Immap naqqatigut kabeli nutaaq Tunumi periarfissanik nutaanik pilersitsissasoq
Tasiilaq nunaqarfiillu eqqaanniittut sivisuallaamik puigorneqaqqasut Justus Hansen isumaqarpoq. Taamaammat teknikikkut ineriartornermut pitsanngorsaaqataasussamik immap naqqatigut kabelimik nutaamik pilersitsisoqarnissaa nuannaarutigineqarpoq.
Justus Hansenip (D) Issittumi Atlantikullu Avannaani illersornissaq pillugu isumaqatigiissummi nutaami Kalaallit Nunaanni immap naqqatigut kabelimik nutaamik pilersitsisoqarnissaa qulakkeerneqarmat nuannaarutigaa.
Assi: Leiff Josefsen
Illersornissamut isumaqatigiissut – Issittoq Atlantikullu Avannaa pillugit immikkoortoq 2 – Naalakkersuisunit qallunaallu naalakkersuisuinit sapaatip-akunnerani kingullermi saqqummiunneqarpoq. Kalaallit Nunaanni immap naqqatigut kabelimik allamik peqalissasoq isumaqatigiissutaasunut ilaavoq.
Taannalu nunami, ingammik Tunumi, attaveqarluarnerulernissamut, ineriartornissamut ataqatigiinnerulernissamullu periarfissanik annertuunik nassataqarpoq.
Inatsisartunut ilaasortaq Justus Hansen (D) tusagassiuutitigut nalunaarummi allappoq.
- Oqaluttuarisaanermi periarfissatut pingaarutilerujussuartut isigaara. Immap
naqqatigut kabelip attaveqaqatigiinnerput pitsanngorsassavaa, aammalu Tasiilaq
Tunulu tamaat digitalikkut aningaasaqarnikkullu ineriartornermut
akuulernissamut periarfissillugu. Siuariartornissamut periarfissanik pilersitsissaaq,
nutaanut suliffeqarfinnut aammalu inuusuttut amerlanerit
piffinniiginnarnissaannut periarfissiissalluni. Tamanna pitsaasorujussuartut
isigaara, oqarpoq.
Tunu ukiuni amerlavallaani puigugaaqqasimasoq taassuma tikkuarpaa. Teknikikkullu atortorissaarutit pitsaanerulernerat inuiaqatigiinni ikittunnguanik inulinni attaveqaatit kipisaqattaartut aqqutillu ajorteqattaartut ineriartornissaraluamik sivisuumik akimmiffiusarsimammata malugineqassasoq, taanna oqarpoq.
Imarsiornermi kabeli pingaaruteqarnerpaatut inissinneqassaaq
Nunanut allanut tunngasunut naalakkersuisup Vivian Motzfeldtip (S), qalunaallu illersornissaq pillugu ministeriata Troels Lund Poulsenip (Venstre) illersornissaq pillugu isumaqatigiissutip immikkoortuata aappaa tallimanngormat saqqummiuppaat. Immap naqqatigut kabelimik nutaamik peqalernissap saniatigut Issittumi Sakkutooqarfiup ataani sakkutuut immikkoortortaqarfiata aaqqissuussaanerata tunngavilerneqarnissaa, Nuummi qitiusumik immikkoortortaqarfeqalernissaq aaamma Issittumi Tunngaviusumik Ilinniarfimmi droninik aqutsisinnaanermik ilinniartitsinerit nutaat atulernissaat isumaqatigiissummi ilaapput.
Isumaqatigiissutip innuttaasunut tamanut
iluaqutaanissaa pissutigalugu immap naqqatigut kabelip pingaartinneqarnissaa Demokraatinit Justus Hansenimullu piingaaruteqartoq taanna allappoq.
- Tasiilaq aamma Kalaallit Nunaata Kangia aallaaqqaataaniilli
akuutinneqassaaq, Kalaallit Nunaata Kangia tamakkerlugu ineriartornermik
pisariaqartinneqartumut matuersaataasinnaammat, Justus Hansen oqarpoq.
Aningaasaliissutissat suliniutinut katillugit 27,4 milliardit koruuninik naleqartut nunami suliniutinik 2,5 milliardit koruuninik, imaatigut suliniutinik 22,3 milliardit koruuninik silaannakkullu suliniutinik 2,6 milliardit koruuninik aningaasartaqartussaapput.
Tunumi silaannakkut angallannermi kalerrisaarinermut atortussanik aamma radareqalissaaq.
