IMAK: Atuartut ilinniartitsisullu atuarfinni silaannaluttumiittaramik napparsimalersarput

OBS: Malugiuk allaaserisaq aviisip septembarip 23-ani naammassinissaa sioqqullugu suliaammat. Kingorna Kommuneqarfik Sermersooq aalajangerpoq atuarfik Ukaliusaq matuneqassasoq, atuarfik oqoqarmat. Atuartut sulisullu illersorniarlugit taama aalajangertoqartoq, kommuni nittartakkamini allappoq.

Nuummi atuarfinni marlunni ASK-mit USK-imilu oqoqarsinnaanera atuarfiup siulersuisuinit sivitsortumik ernummatigineqarpoq. Tamannami meeqqat peqqissusaannut ilungersunartumik kinguneqarsinnaavoq.

AAMMA ATUARUK

Nuummi atuarfik oqoqartoq paasineqarmat matuneqarpoq

Ilinniartitsisut kattuffiata IMAK-ip Kommuneqarfik Sermersooq sakkortuumik maanna mianersoqqussuteqarfigaa.

Atuartut ilinniartitsisullu Nuummi atuarfinnit Ukaliusamit Atuarfik Samuel Kleinschmidt-imillu piaarnerpaamik qimagutsinneqartariaqarput. Atuartut ilinniartitsisullu illup iluanit silaannaluttumit napparsimalertuartarnerat pinngitsoorniarlugu taama pisoqartariaqarpoq.

Ilinniartitsisut Meeqqat Atuarfianneersut Kattuffiannit IMAK-imit, kommunimut taama kajumissaarisoqarpoq.

- Atuarneq aggustimi aallartimmalli kommunimut marloriarluta allagaqareerpugut, kingullermillu qanittukkut allagaqaqqilluta, IMAK-imi siulittaasoq Elna Thomsen oqarpoq.

- Ilaasortavut sinnerlugit qisuariaateqarpugut, taakkumi kissaatigaat Atuarfik Samuel Kleinschmidtimi Ukaliusamilu ilinniartitsisut atuartullu napparsimalernissaannut illersorniarlugit kommuni piaartumik iliuuseqartariaqartoq.

Ilinniartitsisut kattuffianni siulittaasoq Elna Thomsen Heilmann Sermitsiamut taama oqarpoq.

Atuarfissuup Inussuup ammarneqarnissaata atulernissaatalu tungaanut, atuartut ilinniartitsisullu atuarfitoqqani marlunni aserfallassimaqisuniittut utaqqiisaasumik ininut atuartitsivigineqartussanut nuunneqartariaqartut, ilinniartitsisut kattuffiat isumaqarpoq.

Siulittaasoq: - Napparsimalertarneq pinngitsoortittariaqarparput

IMAK mianersoqqussuteqarpoq.

- Kommune piaartumik iliuuseqartariaqarpoq ininillu atuartitsivissanik allanik ujaasilluni. Ilinniartitsisut atuartullu atuarfitoqqani marluusuni napparsimalersarnerat qimallugu atuarneq inini allani ingerlaqqissinnaaniassammat.

- Atuartut atuarnerminni ullorpassuarnik annaasaqartarnerat ilinniartitsisullu ulluni amerlasuuni napparsimasarnerat pinngitsoortittariaqarpavut.

- Naak politikerit oqartaraluartut uagut ilinniartitsisut sapinngisamik sivisunerpaamik suliinnartariaqartugut, Kommuneqarfik Sermersuumi kommunalbestyrelsimi politikerit sullivinni avatangiisinut ininullu atuartitsiviusunut tunngasunik iliuuseqarneq ajorput, IMAK-imi siulittaasoq Elna Thomsen Heilmann oqarpoq.

Atuarfitoqqanili pineqartuni init atuartitsiviusartut oqoqarnerannik pasitsaassineq pissutigalugu peqqissutsimut ulorianartorsiortitsinersut, IMAK-imit isummerfigineqanngilaq.

