Nuummi atuarfik oqoqartoq paasineqarmat matuneqarpoq
Kommuneqarfik Sermersuumit illup oqunneranik paasisaqareernerup kingorna Atuarfik Ukaliusap piaartumik matuneqarnissaa aalajangerneqarpoq. Kommunip nittartakkamini tamanna nalunaarutigaa. Angajoqqaat akisussaasullu ilisimatinneqarsimapput.
Atuarfik Ukaliusaq Nuummiittoq oqoqarmat matuneqarpoq. Sapaatip akunnerata tulliani ataasinngornermi atuartut illoqarfiup iluani sumiiffinni allani atuartinneqaqqilissapput.
Assi: Kommuneqarfik Sermersooq
Kommuneqarfik Sermersooq aalajangerpoq atuarfik Ukaliusaq matuneqassasut, atuarfik oqoqarmat. Atuartut sulisullu illersorniarlugit taama aalajangertoqartoq, kommuni nittartakkamini allappoq.
Angajoqqaat akisussaasullu kommunimit ilisimatinneqarsimalerput atuartut nukarliit atuareernerup kingorna ornittakkamut aqagumiit aggertassasut, atuartullu akulliit angajulliillu ataasinngorpat tungaanut angerlarsimaannarallassasut.
- Meeqqat sulisullu toqqissisimasumik peqqinnartumillu avatangiiseqarnissaat qulakkeerniarlugu sukkasuumik iliuuseqarpugut. Pingaarnerpaatipparput. Utaqqiisaasumik aaqqiigallarnitsinni paasinninneq suleqatigiinnissarlu kissaatigaarput, borgmesteri Avaaraq Olsen oqarpoq.
Ataasinngorpat atuartitsineq aallarteqqissaaq
Kommunip nalunaarutigaa ataasinngornermi septembarip 29-ani atuartitsineq, inini allani, aallarteqqinneqassasoq.
Kommuneqarfik Sermersuumit naatsorsuutigineqarpoq init atuarfiusussat allanngussagaluartut, taamaattoq atuartitsineq pilersaarutit malillugit ingerlaannassasoq.
- Nalunngilarput tamanna unammilligassaqartitsiumaartoq kisianni meeqqanut ulluinnaat toqqissisimanartuunissaannut allanngorartuunnginnissaannullu sapinngisamik iliuuseqassaagut. Angajoqqaanit sulisunillu suleqatigiinneq misigileriigarput qutsatigeqaarput, borgmesteri Avaaraq Olsen oqarpoq.
Suli ilisimaneqanngilaq atuartut ataasinngornermiit sumi atuartinneqassanersut. Kommuni ilisimatitsivoq atuartitsiviusussat inissinneqarpata angajoqqaat akisussaasullu ilisimatinneqarumaartut.
Atuarfissaq nutaaq, Atuarfik Inussuk, suli ammarsinnaannginnera pissutigalugu atuarfik Ukaliusaq suli ammatinneqaraluarpoq.
