigiissuteqarneq nersualaarusuppara. Nunattami nakkutigineqarnissaa kisimiilluta naammassisinnaanatigulu akissaqartinnginnera nassuerutigisariaqarparput, Malik Berthelsen oqarpoq.
Nersualaarinninnerli tassunga killeqarpoq.
Illersornissamut isumaqatigiissutip immikkoortuata aappaani Kangerlussuup mittarfiata ineriartortinneqarnissaa atorneqarnissaalu siunniunneqarpoq.
Kangerlussuarmi aningaasaliissutit sumut atorneqassappat?
Aningaasaliissutit pillugit kommuni peqataatinneqanngimmat, ilaatigut Kangerlussuarmut tunngasunut, Qeqqata Kommuniani borgmesterip isornartorsiorpaa.
- Naalakkersuisulli isumaqatiginninniarnerit ingerlarnerini minnerpaamilluunniit peqataatinnatalu isumasiorsimanngimmatigut uparuarusuppakka. Tassami Kangerlussuarmi pitsanngorsaanissamut aningaasaliissutiginiarneqartut qujanaraluartut, ilisimanngilarpulluunniit sorpiaat pineqarnersut aammalu ilumut atorfinnik ataavartunik pilersitsiffiussanersut, Malik Berthelsen oqarpoq.
Illersornissaq pillugu isumaqatigiissummi suliffiit ineriartornerlu eqqarsaatigalugit Nuup qitiusumik inissisimanerulernissaa borgmesterip aamma naammaginartinngilaa.
Aamma Kommuneqarfik Sermersuumi borgmesterip Avaaraq Olsenip (IA) Nuummi umiarsualiviup allilerneqarneranut kommunip akuutinneqarnerunissaa ujartorpaa.
Kangerlussuup illersornissaqarfimmit atorneqaannarlunilu tamanit aamma atorneqarnissaanut aningaasaliinernut tunngatillugu suliap nanginnissaanut kommunit qanimut suleqatigalugit pissasoq, nunanut allanut tunngasunut naalakkersuisoq Vivian Motzfeldt (S) erseqqissaatiginikuuaa.