- Atuarfitoqqani marlunni oqoqarnera uppernarsaatissaqartinngilarput. Ilaasortattali oqaatigisarpaat atuarfimmiikkaangamik napparsimalertuaannarlutik, timimikkut anillanneqalersarlutik qinngamikkullu aattarlutik. Taamaalilluni ajortoqarnera pasitsaapparput, ilinniartitsisut kattuffianni siulittaasoq oqarpoq.

Atuarfik Inussuk marsip aallaqqaataanni 2024-mi naammassineqartussatut aallaqqaammut pilersaarutigineqaraluarpoq. Taamanimiilli sanaartugassamik suliakkerneqartup Istak-ip atuarfiup kommunimut tunniunneqarnissaa, akuersissutigineqarnissaa atuarfinnullu Ukaliusamut aamma Atuarfik Samuel Kleinschmidtimut taartaasussap atorneqalernissaa arlaleriarluni kinguartinneqartarpoq.

Atuarfiup siulersuisui ilungersunartumik ernummateqartut

Atuarfik Inussummut atuarfiup siulersuisui, atuarfissap nutaap atulernissaata tungaanut Atuarfik Samuel Kleinschmidt Ukaliusarlu ataatsimoortillugit atuarfiup siulersuisuiniittut, atuarfinni pissutsit pillugit Kommuneqarfik Sermersuumut arlaleriarlutik naammagittaalliuuteqarlutik allagaqartarsimapput.

Atuarfissap nutaap suli akuerineqannginnera ammarneqannginneralu atuarfiup siulersuisuisa ernumanartoqartippaat.

”Tamatuma saniatigut angajoqqaatut misigisarparput, meeqqatta atuarfigisaat aserfallassimaqimmata, peqqissutsimullu navianaateqarsinnaallutik. Assersuutigalugu oqummik allanillu meeqqatta peqqissusaannut ajortumik sunniuteqarsinnaasunik ernumassuteqartoqartarpoq. Ajornartorsiut tamanna isiginngitsuusaarneqartariaqanngilaq.”

Atuarfik Inussummi siulersuisut angajoqqaallu arlallit siorna decembarip qulinganni kommunalbestyrelsi taama allaffigaat.

Misissuinerit akissutissarsinissaat utaqqimaarneqartut

Atuarfiilli siulersuisuisa suliaq pineqartoq maanna oqaaseqarfigerusunngilaat, tassami atuarfinni taakkunani marlunni illup iluani silaannaap qanoq inneranik misissuinerup annertusisap inernera aqutsisullu misissuinerit inernerat tunngavigalugu iliuuserisimasaat tunngavigalugit akissutip pissarsiarineqarnissaa utaqqineqarmat.

- Atuarfiup siulersuisuisa tamanna ilungersunartutut isigaat, sapinngisatsinnillu ilinniartitsisut, atuartut angajoqqaallu illersorniarlugit iliuuseqarniarsaraluta, siulersuisuni siulittaasoq Anja Strunz Sermitsiamut oqarpoq.

Borgmesteri Avaaraq Olsen, IA, pisumut oqaaseqartipparput.

- ASK-imi USK-imilu pisut ilungersunartutut isigaavut. Kommunimit qisuariartoqarsimannginneraanera ilumuunngilaq – akerlianik pisoqarpoq. Atuarfimmi siulersuisut aqutsisullu arlaleriarlugit ataatsimeeqatigineqarput, aamma ulluinnarni unammilligassat pillugit qanimut oqaloqatigiittoqarpoq.

- Atuarfinni taakkunani marlunni illup iluani silaannaq uppernarsaaserniarlugu qanorlu ittoqarpiarnera paasiniarlugu misissuiffigitipparput. Kiisalu atuartitsivittut atorneqartut peqqissutsimut ulorianaateqarsinnaanerat paasineqarpat aaqqiissutaasinnaasunik sulissuteqarluta, borgmesteri oqarpoq.

Avaaraq Olsen nangippoq: - Arlaannaannulluunniit attuumassuteqanngitsunit misissuititsinerup naammassinissaata utaqqinerani atuartut sulisullu pillugit suliniutinik assigiinngitsunik aallartitsisoqareernikuuvoq. Meerartavut sulisuvullu sissuertussaavagut, taamaattumillu misissuinermit inernerit suliarineqartut tunngavigalugit iliuuseqarumaarluta.