Sermersuumi borgmesterip sakkutuut umiarsuaannut talittarfeqalernissaq ernummatigaa
Borgmesterip Avaaraq Olsenip illersornissaqarfiup Nuummiinnerulernissaa isumalluarfigivallaanngilaa. Illoqarfiit pingaarnersaata ineriartortinneqarnerani innuttaasut najukkamilu politikerit peqataatinnissaat pingaaruteqarpoq, sakkutuut umiarsuaannut talittarfiliulersaarneq pillugu oqarpoq.
- Oqaloqatigiinnerup ingerlateqqinneqarnerani kommunitut soorunami akuutinneqartariaqarpugut, Avaaraq Olsen oqarpoq.
Assi: Oscar Scott Carl
Illersornissaqarfiup sakkutuuisa umiarsuaannut talittarfeqalernissamik naalagaaffimmit pilersaartoqarnera Kommuneqarfik Sermersuumi borgmesterip Avaaraq Olsenip (IA) ernummatigai.
Sakkutuut Nuummiinnerulernerisa illoqarfimmut allannguutaangaatsiarnissaa, borgmesterip isumakuluutigaa.
- Qinngutta kangerluttaani sakkutooqarfiup annertujaamik umiarsualiveqarnissaa paasinnittaasera naapertorlugu Nuummut annertuumik allannguisitsissaaq, oqarpoq.
Sakkutuut illoqarfimmi takussaanerulernerat siunissamilu suli amerlanerulersinnaanerat innuttaasut eqqarsarnartoqartikkaat, Avaaraq Olsen isumaqarpoq.
- Tamanna pillugu naatsorsuutigilluinnarpara pisariaqartunik oqaloqatigiinnernut piaartumik akuutinneqalernissarput— innuttaasuinnaanngitsut aammali kommunalbestyrelse imarsiornermillu inuussutissarsiortut, oqarpoq.
Suleqatigiinnissaq kissaatigigaa
- Naalagaaffeqatigiinnerup isumannaallisarneqarnissaa pillugu ataqqeqatigiilluni suleqatigiissutigineqarnissaa kissaatigaara, suleqatigiinnermili Nuuk illoqarfiit pingaarnersaat nukittunerulersinneqarnissaannik — sanngiinnerulersinnagu — suleqatigiittoqassaaq.
Illersornissamut ministereqarfiup Sikuki Nuuk Harbourillu suleqatigiinnerisigut sakkutuunut talittarfik piviusunngortinneqassaaq, inissaqartillugulu umiarsuarnit allanit iluaqutigineqarsinnaassalluni.
- Illersornissaqarfiup talittarfittaassaa Nuummi tikilluaqqunarpoq. Tamanit atorneqarsinnaanngorlugu suliniutaammat, aamma Nuummiit Nuummullu sakkutuujunngitsut angallannerannut annertusiartuinnartumut tapertaasinnaammat., nunanut allanut tunngasunut naalakkersuisoq Vivian Motzfeldt (S) pilersaarutit pillugit oqarpoq.
